ହାଇଦ୍ରାବାଦ: ସାଉଥ ସିନେମା ଜଗତରେ ଦୁଃଖର ଛାୟା। ସୁପରଷ୍ଟାର ଅଲ୍ଲୁ ଅର୍ଜୁନଙ୍କ ପରିବାରରେ ବିପଦ ନାମିଛି। ତାଙ୍କ ଜେଜେମା’ ଅଲ୍ଲୁ କନକରତ୍ନମ ଗାରୁ ୯୪ ବର୍ଷ ବୟସରେ ପରଲୋକ କରିଛନ୍ତି। ସେ ଶନିବାର ମଧ୍ୟରାତ୍ରି ୧:୪୫ରେ ଶେଷ ନିଶ୍ୱାସ ତ୍ୟାଗ କରିଥିଲେ। ଦୀର୍ଘଦିନ ଧରି ସେ ବୟସଜନିତ ରୋଗରେ ପୀଡ଼ିତ ଥିଲେ।
ମୃତଦେହକୁ ଅଲ୍ଲୁ ଅରବିନ୍ଦଙ୍କ ଘରେ ରଖାଯାଇଥିଲା, ଯେଉଁଠାରେ ପରିବାରସଭ୍ୟ ଓ ନିକଟାତ୍ମୀୟମାନେ ଅନ୍ତିମ ବିଦାୟ ଦେଇଥିଲେ। ଅଲ୍ଲୁ କନକରତ୍ନମଙ୍କ ନିଧନ ସମ୍ବାଦରେ ଟଲିଉଡ ଇଣ୍ଡଷ୍ଟ୍ରିରେ ଶୋକର ଲହରୀ ସୃଷ୍ଟି ହୋଇଛି।
ଅଲ୍ଲୁ ଅର୍ଜୁନ (ଯିଏ ମୁମ୍ବାଇରେ ଏଟଲୀଙ୍କ ଫିଲ୍ମ ଶୁଟିଂ କରୁଥିଲେ) ଏବଂ ରାମ ଚରଣ (ଯିଏ ମୈସୁରରେ ଶୁଟିଂରେ ବ୍ୟସ୍ତ ଥିଲେ) — ଦୁହେଁ ନିଜ ଶୁଟିଂ ଛାଡ଼ି ହାଇଦ୍ରାବାଦ ଫେରିଥିଲେ। ରାମ ଚରଣ ସିଧାସଳଖ ଅଲ୍ଲୁ ଅରବିନ୍ଦଙ୍କ ଘରକୁ ଯାଇ, ଅଲ୍ଲୁ ଅର୍ଜୁନଙ୍କୁ ଆଲିଙ୍ଗନ କରି ସାନ୍ତ୍ବନା ଦେଇଥିଲେ।
ଏକ ଭିଡିଓରେ ଅଲ୍ଲୁ ଅର୍ଜୁନଙ୍କୁ ଶୋକାକୁଳ ଅବସ୍ଥାରେ ଦେଖାଯାଇଛି। ସେଠାରେ ଚିରଞ୍ଜୀବୀଙ୍କୁ ମଧ୍ୟ ଉପସ୍ଥିତ ଦେଖାଯାଇଛି। ଚିରଞ୍ଜୀବୀ ଟୁଇଟ୍ କରି ଲେଖିଛନ୍ତି, “ଆମ ଶାଶୁମା, ଶ୍ରୀ ଅଲ୍ଲୁ ରାମାଲିଙ୍ଗୟ୍ୟାଙ୍କ ପତ୍ନୀ କନକରତ୍ନମ ଗାରୁଙ୍କ ନିଧନ ଅତ୍ୟନ୍ତ ବିଦାରକ। ସେ ଦେଇଥିବା ପ୍ରେମ, ସାହସ ଓ ମୂଲ୍ୟବୋଧ ସବୁବେଳେ ଆମ ପାଇଁ ପ୍ରେରଣା ହେଇରହିବ। ଭଗବାନ ତାଙ୍କ ଆତ୍ମାକୁ ଶାନ୍ତି ଦିଅନ୍ତୁ।”