ମୁମ୍ବାଇ: ଆଗାମୀ ଦେଶଭକ୍ତିମୂଳକ ଚଳଚିତ୍ର **‘ବର୍ଡର–୨’**କୁ ନେଇ ସୋସିଆଲ ମିଡିଆରେ ଦର୍ଶକଙ୍କ ମଧ୍ୟରେ ଜୋରଦାର ଉତ୍ସାହ ଦେଖାଯାଉଛି। ଫିଲ୍ମର ଗୀତ ‘ଘର କବ୍ ଆଓଗେ’ ମଧ୍ୟ ପ୍ରଶଂସକଙ୍କ ମନ ଜିତିନେଇଛି। ସନ୍ନି ଦେଓଲଙ୍କ ସହ ବରୁଣ ଧୱନ, ଦିଲଜିତ ଦୋସାଞ୍ଜ ଓ ଆହାନ ସେଟ୍ଟୀଙ୍କ ଅଭିନୟକୁ ଦର୍ଶକମାନେ ଅପେକ୍ଷା କରୁଥିବା ବେଳେ, ଟିଜର ଓ ଗୀତରେ ନଜର ଆସିଥିବା ଅଭିନେତା ପରମବୀର ଚିମା ଏବେ ଚର୍ଚ୍ଚାରେ ରହିଛନ୍ତି।
‘ବର୍ଡର–୨’ରେ ପରମବୀର ଚିମା ସୁବେଦାର ନିଶାନ ସିଂହଙ୍କ ଭୂମିକାରେ ଅଭିନୟ କରିଛନ୍ତି। ଏହି ଫିଲ୍ମକୁ ତାଙ୍କ କ୍ୟାରିଅରର ସବୁଠାରୁ ବଡ଼ ପ୍ରୋଜେକ୍ଟ ଭାବେ ଦେଖାଯାଉଛି, ଯାହା ଭାରତୀୟ ଦର୍ଶକଙ୍କ ମଧ୍ୟରେ ତାଙ୍କର ଲୋକପ୍ରିୟତାକୁ ଆହୁରି ବଢ଼ାଇବ ବୋଲି ଆଶା କରାଯାଉଛି।
ପଞ୍ଜାବର ଜଳନ୍ଧର ନିବାସୀ ପରମବୀର ଚିମା ପଞ୍ଜାବୀ କ୍ରାଇମ୍ ଥ୍ରିଲର୍ ୱେବ୍ସିରିଜ୍ **‘ଟବ୍ବର’**ରେ ଇନ୍ସପେକ୍ଟର ଲଖବିନ୍ଦରଙ୍କ ଭୂମିକା ଜରିଆରେ ପ୍ରସିଦ୍ଧି ହାସଲ କରିଥିଲେ। ଏହି ଶୋ’ରେ ତାଙ୍କ ଅଭିନୟ ଦର୍ଶକଙ୍କ ମନକୁ ଛୁଇଁଥିଲା। ଏକ ସାକ୍ଷାତକାରରେ ପରମବୀର କହିଛନ୍ତି ଯେ, ‘ଟବ୍ବର’ ଦେଖିବା ପରେ ‘ବର୍ଡର–୨’ର ନିର୍ଦ୍ଦେଶକ ଅନୁରାଗ ସିଂହ ତାଙ୍କୁ ଏହି ଫିଲ୍ମରେ ସୁଯୋଗ ଦେଇଥିଲେ।
ପରମବୀର ସୋନି ଟିଭିର ଲୋକପ୍ରିୟ ଶୋ’ ‘ଚମକ’ ସିଜନ୍ ୧ ଓ ୨ରେ କାଲା ଭୂମିକାରେ ମଧ୍ୟ ନଜର ଆସିଥିଲେ। କଲେଜ ସମୟରେ ସେ ଦିଲ୍ଲୀରେ ମିଷ୍ଟର ଇଣ୍ଡିଆ ପ୍ରତିଯୋଗିତା ମଧ୍ୟ ଜିତିଥିବା ଜଣାପଡ଼ିଛି।
ଅଭିନେତା ନିଜ ସଂଘର୍ଷ କାହାଣୀ ସେୟାର କରି କହିଛନ୍ତି ଯେ, ମିଷ୍ଟର ଇଣ୍ଡିଆ ଜିତିବା ପରେ ମଧ୍ୟ ଦୀର୍ଘ ସମୟ ତାଙ୍କୁ କାମ ମିଳିନଥିଲା। କୋଭିଡ–୧୯ ମହାମାରୀ ସମୟରେ ପରିସ୍ଥିତି ଆହୁରି ଖରାପ ହୋଇଯାଇଥିଲା। ମୁମ୍ବାଇରୁ ଘରକୁ ଫେରି ପରିବାରର ଆର୍ଥିକ ସମସ୍ୟା ଦେଖି ସେ ଅଭିନୟ ଛାଡ଼ିବାକୁ ମଧ୍ୟ ଚିନ୍ତା କରିଥିଲେ।
କିନ୍ତୁ ଏମନ୍ତାବେଳେ ତାଙ୍କ ବାପାଙ୍କ ପ୍ରେରଣା ତାଙ୍କ ଜୀବନର ମୁହାଁ ଫେରାଇଦେଇଥିଲା। ବାପା ତାଙ୍କୁ ଅଭିନୟ କ୍ୟାରିଅର ଛାଡ଼ିବାକୁ ମନା କରି ଆଗକୁ ବଢ଼ିବାକୁ ଉତ୍ସାହ ଦେଇଥିଲେ। ଏହାପରେ ପରମବୀରଙ୍କ ଭାଗ୍ୟ ବଦଳିଗଲା ଏବଂ ଆଜି ‘ବର୍ଡର–୨’ ଭଳି ବଡ଼ ଫିଲ୍ମରେ ସେ ନଜର ଆସୁଛନ୍ତି।