ଆରୟନଙ୍କ ନିର୍ଦ୍ଦେଶିତ ସିରିଜ୍ ପାଇଁ ଶାହରୁଖ ଖାନଙ୍କୁ ସମନ — ମାନହାନି ମାମଲାରେ ଦିଲ୍ଲୀ ହାଇକୋର୍ଟର ଆଦେଶ
ନୂଆଦିଲ୍ଲୀ: ବଲିଉଡ୍ ସୁପରଷ୍ଟାର ଶାହରୁଖ ଖାନଙ୍କ ପୁଅ ଆରୟନ ଖାନଙ୍କ ନିର୍ଦ୍ଦେଶିତ ୱେବ୍ ସିରିଜ୍ “ଦି ବ୍ୟାଡ୍ସ ଅଫ୍ ବଲିଉଡ୍” ନେଇ ମାନହାନି ମାମଲା ରୁପିନେ ଶାହରୁଖ ଖାନଙ୍କ ନିଜ କମ୍ପାନି ରେଡ୍ ଚିଲିଜ୍ ଏଣ୍ଟରଟେନମେଣ୍ଟ ଏବଂ ଓଟିଟି ପ୍ଲାଟଫର୍ମ ନେଟଫ୍ଲିକ୍ସକୁ ଦିଲ୍ଲୀ ହାଇକୋର୍ଟ ସମନ ପଠାଇଛି।
ଏହି ମାମଲା ପୂର୍ବତନ ନାର୍କୋଟିକ୍ସ କଣ୍ଟ୍ରୋଲ୍ ବ୍ୟୁରୋ (ଏନସିବି) ଅଧିକାରୀ ସମୀର ୱାଙ୍ଖେଡେଙ୍କ ଦ୍ୱାରା ଦାୟର ହୋଇଛି। ସେ ଦାବି କରିଛନ୍ତି ଯେ, ସେପ୍ଟେମ୍ବର ୧୮ରେ ମୁକ୍ତି ପାଇଥିବା ଏହି ୱେବ୍ ସିରିଜ୍ ତାଙ୍କ ପ୍ରତିଷ୍ଠାକୁ କ୍ଷୁର୍ଣ୍ଣ କରିଛି ଏବଂ ତାଙ୍କ ବୃତ୍ତିଗତ ସଚ୍ଚୋଟତା ଉପରେ ପ୍ରଶ୍ନ ଉଠାଇଛି।
ସିରିଜ୍ଟି ରେଡ୍ ଚିଲିଜ୍ ଏଣ୍ଟରଟେନମେଣ୍ଟ ପ୍ରଯୋଜନା ଓ ନେଟଫ୍ଲିକ୍ସ ପ୍ରସାରିତ ଥିଲା, ଯେଉଁଥିରେ ଆରୟନ ଖାନ ନିଜେ ନିର୍ଦ୍ଦେଶନା କରିଥିଲେ — ଏହା ତାଙ୍କର ପ୍ରଥମ ଡେବ୍ୟୁ ସିରିଜ୍ ଥିଲା। ୱାଙ୍ଖେଡେଙ୍କ ଅଭିଯୋଗ ଅନୁସାରେ, ସିରିଜ୍ରେ ଜଣେ ଏନସିବି ଅଧିକାରୀଙ୍କ ଚରିତ୍ର ଦ୍ୱାରା ତାଙ୍କୁ ଅପମାନିତ ଭାବରେ ଦେଖାଯାଇଛି।
ସେ ଅଦାଲତକୁ ଅନୁରୋଧ କରିଛନ୍ତି ଯେ, ଏହି ସିରିଜ୍କୁ ମାନହାନିଜନକ ଘୋଷଣା କରାଯାଉ ଏବଂ ସେଥିପାଇଁ ₹୨ କୋଟି କ୍ଷତିପୂରଣ ଦିଆଯାଉ। ୱାଙ୍ଖେଡେ ଅଭିଯୋଗ କରିଛନ୍ତି ଯେ, ଏହି ସୋ’ ମୁକ୍ତି ପରେ ସେ ସୋସିଆଲ ମିଡିଆରେ ଅପମାନଜନକ ଟିପ୍ପଣୀ ଓ ନେଗେଟିଭ୍ ପ୍ରତିକ୍ରିୟା ସହିବାକୁ ପଡ଼ିଛି, ଯାହା ତାଙ୍କ ସାର୍ବଜନୀନ ଭାବମୂର୍ତ୍ତିକୁ ଗୁରୁତର ଭାବରେ ପ୍ରଭାବିତ କରିଛି।
ଦିଲ୍ଲୀ ହାଇକୋର୍ଟ ସମସ୍ତ ପକ୍ଷକୁ ୭ ଦିନ ମଧ୍ୟରେ ଉତ୍ତର ଦାଖଲ କରିବାକୁ ନିର୍ଦ୍ଦେଶ ଦେଇଛି। ଏହି ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୩୦ରେ ହେବ।