ଭୁବନେଶ୍ୱର: ଓଡ଼ିଆ ସଙ୍ଗୀତ ଜଗତର ଜଣେ ଉଜ୍ଜ୍ୱଳ ନାମ, କଣ୍ଠଶିଳ୍ପୀ ହ୍ୟୁମାନ୍ ସାଗର ଶେଷରେ ଜୀବନ ଯୁଦ୍ଧରେ ହାରିଗଲେ। ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅବସ୍ଥାରେ ତାଙ୍କ ଦେହାନ୍ତ ହେବା ପରେ ସମଗ୍ର ସଙ୍ଗୀତ ମହଳରେ ଶୋକର ଛାୟା ଛାଇଯାଇଛି।
୩୪ ବର୍ଷ ବୟସରେ ତାଙ୍କ ଅକାଳ ବିୟୋଗକୁ ବିଶ୍ୱାସ କରିପାରୁନାହାନ୍ତି ତାଙ୍କ ପ୍ରଶଂସକ, ସହକର୍ମୀ ଏବଂ ସଙ୍ଗୀତଜଗତର ଲୋକେ। ହ୍ୟୁମାନଙ୍କ ସହ କାମ କରୁଥିବା ଅନେକେ ଆଘାତ ବ୍ୟକ୍ତ କରି କହିଛନ୍ତି— “ଏତେ କମ୍ ବୟସରେ କିଏ ଯାଏ?”
ଘରେ ଘରେ ପରିଚିତ ହ୍ୟୁମାନଙ୍କ ସ୍ୱର
ଓଡ଼ିଆ ଚଳଚ୍ଚିତ୍ର, ଆଲବମ୍ ଓ ବିଭିନ୍ନ ପ୍ରେମମୟ ଗୀତରେ ତାଙ୍କ ମଧୁର ସ୍ବର ଘରେ ଘରେ ପରିଚିତ ଥିଲା। ସମ୍ପ୍ରତି ସ୍ୱାସ୍ଥ୍ୟ ଅବନତି ହେବାରୁ ତାଙ୍କ ପାଇଁ ଲକ୍ଷାଧିକ ଭକ୍ତ ପ୍ରାର୍ଥନା କରୁଥିଲେ।
ଅଧିକ ଚିକିତ୍ସା ପାଇଁ ତାଙ୍କୁ ରାଜ୍ୟ ବାହାରକୁ ନେବା ଯୋଜନା ଚାଳିଥିଲା। ତାଙ୍କ ମାଆ ଓ ସ୍ତ୍ରୀ ମଧ୍ୟ ରାଜ୍ୟ ସରକାରଙ୍କୁ ସହାୟତା ପାଇଁ ଆବେଦନ କରିଥିଲେ।
ମୁଖ୍ୟମନ୍ତ୍ରୀଙ୍କ ଶୋକ ପ୍ରକାଶ
ହ୍ୟୁମାନ ସାଗରଙ୍କ ପରଲୋକ ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକ୍ସରେ ଶୋକ ବ୍ୟକ୍ତ କରି ଲେଖିଥିଲେ—
“ଏହି ବିଷୟ ଶୁଣି ମୁଁ ଅତ୍ୟନ୍ତ ଦୁଃଖିତ। ତାଙ୍କ ବିୟୋଗ ଓଡ଼ିଆ ସଙ୍ଗୀତ ଏବଂ ସିନେମା ପାଇଁ ଅପୂରଣୀୟ କ୍ଷତି।”
ସେ ପରିବାର ପ୍ରତି ସମବେଦନା ଜଣାଇ ଦିବଙ୍ଗତ ଆତ୍ମାଙ୍କ ଶାନ୍ତି ପାଇଁ ପ୍ରାର୍ଥନା କରିଛନ୍ତି।