ମୁମ୍ବାଇ: ସୁପରଷ୍ଟାର ରଣବୀର କପୁର ଏବେ ନିଜର କ୍ୟାରିୟରର ସବୁଠାରୁ ବଡ଼ ପ୍ରକଳ୍ପ *‘ରାମାୟଣ’*ରେ ଅଭିନୟ କରୁଛନ୍ତି। ନିତେଶ ତିୱାରୀଙ୍କ ନିର୍ଦ୍ଦେଶନାୟିତ ଏହି ଫିଲ୍ମର ପ୍ରଥମ ଲୁକ ଟିଜର ରିଲିଜ୍ ହେବା ସହିତ ସୋସିଆଲ ମିଡିଆରେ ଭଳିଭଳି ଚର୍ଚ୍ଚା ଆରମ୍ଭ ହୋଇଛି। ଟିଜରରେ ରଣବୀରଙ୍କୁ ରାମଙ୍କ ଅବତାରରେ ଧନୁସ୍ଧାରୀ ଯୋଦ୍ଧା ଭାବେ ଦେଖିବାକୁ ମିଳିଥିଲା।
ସମ୍ପ୍ରତି ଏକ ସାକ୍ଷାତକାରରେ ରଣବୀର କହିଛନ୍ତି ଯେ, ଏହି ଚରିତ୍ରକୁ ଜୀବନ୍ତ କରିବା ପାଇଁ ସେ ନିଜ ଜୀବନରେ ବଡ଼ ପରିବର୍ତ୍ତନ କରିଛନ୍ତି। ସେ ମଦ୍ୟପାନ ଏବଂ ଧୂମପାନ ସହିତ ଆମିଷ ଛାଡ଼ି ଏବେ ସାତ୍ତ୍ୱିକ ଭୋଜନ ଗ୍ରହଣ କରୁଛନ୍ତି। ସେହିପରି, ପ୍ରତିଦିନ ବ୍ୟାୟାମ ଓ ଧ୍ୟାନରେ ସମୟ ବିତାଇ ଚରିତ୍ରକୁ ଭିତରୁ ଅନୁଭବ କରିବାରେ ଚେଷ୍ଟା କରୁଛନ୍ତି। ସେ ସ୍ପଷ୍ଟ କରିଛନ୍ତି, “ମୋ ଝିଅ ରାହା ଜନ୍ମ ହେବା ପରଠାରୁ ମୁଁ ଧୂମପାନ କରିବା ସମ୍ପୂର୍ଣ୍ଣ ବନ୍ଦ କରିଦେଇଛି।”
ନିତେଶ ତିୱାରୀଙ୍କ ‘ରାମାୟଣ’ ଦୁଇଟି ଭାଗରେ ମୁକ୍ତି ପାଇବ। ପ୍ରଥମ ଭାଗ ୨୦୨୬ ଦୀପାବଳିରେ ଏବଂ ଦ୍ୱିତୀୟ ଭାଗ ୨୦୨୭ ଦୀପାବଳିରେ ପ୍ରଦର୍ଶିତ ହେବ। ୪୦୦୦ କୋଟି ଟଙ୍କାର ବିଶାଳ ବଜେଟ୍ରେ ନିର୍ମିତ ହେଉଥିବା ଏହି ଫିଲ୍ମକୁ ଭାରତୀୟ ସିନେମାର ସବୁଠାରୁ ମହଙ୍ଗା ପ୍ରକଳ୍ପ ବୋଲି ଧରାଯାଉଛି।
ଫିଲ୍ମରେ ରଣବୀର କପୁର ସହିତ ସାଇ ପଲ୍ଲବୀ, ୟଶ, ସନି ଦେଓଲ, ରବି ଦୁବେ, ଅରୁଣ ଗୋଭିଲ, ରାକୁଲ ପ୍ରୀତ ସିଂହ, ଲାରା ଦତ୍ତା, ଅମିତାଭ ବଚ୍ଚନ, କୁନାଲ କପୁର ପର୍ଯ୍ୟନ୍ତ ବହୁତ ବଡ଼ ଷ୍ଟାରକାଷ୍ଟ ଦେଖାଯିବେ। କେବଳ ପ୍ରଚାର ପାଇଁ ମାତ୍ର ୧୩୦୦ କୋଟି ଟଙ୍କା ଖର୍ଚ୍ଚ କରାଯିବା ଆକଳନ ହୋଇଛି।