ନେହଲ୍ ଭାଡୋଲିଆଙ୍କ ଅଭିଯୋଗ ପରେ ପ୍ରତିକ୍ରିୟା କଲେ ସୁଭାଷ ଘାଇ, କହିଲେ– “ଅପରିଚିତଙ୍କୁ ଭେଟିବା ଏବେ ଭୟଙ୍କର”

ନୂଆଦିଲ୍ଲୀ: ଅଭିନେତ୍ରୀ ନେହଲ୍ ଭାଡୋଲିଆଙ୍କ ଗୁରୁତର ଅଭିଯୋଗ ପରେ ପ୍ରସିଦ୍ଧ ଚଳଚ୍ଚିତ୍ର ନିର୍ଦ୍ଦେଶକ ସୁଭାଷ ଘାଇ ପ୍ରଥମେ ମୁଖର ହୋଇଛନ୍ତି।

ନେହଲ୍, ଯିଏ “ହାଉସ୍ ଆରେଷ୍ଟ”, “ଗନ୍ଦି ବାତ୍ ୩” ଏବଂ “ଜୁଲି” ଭଳି ୱେବସିରିଜରେ ଅଭିନୟ କରିଛନ୍ତି, ସୁଭାଷ ଘାଇଙ୍କ ବିରୋଧରେ ଅଭିଯୋଗ କରି କହିଥିଲେ ଯେ ନିର୍ଦ୍ଦେଶକ ତାଙ୍କୁ ହୋଟେଲ ରୁମରେ ନେଇ ଓଠରେ ଚୁମ୍ବନ କରିବାକୁ ଚେଷ୍ଟା କରିଥିଲେ।

ଏହି ବିବାଦକୁ ନେଇ ଘାଇ ନିଜର ସୋସିଆଲ ମିଡିଆ ଖାତାରେ ଘର ବଗିଚାର ଏକ ଫଟୋ ସେୟାର କରି ଲେଖିଛନ୍ତି–

“ଜଣେ ବରିଷ୍ଠଙ୍କ କର୍ତ୍ତବ୍ୟ ହେଉଛି ଯୁବମାନଙ୍କୁ ସାହାଯ୍ୟ କରି ସେମାନଙ୍କ କ୍ୟାରିଅରରେ ଆଗକୁ ବଢ଼ିବାକୁ ମାର୍ଗଦର୍ଶନ ଦେବା। କିନ୍ତୁ ଆଜିକାଲି ପ୍ରମୋସନ୍ ପାଇଁ କେହି ସତ୍ୟ କିମ୍ବା ମିଥ୍ୟା ବୟାନ ଦେଇ ସୋସିଆଲ ମିଡିଆରେ ଚର୍ଚ୍ଚାରେ ରହିବାକୁ ଚାହୁଁଥାନ୍ତି। ତେଣୁ ଅପରିଚିତ ଲୋକଙ୍କୁ ଭେଟିବା ଏବେ ଭୟଙ୍କର ଲାଗୁଛି।”

ସେ ଅଧିକ କହିଛନ୍ତି, “ଯେଉଁମାନେ ମିଥ୍ୟା ପ୍ରଚାର କରୁଛନ୍ତି, ପରମେଶ୍ୱର ସେମାନଙ୍କୁ ଆଶୀର୍ବାଦ କରନ୍ତୁ। ଜୀବନରେ ସମ୍ମାନଜନକ କ୍ୟାରିଅର ଗଠନ ପାଇଁ ପାରସ୍ପରିକ ସମ୍ମାନ ଆବଶ୍ୟକ।”