ନୂଆଦିଲ୍ଲୀ: ଲୋକପ୍ରିୟ ଗାୟକ ଜୁବିନ ଗର୍ଗଙ୍କ ମୃତ୍ୟୁ ମାମଲାରେ ଗିରଫ ହୋଇଥିବା ୫ ଅଭିଯୁକ୍ତଙ୍କୁ ୧୪ ଦିନ ପାଇଁ ନ୍ୟାୟିକ ହେପାଜତରେ ପଠାଯାଇଛି। ସିଙ୍ଗାପୁରରେ ଗତ ମାସରେ ଜୁବିନଙ୍କ ମୃତ୍ୟୁ ଘଟିଥିଲା, ଯାହାକୁ ପ୍ରଥମେ ଦୁର୍ଘଟଣା ବୋଲି କୁହାଯାଇଥିଲା। କିନ୍ତୁ ପରେ ପରିବାର ପକ୍ଷରୁ ଏହା ହତ୍ୟା ହୋଇଥିବା ଅଭିଯୋଗ ଆସିଥିଲା।
ଏହା ପରେ ପୁଲିସ ୫ ଜଣଙ୍କୁ ଗିରଫ କରିଥିଲା — ଉତ୍ତର ପୂର୍ବ ଭାରତ ମହୋତ୍ସବର ମୁଖ୍ୟ ଆୟୋଜକ ଶ୍ୟାମକାନୁ ମହାନ୍ତ, ଜୁବିନଙ୍କ ମ୍ୟାନେଜର ସିଦ୍ଧାର୍ଥ ଶର୍ମା, ପୁଲିସ ଅଧିକାରୀ ସନ୍ଦିପନ ଗର୍ଗ, ତାଙ୍କ ସୁରକ୍ଷା ଅଧିକାରୀ (ପିଏସଓ) ନନ୍ଦେଶ୍ୱର ବୋରା ଏବଂ ପ୍ରବୀଣ ବୈଶ୍ୟ। କାମରୂପ ମୁଖ୍ୟ ନ୍ୟାୟିକ ମାଜିଷ୍ଟ୍ରେଟ ସେମାନଙ୍କୁ ନ୍ୟାୟିକ ହେପାଜତକୁ ପଠାଇଛନ୍ତି।
କୋର୍ଟ ସେମାନଙ୍କ ସୁରକ୍ଷା ଦିଗରେ ଚିନ୍ତା ପ୍ରକାଶ କରି, ସମସ୍ତ ଅଭିଯୁକ୍ତଙ୍କୁ ମୁସଲପୁରର ବକ୍ସା ଜେଲକୁ ସ୍ଥାନାନ୍ତର କରିବା ନିର୍ଦ୍ଦେଶ ଦେଇଛନ୍ତି। ଏହି ଜେଲ ନିକଟତମ ସମୟରେ ଉଦଘାଟିତ ହୋଇଥିବା ସହିତ ସେଠାରେ ଏପର୍ଯ୍ୟନ୍ତ କୌଣସି କଏଦୀ ନାହାଁନ୍ତି।
ଉଲ୍ଲେଖନୀୟ, ସେପ୍ଟେମ୍ବର ୧୯ରେ ସିଙ୍ଗାପୁରରେ ସ୍କୁବା ଡାଇଭିଂ ବେଳେ ଜୁବିନ ଗର୍ଗଙ୍କ ମୃତ୍ୟୁ ହୋଇଥିଲା। ତାଙ୍କ ଆକସ୍ମିକ ମୃତ୍ୟୁ ନେଇ ସମସ୍ତଙ୍କ ମଧ୍ୟରେ ଆଶ୍ଚର୍ଯ୍ୟ ସୃଷ୍ଟି ହୋଇଥିଲା। ଘଟଣାର ରହସ୍ୟ ଖୋଲିବା ପାଇଁ ତାଙ୍କର ଦୁଇଥର ବ୍ୟବଚ୍ଛେଦ କରାଯାଇଥିଲା। ଏବେ ପୁଲିସ ମୃତ୍ୟୁର ପଛର ରହସ୍ୟ ଖୋଜିବା ପାଇଁ ତଦନ୍ତ ଜାରି ରଖିଛି।