ଶ୍ରୀନଗର: ଜମ୍ମୁ–କାଶ୍ମୀରର ଡୋଡା ଏବଂ କିସ୍ତୱାର ଅଞ୍ଚଳରେ ୩୦ରୁ ୩୫ ଜଣ ପାକିସ୍ତାନୀ ଆତଙ୍କବାଦୀ ସକ୍ରିୟ ଥିବା ସମ୍ପର୍କରେ ଗୁଇନ୍ଦା ଏଜେନ୍ସିମାନେ ସତର୍କ ସୂଚନା ଦେଇଛନ୍ତି। ଏହି ଆଲର୍ଟ ପରେ ଭାରତୀୟ ସେନା, ଜମ୍ମୁ–କାଶ୍ମୀର ପୋଲିସ ଓ ସୁରକ୍ଷା ବାହିନୀ ଏକାଠି ହୋଇ ଅଞ୍ଚଳରେ ବ୍ୟାପକ ସର୍ଚ୍ଚ ଓ କମ୍ବିଂ ଅପରେସନ ଆରମ୍ଭ କରିଛନ୍ତି।
ତୀବ୍ର ଶୀତ ଓ କଠିନ ପାଗ ସତ୍ତ୍ୱେ ସୁରକ୍ଷା ବାହିନୀ ବରଫାବୃତ ପାହାଡ଼ିଆ ଅଞ୍ଚଳଗୁଡ଼ିକୁ ଘେରି ଆତଙ୍କବାଦ ବିରୋଧୀ ଅଭିଯାନ ଜାରି ରଖିଛନ୍ତି। ଗୁଇନ୍ଦା ସଂସ୍ଥାଗୁଡ଼ିକ ଆତଙ୍କବାଦୀଙ୍କ ଗତିବିଧି ସମ୍ପର୍କିତ ଗୁରୁତ୍ୱପୂର୍ଣ୍ଣ ସୂଚନା ସେନା ସହ ବାଣ୍ଟିଥିବାରୁ ଅପରେସନକୁ ଆଉ ତୀବ୍ର କରାଯାଇଛି।
ସେନା ସୂତ୍ର ଅନୁଯାୟୀ, ସାଧାରଣତଃ ଶୀତ ଋତୁରେ ଆତଙ୍କବାଦୀ ଘଟଣା କମ୍ ଥାଏ। କିନ୍ତୁ ଏଥର ଭାରତୀୟ ସେନା ତାହାର ରଣନୀତିରେ ପରିବର୍ତ୍ତନ କରି ଶୀତକାଳରେ ମଧ୍ୟ ଆତଙ୍କବାଦ ବିରୋଧୀ କାର୍ଯ୍ୟକଳାପକୁ ଜୋରଦାର କରିଛି। ଏହି ଅଭିଯାନରେ ସେନା ସହ ଜମ୍ମୁ–କାଶ୍ମୀର ପୋଲିସ ଓ ସିଆରପିଏଫ୍ର ଟିମ୍ମାନେ ସହଯୋଗ କରୁଛନ୍ତି।
ଗୁଇନ୍ଦା ସୂଚନା ଅନୁସାରେ, ଆତଙ୍କବାଦୀମାନେ ଡୋଡା ଓ କିସ୍ତୱାରର ଉଚ୍ଚତା ବିଶିଷ୍ଟ ଏବଂ ଦୁର୍ଗମ ପାହାଡ଼ିଆ ଅଞ୍ଚଳରେ ଲୁଚି ରହିଛନ୍ତି। ଏହାକୁ ଦୃଷ୍ଟିରେ ରଖି ଭାରତୀୟ ସେନାର ରାଷ୍ଟ୍ରୀୟ ରାଇଫଲ୍ସ (RR)ର ୟୁନିଟଗୁଡ଼ିକୁ ସେହି ଅଞ୍ଚଳରେ ନିୟୋଜିତ କରାଯାଇଛି। ଅପରେସନକୁ ସଫଳ କରିବା ପାଇଁ ଡ୍ରୋନ, ଥର୍ମାଲ୍ ଇମେଜିଂ ଉପକରଣ ଓ ଆଧୁନିକ ପ୍ରଯୁକ୍ତିର ବ୍ୟାପକ ବ୍ୟବହାର କରାଯାଉଛି।
ସୁରକ୍ଷା ବାହିନୀର କହିବା ଅନୁସାରେ, ଅଞ୍ଚଳକୁ ସମ୍ପୂର୍ଣ୍ଣ ଭାବେ ଆତଙ୍କମୁକ୍ତ କରିବା ପର୍ଯ୍ୟନ୍ତ ଏହି ଅଭିଯାନ ଚାଲୁ ରହିବ।