ନୂଆଦିଲ୍ଲୀ: ବିହାରରେ ଚାଲିଥିବା ସ୍ୱତନ୍ତ୍ର ଭୋଟର ତାଲିକା ସଂଶୋଧନ (SIR) ପ୍ରକ୍ରିୟା ମାମଲାରେ ସୁପ୍ରିମକୋର୍ଟ ସ୍ପଷ୍ଟ କରିଛି ଯେ ଆଧାର କାର୍ଡକୁ ନାଗରିକତ୍ୱର ପ୍ରମାଣ ଭାବରେ ଗ୍ରହଣ କରାଯାଇପାରିବ ନାହିଁ। ଏହାସହିତ, ନାଗରିକତ୍ୱ ନିର୍ଦ୍ଧାରଣର କ୍ଷମତା ନିର୍ବାଚନ କମିସନଙ୍କ ପାଖରେ ଅଛି କି ନାହିଁ, ସେଥି ପାଇଁ କୋର୍ଟ ତର୍ଜମା କରିବ।
ଶୁଣାଣି ବେଳେ ଜଷ୍ଟିସ ସୂର୍ଯ୍ୟକାନ୍ତ କହିଛନ୍ତି, ଭୋଟର ତାଲିକାରେ ନାମ ଯୋଗ କରିବା ଓ ବାହାର କରିବାର କ୍ଷମତା କମିସନଙ୍କ ପାଖରେ ଥିଲେ ମଧ୍ୟ, ଆଧାର କାର୍ଡକୁ ଏକମାତ୍ର ପ୍ରମାଣ ଭାବରେ ବ୍ୟବହାର କରିହେବନାହିଁ। ଆଧାର ଆଇନର ଧାରା ୯ ଅନୁଯାୟୀ, ଏହାର ସ୍ୱତନ୍ତ୍ର ଯାଞ୍ଚ ଆବଶ୍ୟକ।
ଆବେଦକଙ୍କ ପକ୍ଷରୁ ବରିଷ୍ଠ ଓକିଲ ଅଭିଷେକ ସିଂହଭୀ କହିଛନ୍ତି ଯେ, ନାଗରିକତ୍ୱ ନିର୍ଣ୍ଣୟର ଅଧିକାର କେବଳ କେନ୍ଦ୍ର ସରକାରଙ୍କ ସ୍ୱରାଷ୍ଟ୍ର ବିଭାଗରେ ଅଛି, ନିର୍ବାଚନ କମିସନଙ୍କ ପାଖରେ ନୁହେଁ। କପିଲ ସିବଲ ମଧ୍ୟ ଅଭିଯୋଗ କରିଛନ୍ତି ଯେ, ବିହାରରେ ବହୁ ଲୋକଙ୍କୁ ପ୍ରମାଣପତ୍ର ଅଭାବରୁ ତାଲିକାରୁ ବାହାର କରାଯାଉଛି, କେତେକ ଜୀବିତ ଲୋକଙ୍କୁ ମୃତ ଘୋଷଣା କରି ସେମାନଙ୍କ ନାମ କାଟାଯାଇଛି।
ନିର୍ବାଚନ କମିସନ ପକ୍ଷରୁ ଓକିଲ ରାକେଶ ଦ୍ବିବେଦୀ ମାନିଛନ୍ତି ଯେ, SIR ବେଳେ କିଛି ତ୍ରୁଟି ହୋଇଛି, କିନ୍ତୁ ଚୂଡାନ୍ତ ତାଲିକା ପ୍ରକାଶ ପୂର୍ବରୁ ତାହା ସଂଶୋଧନ ହେବ।
କୋର୍ଟ ସତର୍କ କରିଛି ଯେ, ଯଦି ଅନିୟମିତତା ପ୍ରମାଣିତ ହୁଏ, SIR ପ୍ରକ୍ରିୟାକୁ ବାତିଲ କରିଦିଆଯିବ। ଚଳିତ ବର୍ଷ ଶେଷରେ ବିହାର ବିଧାନସଭା ନିର୍ବାଚନ ହେବାକୁ ଥିବାବେଳେ, ୩୦ ସେପ୍ଟେମ୍ବର ପୂର୍ବରୁ ଚୂଡାନ୍ତ ତାଲିକା ପ୍ରକାଶ ପାଇବ।