କୋଲକାତା: ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲାରେ ‘ବାବ୍ରି ମସଜିଦ’ ନାମରେ ଏକ ମସଜିଦ ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ଏହାକୁ ନେଇ ନିଲମ୍ବିତ ତୃଣମୂଳ କଂଗ୍ରେସ ବିଧାୟକ ହୁମାୟୁନ କବୀର ୨୨ କିଲୋମିଟର ଦୈର୍ଘ୍ୟର ଏକ ଯାତ୍ରାର ନେତୃତ୍ୱ ନେଇଥିବା ଖବର ମିଳିଛି। ମସଜିଦ ନିର୍ମାଣ ଆରମ୍ଭ ସହିତ ଏହି ଯାତ୍ରା ଆୟୋଜନ କରାଯାଇଥିଲା।
ପ୍ରଥମେ ଏହି ରାଲି ନଦିଆ ଜିଲ୍ଲାର ପଲାଶୀରୁ ଆରମ୍ଭ ହୋଇ ଉତ୍ତର ଦିନାଜପୁରର ଇଟାହାର ପର୍ଯ୍ୟନ୍ତ ପ୍ରାୟ ୨୬୫ କିଲୋମିଟର ଯିବାର ଯୋଜନା ଥିଲା। ପରେ ପୁଲିସ ଅନୁମତି ନ ମିଳିବାରୁ ଏହାକୁ କମାଇ ୨୨ କିଲୋମିଟର କରାଯାଇଥିଲା। ସଂଶୋଧିତ କାର୍ଯ୍ୟସୂଚୀ ଅନୁଯାୟୀ ଯାତ୍ରା ପଲାଶୀରୁ ଆରମ୍ଭ ହୋଇ ମୁର୍ଶିଦାବାଦର ରେଜିନଗରରେ ଶେଷ ହୋଇଥିଲା।
ପୂର୍ବ ଯୋଜନା ଅନୁସାରେ ରାଲିରେ ପ୍ରାୟ ୧୦୦ଟି ଯାନ ଓ ୬୦୦ ଅଂଶଗ୍ରାହୀ ରହିବା କଥା ଥିଲା। କିନ୍ତୁ ଅନୁମତି ଅଭାବରୁ ଏହାକୁ ସରଳ ଶୋଭାଯାତ୍ରାର ରୂପ ଦିଆଯାଇଥିଲା। ପୁଲିସ ପକ୍ଷରୁ କୁହାଯାଇଛି ଯେ, ଦୀର୍ଘ ମାର୍ଗ ପାଇଁ ଆବଶ୍ୟକ ଆନୁଷ୍ଠାନିକ ଅନୁମତି ମିଳିନଥିଲା।
କବୀର କହିଛନ୍ତି ଯେ, ବେଲଡାଙ୍ଗାରେ ପ୍ରସ୍ତାବିତ ମସଜିଦ ନିର୍ମାଣକୁ ନେଇ କିଛି ଲୋକ ଭ୍ରାନ୍ତିକର ସୂଚନା ପ୍ରସାର କରୁଥିବାରୁ ଜନସଚେତନତା ପାଇଁ ଏହି ଯାତ୍ରା ଆୟୋଜନ କରାଯାଇଛି। ବୁଧବାର ସେ ନିଜେ ଉପସ୍ଥିତ ରହି ମସଜିଦ ନିର୍ମାଣ ପାଇଁ ପ୍ରଥମ ଇଟା ସ୍ଥାପନ କରିଥିଲେ।
ତାଙ୍କ ଅନୁସାରେ, ପ୍ରକଳ୍ପଟି ପୂରା କରିବାକୁ ପ୍ରାୟ ୩ ବର୍ଷ ସମୟ ଲାଗିବ ଓ ମୋଟ ଖର୍ଚ୍ଚ ପ୍ରାୟ ୫୫ କୋଟି ଟଙ୍କା ହେବ। ମସଜିଦର ପ୍ରବେଶ ଫାଟକ ୧୪ ମିଟର ଉଚ୍ଚ ଓ ୫ ମିଟର ଚଉଡ଼ା ହେବ ବୋଲି କୁହାଯାଇଛି। ଗତ ଡିସେମ୍ବର ୬ ତାରିଖରେ ଏହାର ଭିତ୍ତିପ୍ରସ୍ତର ସ୍ଥାପନ ହୋଇଥିଲା।
ଉଲ୍ଲେଖଯୋଗ୍ୟ, ଭିତ୍ତିପ୍ରସ୍ତର କାର୍ଯ୍ୟକ୍ରମ ପୂର୍ବରୁ ହୁମାୟୁନ କବୀରଙ୍କୁ ତୃଣମୂଳ କଂଗ୍ରେସରୁ ନିଲମ୍ବିତ କରାଯାଇଥିଲା। ପରେ ସେ ନିଜର ନୂଆ ରାଜନୈତିକ ଦଳ ଗଠନ କରି ଆଗାମୀ ବିଧାନସଭା ନିର୍ବାଚନ ପାଇଁ ବିକଳ୍ପ ମେଣ୍ଟ ଗଠନର ଆହ୍ୱାନ ଦେଇଛନ୍ତି।