ନୂଆଦିଲ୍ଲୀ: ଭାରତରେ ଶିଶୁ ଜନସଂଖ୍ୟା ଦ୍ରୁତ ହ୍ରାସ ପାଉଛି। ଉନ୍ନତ ପରିବାର ଯୋଜନା ଓ ହ୍ରାସ ପ୍ରଜନନ ହାର ଯୋଗୁ ଆଗାମୀ କିଛି ବର୍ଷରେ ଦେଶରେ ପିଲାମାନଙ୍କ ସଂଖ୍ୟା ଅନେକ କମିଯିବ ବୋଲି ଏକ ସରକାରୀ ରିପୋର୍ଟ ଜଣାଇଛି।
ପରିସଂଖ୍ୟାନ ଓ କାର୍ଯ୍ୟକ୍ରମ କାର୍ଯ୍ୟାନ୍ୱୟନ ମନ୍ତ୍ରଣାଳୟଙ୍କ ନବୀନତମ ରିପୋର୍ଟ “ଭାରତରେ ଶିଶୁ ୨୦୨୫” ଅନୁସାରେ, ୨୦୧୧ରେ ମୋଟ ଜନସଂଖ୍ୟାରେ ୦-୧୯ ବର୍ଷ ଯାୟୋଜ୍ଞାର ଶିଶୁମାନଙ୍କ ଅଂଶ ୪୦.୯ ପ୍ରତିଶତ ଥିଲା। କିନ୍ତୁ ୨୦୨୬ ସୁଦ୍ଧା ଏହି ଅଂଶ ୩୨ ପ୍ରତିଶତକୁ ହ୍ରାସ ପାଇବ ବୋଲି ଆକଳନ କରାଯାଇଛି।
ରିପୋର୍ଟରେ କୁହାଯାଇଛି ଯେ ୦-୪, ୫-୯, ୧୦-୧୪ ଓ ୧୫-୧୯ ବର୍ଷର ସମସ୍ତ ଶିଶୁ ବୟସ ଗୋଷ୍ଠୀରେ ଜନସଂଖ୍ୟାର ଅଂଶ କମୁଛି। ଜାତୀୟ ସ୍ତରରେ ଜନ୍ମହାର ପ୍ରତି ୧,୦୦୦ ଜନସଂଖ୍ୟାରେ ୧୮.୪ ରହିଛି, ଯେଉଁଥିରେ ଗ୍ରାମାଞ୍ଚଳରେ ଏହା ୨୦.୩ ଓ ସହରାଞ୍ଚଳରେ ୧୪.୯ ରହିଛି।
ମନ୍ତ୍ରଣାଳୟ ଏହି ହ୍ରାସକୁ ଭାରତର ଜନସଂଖ୍ୟାରେ ହୋଇଥିବା ଗୁରୁତ୍ୱପୂର୍ଣ୍ଣ ପରିବର୍ତ୍ତନ ବୋଲି ବ୍ୟାଖ୍ୟା କରିଛି। ଏହା ଉତ୍ତମ ପରିବାର ନିୟୋଜନ ଏବଂ ନାଗରିକମାନଙ୍କ ମଧ୍ୟରେ ବଢ଼ୁଥିବା ଜାଗୃକତାର ଫଳ ବୋଲି ମନ୍ତ୍ରଣାଳୟ କହିଛି।
ରିପୋର୍ଟରେ ଶିଶୁ କଲ୍ୟାଣ ସମ୍ପର୍କିତ ଅନେକ ଧନାତ୍ମକ ପରିବର୍ତ୍ତନ ମଧ୍ୟ ଉଲ୍ଲେଖ ହୋଇଛି। ଶିଶୁ ମୃତ୍ୟୁ ହାର ୨୦୧୧ରେ ୪୪ ରୁ ୨୦୨୩ରେ ୨୫କୁ ହ୍ରାସ ପାଇଛି। ସ୍କୁଲ ଛାଡ଼ିବା ହାର ୨୦୨୨-୨୩ରେ ୧୩.୮ ରୁ ୨୦୨୪-୨୫ରେ ୮.୨କୁ କମିଛି।
ସେହିପରି, ୧୮ ବର୍ଷ ପୂର୍ବରୁ ବିବାହ କରୁଥିବା ମହିଳାଙ୍କ ପ୍ରତିଶତ ୨୦୧୫-୧୬ରେ ୨୬.୮ ରୁ ୨୦୧୯-୨୧ରେ ୨୩.୩ ହୋଇଛି। ଅନ୍ୟପକ୍ଷରେ, ଦେଶରେ ଶିଶୁ ଦତକ ଗ୍ରହଣ ହାର ୨୦୧୭-୧୮ର ୩୯୨୭ ରୁ ୨୦୨୪-୨୫ରେ ୪୫୧୫କୁ ବଢ଼ିଛି।
ମନ୍ତ୍ରଣାଳୟ ଅନୁସାରେ, ଏହି ରିପୋର୍ଟ ଶିକ୍ଷା, ସ୍ୱାସ୍ଥ୍ୟ, ପୁଷ୍ଟି, ଶିଶୁ ସୁରକ୍ଷା ଓ ଅଧିକାର ଦିଗରେ ଦେଶର ପିଲାମାନଙ୍କ ସ୍ଥିତି ବିଷୟରେ ଏକ ବିସ୍ତୃତ ଚିତ୍ର ପ୍ରଦାନ କରିଛି, ଯାହା ଆଗାମୀ ନୀତି ଗଠନ ଓ ହସ୍ତକ୍ଷେପ ପାଇଁ ଗୁରୁତ୍ୱପୂର୍ଣ୍ଣ ଭାବେ ପ୍ରୟୋଗ ହେବ।