ନୂଆଦିଲ୍ଲୀ: ରାଜଧାନୀ ଦିଲ୍ଲୀ ପୁନିଥରେ ବିସ୍ଫୋରଣରେ କମ୍ପିଉଠିଛି। ଲାଲକିଲ୍ଲା ମେଟ୍ରୋ ଷ୍ଟେସନ ନିକଟରେ ଘଟିଥିବା ଭୟାନକ ବିସ୍ଫୋରଣରେ ଏପର୍ଯ୍ୟନ୍ତ ୧୦ ଜଣଙ୍କ ମୃତ୍ୟୁ ଓ ଅନେକ ଆହତ ହୋଇଛନ୍ତି। ମୃତ୍ୟୁ ସଂଖ୍ୟା ଆଉ ବଢ଼ିପାରେ ବୋଲି ଆଶଙ୍କା କରାଯାଉଛି।
ଘଟଣା ପରେ ଦିଲ୍ଲୀ, ମୁମ୍ବାଇ, ହରିୟାଣା, ଉତ୍ତରପ୍ରଦେଶ ଏବଂ ଓଡ଼ିଶାରେ ହାଇ ଆଲର୍ଟ ଘୋଷିତ ହୋଇଛି। ରାଜଧାନୀର ମନ୍ଦିର, ବଜାର ଓ ପ୍ରମୁଖ ସାର୍ବଜନିକ ସ୍ଥାନଗୁଡ଼ିକରେ ସୁରକ୍ଷା ବୃଦ୍ଧି କରାଯାଇଛି।
ଏହି ବିସ୍ଫୋରଣ ପରେ ପୁନିଥରେ ପ୍ରଶ୍ନ ଉଠିଛି – କାହିଁକି ଦିଲ୍ଲୀ ପୁନିପୁନି ଆତଙ୍କବାଦୀ ଆକ୍ରମଣର ଲକ୍ଷ୍ୟ ହେଉଛି? ଇତିହାସ ଦେଖାଉଛି ଯେ ଗତ ଦୁଇ ଦଶକ ଧରି ଦିଲ୍ଲୀ ଅନେକ ମାରଣାନ୍ତକ ବିସ୍ଫୋରଣ ଦେଖିଛି।
🔴 ପୂର୍ବରୁ ଦିଲ୍ଲୀରେ ହୋଇଥିବା ବିସ୍ଫୋରଣ ଘଟଣାଗୁଡ଼ିକ
୨୯ ଅକ୍ଟୋବର ୨୦୦୫: ନୂଆଦିଲ୍ଲୀ ରେଳଷ୍ଟେସନ, ଗୋବିନ୍ଦପୁରୀ ଓ ସରୋଜିନୀ ମାର୍କେଟରେ ତିନୋଟି ବୋମା ବିସ୍ଫୋରଣ — ୬୨ ମୃତ, ୨୧୦ ଆହତ।
୧୪ ଏପ୍ରିଲ୍ ୨୦୦୬: ଜାମା ମସଜିଦ ଭିତରେ ଦୁଇଟି ବିସ୍ଫୋରଣ — ୧୪ ଆହତ।
୧୩ ସେପ୍ଟେମ୍ବର ୨୦୦୮: ଦିଲ୍ଲୀରେ ପାଞ୍ଚଟି ସମନ୍ୱିତ ବୋମା ବିସ୍ଫୋରଣ — ୨୫ ମୃତ, ୧୦୦ ରୁ ଅଧିକ ଆହତ।
୨୭ ସେପ୍ଟେମ୍ବର ୨୦୦୮: ମେହରୌଲି ଫୁଲ ବଜାରରେ ବିସ୍ଫୋରଣ — ୪ ମୃତ, ୧୫ ଆହତ।
୧୯ ସେପ୍ଟେମ୍ବର ୨୦୧୦: ଜାମା ମସଜିଦରେ ଗୁଳିଚାଳନା ଓ ବୋମା ବିସ୍ଫୋରଣ — ୨ ଆହତ।
୭ ସେପ୍ଟେମ୍ବର ୨୦୧୧: ଦିଲ୍ଲୀ ହାଇକୋର୍ଟରେ ବୋମା ବିସ୍ଫୋରଣ — ୧୧ ମୃତ, ୬୪ ଆହତ।
୧୦ ନଭେମ୍ବର ୨୦୨୫: ଏବେ ପୁନି ଲାଲକିଲ୍ଲା ନିକଟରେ ଘଟିଥିବା ବିସ୍ଫୋରଣ ସମଗ୍ର ଦେଶକୁ ଅଚମ୍ଭିତ କରିଦେଇଛି। ଘଟଣାସ୍ଥଳରେ ଅନେକ ଯାନବାହନ ଓ ଦୋକାନ ଭୟାନକ ଭାବରେ କ୍ଷତିଗ୍ରସ୍ତ ହୋଇଛି।
ସୁରକ୍ଷା ଏଜେନ୍ସିମାନେ ଘଟଣାର ତଦନ୍ତ ଆରମ୍ଭ କରିଛନ୍ତି ଓ ବିସ୍ଫୋରଣ ପଛରେ କାହା ହାତ ରହିଛି ବୋଲି ଖୋଜା ଚାଲିଛି।
ଦେଶ ଆଉଥରେ ପ୍ରଶ୍ନ କରୁଛି — “ଦିଲ୍ଲୀ କେବେ ସୁରକ୍ଷିତ ହେବ?”