ନୂଆଦିଲ୍ଲୀ: ୨୦୨୬ ମସିହାର ୭୭ତମ ଗଣତନ୍ତ୍ର ଦିବସ ପାଳନକୁ ନିରାପଦ କରିବା ଲକ୍ଷ୍ୟରେ ନୂଆଦିଲ୍ଲୀ ପୁଲିସ ଓ ବିଭିନ୍ନ କେନ୍ଦ୍ରୀୟ ସୁରକ୍ଷା ଏଜେନ୍ସି ମିଶି ରାଜଧାନୀକୁ ପ୍ରାୟ ଏକ ଅଭେଦ୍ୟ ଦୁର୍ଗରେ ପରିଣତ କରିଛନ୍ତି। ଆତଙ୍କବାଦୀ ବିପଦ ସମ୍ପର୍କିତ ଗୁପ୍ତ ସୂଚନା ପରେ କର୍ତ୍ତବ୍ୟ ପଥ ଏବଂ ଏହାର ଆସପାସ ଅଞ୍ଚଳରେ ବହୁସ୍ତରୀୟ ସୁରକ୍ଷା ବ୍ୟବସ୍ଥା ଗଢ଼ି ତୋଳାଯାଇଛି।
ସୁରକ୍ଷା ବ୍ୟବସ୍ଥାରେ ଏଥର ଆଧୁନିକ ପ୍ରଯୁକ୍ତିକୁ ମୁଖ୍ୟ ଆଧାର କରାଯାଇଛି। କୃତ୍ରିମ ବୁଦ୍ଧିମତ୍ତା (AI) ସହାୟତାରେ କାର୍ଯ୍ୟ କରୁଥିବା କ୍ୟାମେରା ଓ ସ୍ମାର୍ଟ ଉପକରଣ ମାଧ୍ୟମରେ ସନ୍ଦିଗ୍ଧ ବ୍ୟକ୍ତି ଓ କାର୍ଯ୍ୟକଳାପ ଉପରେ ନିରନ୍ତର ନଜର ରଖାଯିବ। ଦିଲ୍ଲୀ ପୁଲିସ ଓ କେନ୍ଦ୍ରୀୟ ଗୋୟେନ୍ଦା ଏଜେନ୍ସିମାନଙ୍କ ପାଖକୁ ମିଳିଥିବା ସୂଚନା ଅନୁଯାୟୀ, ଗଣତନ୍ତ୍ର ଦିବସ ପରେଡକୁ ବାଧା ଦେବା ପାଇଁ ଷଡ଼ଯନ୍ତ୍ର ହୋଇପାରେ।
ଅତିରିକ୍ତ ପୁଲିସ କମିସନର ଦେବେଶ ମାହାଲା କହିଛନ୍ତି ଯେ, ଏଥର କେବଳ ଖାଲିସ୍ତାନୀ ଆତଙ୍କବାଦୀ ଗୋଷ୍ଠୀ ନୁହେଁ, କିଛି ବାଂଲାଦେଶୀ ସଂଗଠନ ମଧ୍ୟ ବିଶୃଙ୍ଖଳା ସୃଷ୍ଟି କରିବା ଯୋଜନା କରୁଥିବା ସୂଚନା ମିଳିଛି। ଏହି କାରଣରୁ କର୍ତ୍ତବ୍ୟ ପଥ ସମଗ୍ର ରୁଟକୁ ୨୬ଟି ସୁରକ୍ଷା ଜୋନରେ ବିଭକ୍ତ କରାଯାଇଛି ଏବଂ ପ୍ରତ୍ୟେକ ଜୋନର ଦାୟିତ୍ୱ ଡିସିପି ସ୍ତରୀୟ ଅଧିକାରୀଙ୍କୁ ଦିଆଯାଇଛି।
AI ଚଷମା ଓ ହଜାରେ HD କ୍ୟାମେରାରେ ନଜରଦାରି
ଏଥର ସୁରକ୍ଷାର ସବୁଠାରୁ ବଡ଼ ନୂତନତା ହେଉଛି AI ଭିତ୍ତିକ ପ୍ରଣାଳୀର ବ୍ୟବହାର। ମାଇଦାନରେ ନିୟୋଜିତ ପୁଲିସ କର୍ମଚାରୀମାନଙ୍କୁ AI-ସକ୍ଷମ ସ୍ମାର୍ଟ ଚଷମା ଦିଆଯାଇଛି, ଯାହା ସନ୍ଦିଗ୍ଧ ମୁହଁ ଚିହ୍ନଟ କରି ତୁରନ୍ତ ସତର୍କ ସଙ୍କେତ ଦେବ। ପରେଡ ରୁଟରେ ୧,୦୦୦ରୁ ଅଧିକ ହାଇ-ଡେଫିନେସନ (HD) କ୍ୟାମେରା ସ୍ଥାପନ କରାଯାଇଛି। ଏହି କ୍ୟାମେରାଗୁଡ଼ିକୁ ମୁଖ ଚିହ୍ନଟ ପ୍ରଣାଳୀ (FRS) ସହ ଯୋଡ଼ାଯାଇଛି, ଯାହାରେ ଜଣାଶୁଣା ଆତଙ୍କବାଦୀ ଓ ସନ୍ଦିଗ୍ଧ ରେକର୍ଡ ଥିବା ବ୍ୟକ୍ତିଙ୍କ ତଥ୍ୟ ଅପଲୋଡ୍ କରାଯାଇଛି।
୧୦,୦୦୦ ଯବାନ ସହ ବହୁସ୍ତରୀୟ ସୁରକ୍ଷା
ଗଣତନ୍ତ୍ର ଦିବସ ଉତ୍ସବ ସମୟରେ ନୂଆଦିଲ୍ଲୀ ଜିଲ୍ଲାରେ ପ୍ରାୟ ୧୦,୦୦୦ ପୁଲିସ କର୍ମଚାରୀ ଓ ବଡ଼ ପରିମାଣରେ ଅର୍ଦ୍ଧସାମରିକ ବାହିନୀ ମୁତୟନ କରାଯାଇଛି। ତିନି-ସ୍ତରୀୟ ଶାରୀରିକ ଯାଞ୍ଚ୍, ଯାନବାହାନର ସମ୍ପୂର୍ଣ୍ଣ ତଲାସୀ ଏବଂ ଡ୍ରୋନ୍ ପ୍ରତିରୋଧୀ ୟୁନିଟ୍ ସକ୍ରିୟ କରାଯାଇଛି। ଉଚ୍ଚ କୋଠାଗୁଡ଼ିକ ଉପରେ ସ୍ନାଇପର ଦଳ ମଧ୍ୟ ନିୟୋଜିତ ରହିବେ। ଏହା ସହ ହୋଟେଲ, ଗେଷ୍ଟ ହାଉସ୍ ଓ ଭଡାଟିଆଙ୍କ ଯାଞ୍ଚକୁ ମଧ୍ୟ କଠୋର କରାଯାଇଛି।
ଅତିଥି ସୁବିଧା ପାଇଁ ନୂତନ ବ୍ୟବସ୍ଥା
ଏଥର ପରେଡ ଏନକ୍ଲୋଜରଗୁଡ଼ିକୁ ଭାରତୀୟ ନଦୀମାନଙ୍କ ନାମରେ ନାମିତ କରାଯାଇଛି। ଅତିଥିମାନଙ୍କୁ ଦୁଇଟି ଗୋଷ୍ଠୀରେ ବିଭକ୍ତ କରି ନିର୍ଦ୍ଦିଷ୍ଟ ମେଟ୍ରୋ ଷ୍ଟେସନରେ ଓହ୍ଲାଇବା ପାଇଁ ପରାମର୍ଶ ଦିଆଯାଇଛି। ସ୍ୱତନ୍ତ୍ର ନିମନ୍ତ୍ରିତ ବ୍ୟକ୍ତିମାନଙ୍କୁ ଦିଲ୍ଲୀ ମେଟ୍ରୋରେ ମାଗଣା ଯାତ୍ରା ପାଇଁ ଡିଜିଟାଲ୍ ପାସ୍ ମଧ୍ୟ ପ୍ରଦାନ କରାଯାଇଛି।
ନାଗରିକଙ୍କୁ ପୁଲିସର ଅନୁରୋଧ
ସୁରକ୍ଷା ଦୃଷ୍ଟିରୁ ଏନକ୍ଲୋଜର ଭିତରକୁ ବ୍ୟାଗ, ଖାଦ୍ୟ ସାମଗ୍ରୀ, ମୋବାଇଲ୍ ଫୋନ୍, ଇଲେକ୍ଟ୍ରୋନିକ୍ ଗ୍ୟାଜେଟ୍, ପାଣି ବୋତଲ, ଛତା ଓ ଜ୍ୱଳନଶୀଳ ବସ୍ତୁ ନେବାକୁ କଡାକଡି ବାରଣ କରାଯାଇଛି। ଦିଲ୍ଲୀ ପୁଲିସ ନାଗରିକ ଓ ଅତିଥିମାନଙ୍କୁ ସୁରକ୍ଷା କର୍ମୀଙ୍କ ସହଯୋଗ କରିବା ସହ କୌଣସି ସନ୍ଦିଗ୍ଧ କାର୍ଯ୍ୟକଳାପ ଦେଖିଲେ ତୁରନ୍ତ ୧୧୨କୁ ଫୋନ୍ କରିବାକୁ ଅନୁରୋଧ କରିଛି।