ନୂଆଦିଲ୍ଲୀ: ଭାରତ–ଆମେରିକା ମଧ୍ୟରେ ଅନ୍ତରୀଣ ବାଣିଜ୍ୟ ରାଜିନାମା ଢାଞ୍ଚା ସମ୍ପର୍କିତ ମିଳିତ ବିବୃତି ପରେ ଦେଶର ପ୍ରମୁଖ ତେଲ କମ୍ପାନିମାନେ ରୁଷ୍ରୁ କ୍ରୁଡ଼ ଓଇଲ୍ କ୍ରୟରେ ସାବଧାନ ଭାବନା ଅପନାଇଛନ୍ତି। ସୂଚନା ଅନୁସାରେ କିଛି ଭାରତୀୟ କମ୍ପାନି ନିକଟତମ ମାସଗୁଡ଼ିକ ପାଇଁ ରୁଷୀୟ ତେଲ କିଣିବା ପ୍ରସ୍ତାବକୁ ଗ୍ରହଣ କରିନାହାନ୍ତି।
ରିପୋର୍ଟ ଅନୁଯାୟୀ, ଇଣ୍ଡିଆନ୍ ଅଏଲ୍, ଭାରତ ପେଟ୍ରୋଲିୟମ ଓ ରିଲାଏନ୍ସ ଇଣ୍ଡଷ୍ଟ୍ରିଜ୍ଙ୍କ ପାଖକୁ ବ୍ୟବସାୟୀମାନେ ଦେଇଥିବା ରୁଷ୍ ତେଲ ଯୋଗାଣ ପ୍ରସ୍ତାବ ମାର୍ଚ୍ଚ ଓ ଏପ୍ରିଲ ପାଇଁ ମନ୍ଜୁର ହୋଇନାହିଁ। ଏହି ସୂଚନା ଜଣେ ଆନ୍ତର୍ଜାତୀୟ ବ୍ୟବସାୟୀଙ୍କ ଉଦ୍ଧୃତି ଦେଇ ପ୍ରକାଶ ପାଇଛି।
ଏପଟେ ଘରୋଇ କମ୍ପାନି ନାୟରା ଏନର୍ଜି ପ୍ରାୟତଃ ରୁଷ୍ ତେଲ ଉପରେ ନିର୍ଭର କରେ। କମ୍ପାନିରେ ରୁଷୀୟ ସଂସ୍ଥା ରୋଜନେଫ୍ଟର ପ୍ରାୟ ୫୦ ପ୍ରତିଶତ ଅଂଶୀଦାରିତ୍ୱ ରହିଛି। ନାୟରା ପ୍ରତିଦିନ ପ୍ରାୟ ୪ ଲକ୍ଷ ବ୍ୟାରେଲ୍ ତେଲ ଶୋଧନ କରେ। କିନ୍ତୁ ରକ୍ଷଣାବେକ୍ଷଣ କାମ ପାଇଁ ଏହାର ଶୋଧନାଗାର ପ୍ରାୟ ଏକ ମାସ ବନ୍ଦ ରହିବାକୁ ଥିବାରୁ ଏପ୍ରିଲ ମାସରେ ତେଲ ଆମଦାନି ଯୋଜନା ନାହିଁ ବୋଲି ସୂତ୍ର ଜଣାଇଛି।
ଭାରତ ବିଶ୍ୱର ତୃତୀୟ ସର୍ବାଧିକ ତେଲ ବ୍ୟବହାରକାରୀ ଓ ଆମଦାନିକାରୀ ଦେଶ। ଗତ କିଛି ମାସ ଧରି ରୁଷ୍ରୁ ତେଲ ଆମଦାନି ପରିମାଣ କମିଥିବା ବେଳେ ମଧ୍ୟପ୍ରାଚ୍ୟ, ଆଫ୍ରିକା ଓ ଦକ୍ଷିଣ ଆମେରିକାର ଦେଶଗୁଡ଼ିକରୁ ଅଧିକ କ୍ରୟ ହେଉଛି।
ଉଲ୍ଲେଖନୀୟ, ରୁଷ–ୟୁକ୍ରେନ୍ ସଂଘର୍ଷ ପରଠାରୁ ଭାରତ ରିହାତି ଦରରେ ରୁଷ୍ରୁ ବ୍ୟାପକ ତେଲ କିଣୁଥିଲା। ଏହାକୁ ନେଇ ପଶ୍ଚିମାଞ୍ଚଳର କିଛି ଦେଶ ଆପତ୍ତି ଉଠାଇଥିଲେ। ବର୍ତ୍ତମାନ ବାଣିଜ୍ୟ ଓ କୂଟନୀତିକ ପରିସ୍ଥିତି ପରିବର୍ତ୍ତନ ସହିତ ଭାରତୀୟ କମ୍ପାନିମାନେ ଆମଦାନି ଉତ୍ସ ବିବିଧୀକରଣ ଦିଗରେ ଗତି କରୁଛନ୍ତି।