ନୂଆଦିଲ୍ଲୀ: ନୂଆବର୍ଷ ଆରମ୍ଭ ସତ୍ତ୍ୱେ ଭାରତୀୟ ଷ୍ଟକ୍ ବଜାରରେ କୌଣସି ବଡ଼ ପରିବର୍ତ୍ତନ ଦେଖିବାକୁ ମିଳିନାହିଁ। ଗତବର୍ଷ ଭଳି ଏବେ ମଧ୍ୟ ବିଶ୍ୱ ଅର୍ଥନୈତିକ ପରିସ୍ଥିତି, ଟ୍ରମ୍ପଙ୍କ ଶୁଳ୍କ ସମ୍ବନ୍ଧୀୟ ଧମକ, ରୁଷ–ୟୁକ୍ରେନ ଯୁଦ୍ଧ, ଉଚ୍ଚ ମୁଦ୍ରାସ୍ଫୀତି ଓ ବଢ଼ିଥିବା ସୁଧ ହାର ବଜାରକୁ ଅସ୍ଥିର କରିରଖିଛି।
ଏହି ସବୁ ଅନିଶ୍ଚିତତା ସତ୍ତ୍ୱେ ଭାରତୀୟ ଷ୍ଟକ୍ ବଜାର ପୁଣିଥରେ ନିବେଶକମାନଙ୍କୁ ଆକର୍ଷିତ କରୁଛି। କିଛି ନିବେଶକ ଅଧିକ ଲାଭର ଆଶାରେ ବ୍ୟକ୍ତିଗତ ଋଣ ନେଇ ଷ୍ଟକ୍ ବଜାରରେ ଟଙ୍କା ଲଗାଇବାକୁ ଚିନ୍ତା କରୁଛନ୍ତି। ତେବେ ବିଶେଷଜ୍ଞମାନେ କହୁଛନ୍ତି, ଏହା ଏକ ଉଚ୍ଚ ବିପଦପୂର୍ଣ୍ଣ ରଣନୀତି ଓ ଏହାକୁ ହାଲୁକାଭାବେ ନେବା ଉଚିତ ନୁହେଁ।
ଲିଭରେଜର ଆକର୍ଷଣ
ଷ୍ଟକ୍ ବଜାରରେ ଋଣ ନେଇ ନିବେଶ କରିବାକୁ ‘ଲିଭରେଜିଂ’ ବୋଲି କୁହାଯାଏ। ସରଳ ଭାଷାରେ, ଅନ୍ୟଙ୍କ ଟଙ୍କା ଉଧାର କରି ଉଚ୍ଚ ଲାଭ ଆଶାରେ ଅସ୍ଥିର ଓ ବିପଦପୂର୍ଣ୍ଣ ଇକ୍ୱିଟି ବଜାରରେ ନିବେଶ କରିବାକୁ ଏହି ପଦ୍ଧତି କୁହାଯାଏ। ବ୍ୟକ୍ତିଗତ ଋଣରେ ସାଧାରଣତଃ ଟଙ୍କା ବ୍ୟବହାର ଉପରେ କୌଣସି କଢ଼ା ନିୟମ ନଥାଏ, ଯାହା ନିବେଶକଙ୍କୁ ଷ୍ଟକ୍ ବଜାରରେ ନିବେଶ କରିବା ସୁଯୋଗ ଦେଇଥାଏ।
ଏହି ଋଣଗୁଡ଼ିକ ଅସୁରକ୍ଷିତ ହେବାରୁ ବନ୍ଧକ ହରାଇବାର ଭୟ ନଥାଏ, କିନ୍ତୁ ଏହା ଅନୁଭବହୀନ ନିବେଶକଙ୍କ ପାଇଁ ଅପବ୍ୟବହାରର ଆଶଙ୍କାକୁ ବଢ଼ାଇଦେଇଥାଏ। ବିଶେଷକରି ଅଳ୍ପ ଜ୍ଞାନ ଥିବା ଲୋକେ ଏଭଳି ପାଣ୍ଠିକୁ ଆବେଗରେ ଟ୍ରେଡିଂ କିମ୍ବା ଉଚ୍ଚ ବିପଦପୂର୍ଣ୍ଣ ଷ୍ଟକ୍ରେ ଲଗାଇ ଦିଅନ୍ତି।
ବିପଦ ଓ ସତର୍କତା
ବଜାରରେ ଉଚ୍ଚ ରିଟର୍ଣ୍ଣର ସମ୍ଭାବନା ଥିଲେ ମଧ୍ୟ, ଋଣ ନେଇ ନିବେଶ କରିବା କ୍ଷତିକାରକ ହୋଇପାରେ। ଷ୍ଟକ୍ ବଜାର ସ୍ୱଭାବତଃ ଅସ୍ଥିର ଏବଂ ରିଟର୍ଣ୍ଣର କୌଣସି ନିଶ୍ଚିତତା ନଥାଏ। ଯଦି ନିବେଶ ଆଶାଅନୁରୂପ ଲାଭ ଦେଇନାହିଁ, ତେବେ ନିବେଶକଙ୍କୁ କ୍ଷତି ସହିତ ସୁଧ ଓ ମାସିକ କିଷ୍ତି ଚୁକାଇବାକୁ ପଡ଼ିଥାଏ।
ଏହା ସହିତ ବ୍ୟକ୍ତିଗତ ଋଣର ସୁଧ ହାର ସାଧାରଣତଃ ଉଚ୍ଚ ଥାଏ, ବିଶେଷକରି କମ୍ କ୍ରେଡିଟ୍ ସ୍କୋର ଥିବା ଲୋକଙ୍କ ପାଇଁ। ଏହା ଲାଭକୁ ଅଧିକ ହ୍ରାସ କରିଦେଇପାରେ।
ଉଦାହରଣରେ ବୁଝନ୍ତୁ
ଧରାଯାଉ, ଜଣେ ନିବେଶକ ୧୫ ପ୍ରତିଶତ ବାର୍ଷିକ ସୁଧ ହାରରେ ଋଣ ନେଇଛନ୍ତି ଏବଂ ଷ୍ଟକ୍ ବଜାରରୁ ଅଧିକ ଲାଭ ଆଶା କରୁଛନ୍ତି। କିନ୍ତୁ ହଠାତ୍ ଯୁଦ୍ଧ, ମହାମାରୀ କିମ୍ବା ଅନ୍ୟ କୌଣସି ଅପ୍ରତ୍ୟାଶିତ ଘଟଣା ଯୋଗୁଁ ବିଶ୍ୱ ବଜାର ମାନ୍ଦାବସ୍ଥାରେ ପଡ଼ିଗଲା। ଏପରି ସ୍ଥିତିରେ ଷ୍ଟକ୍ର ମୂଲ୍ୟ କମିଯିବା ସହ ନିବେଶକଙ୍କ ଉପରେ ଋଣ ପରିଶୋଧ, ସୁଧ ଓ ଲୁଚିଥିବା ଖର୍ଚ୍ଚର ଚାପ ବଢ଼ିଯାଏ।
ସେହିପରି, ବିଶେଷଜ୍ଞମାନଙ୍କ ମତରେ ଷ୍ଟକ୍ ବଜାରରେ ନିବେଶ ପାଇଁ ଋଣ ନେବା ପୂର୍ବରୁ ନିଜ ଆର୍ଥିକ ସ୍ଥିତି, ବିପଦ ବହନ କ୍ଷମତା ଏବଂ ବଜାର ଅନିଶ୍ଚିତତାକୁ ଭଲଭାବେ ବିଚାର କରିବା ଅତ୍ୟନ୍ତ ଆବଶ୍ୟକ।