ଇସ୍ରାଏଲୀ ଏୟାର୍ ଷ୍ଟ୍ରାଇକ୍ରେ ୧୭୫ ଶିଶୁଙ୍କ ମୃତ୍ୟୁ ଅଭିଯୋଗ; ‘ଜାଣିଶୁଣି ସ୍କୁଲକୁ ଟାର୍ଗେଟ କରାଯାଇନି’ ବୋଲି କହିଲେ ମାର୍କୋ ରୁବିଓ
ତେହେରାନ: ଇରାନର ଦକ୍ଷିଣ ଅଞ୍ଚଳରେ ଘଟିଥିବା ଏକ ଏୟାର୍ ଷ୍ଟ୍ରାଇକ୍କୁ କେନ୍ଦ୍ର କରି ଆନ୍ତର୍ଜାତୀୟ ମଞ୍ଚରେ ତୀବ୍ର ପ୍ରତିକ୍ରିୟା ଦେଖାଦେଇଛି। ଇରାନ ସରକାରଙ୍କ ଅଭିଯୋଗ ଅନୁସାରେ, ମିନାବ ସହରର ଏକ ବାଳିକା ପ୍ରାଥମିକ ବିଦ୍ୟାଳୟ ଉପରେ ହୋଇଥିବା ଆକ୍ରମଣରେ ୧୭୫ ଜଣ ଶିଶୁଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ସମଗ୍ର ଦେଶରେ ଶୋକ ଓ କ୍ରୋଧର ପରିସ୍ଥିତି ସୃଷ୍ଟି ହୋଇଛି।
ଇରାନର ସରକାରୀ ସମ୍ବାଦ ମାଧ୍ୟମ ଦ୍ୱାରା ପ୍ରକାଶିତ ଭିଡିଓରେ ହଜାର ହଜାର ଲୋକ ଶବଯାତ୍ରାରେ ଯୋଗଦେଇଥିବା ଦେଖାଯାଇଛି। ଅନେକ ଲୋକ ହାତରେ Ayatollah Ali Khameneiଙ୍କ ଛବି ଧରିଥିବା ସହ ଇରାନୀ ପତାକା ନେଇ ଶୋକ ପ୍ରକାଶ କରୁଥିଲେ। ମୃତ ଶିଶୁମାନଙ୍କ ଅନ୍ତିମ ସଂସ୍କାର ମଙ୍ଗଳବାର ଦିନ ସମ୍ପନ୍ନ ହୋଇଥିବା ସୂଚନା ମିଳିଛି।
ଇରାନର ବୈଦେଶିକ ମନ୍ତ୍ରୀ Seyed Abbas Araghchi ଏହି ଆକ୍ରମଣକୁ କଠୋର ଭାବରେ ନିନ୍ଦା କରି ସୋସିଆଲ ମିଡିଆରେ ପୋଷ୍ଟ କରିଛନ୍ତି ଯେ, ନିର୍ଦ୍ଦୋଷ ଶିଶୁମାନଙ୍କ ପାଇଁ ଗଣକବର ଖୋଳାଯାଉଛି। ସେ ଏହାକୁ ଅମାନବିକ ଘଟଣା ବୋଲି ବର୍ଣ୍ଣନା କରିଛନ୍ତି ଏବଂ ଏହା ପାଇଁ ଆମେରିକା-ଇସ୍ରାଏଲକୁ ଦାୟୀ କରିଛନ୍ତି।
ଏହି ଘଟଣା ସମ୍ପର୍କରେ ପ୍ରତିକ୍ରିୟା ଦେଇ Marco Rubio କହିଛନ୍ତି ଯେ, ଯୁକ୍ତରାଷ୍ଟ୍ର କେବେ ଜାଣିଶୁଣି କୌଣସି ସ୍କୁଲକୁ ଲକ୍ଷ୍ୟବସ୍ତୁ କରି ଆକ୍ରମଣ କରିବ ନାହିଁ। ସେ ଏହି ଘଟଣା ସମ୍ପର୍କରେ ପ୍ରତିରକ୍ଷା ବିଭାଗକୁ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିବା କହିଛନ୍ତି।
ଉଲ୍ଲେଖ୍ୟ, ୨୮ ଫେବ୍ରୁଆରୀ ୨୦୨୬ରେ ଘଟିଥିବା ଏହି ଆକ୍ରମଣ ପରେ ଇରାନ ଓ ଆମେରିକା-ଇସ୍ରାଏଲ ମଧ୍ୟରେ ତଣାତଣି ଅଧିକ ବୃଦ୍ଧି ପାଇଛି। ଆନ୍ତର୍ଜାତୀୟ ମଞ୍ଚରେ ଏହି ଘଟଣାକୁ ନେଇ ଚର୍ଚ୍ଚା ଚାଲିଛି ଏବଂ ସ୍ୱାଧୀନ ତଦନ୍ତ ପାଇଁ ଦାବି ଉଠୁଛି।