ନୂଆଦିଲ୍ଲୀ, ୬ ଅକ୍ଟୋବର – ପ୍ରାୟ ଗୋଟିଏ ବର୍ଷ ଧରି ମୁଖ୍ୟମନ୍ତ୍ରୀ ବାସଭବନ ଛାଡି ରହିଥିବା ପରେ ଆମ ଆଦମୀ ପାର୍ଟି (ଆପ) ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ ଶେଷରେ ଦିଲ୍ଲୀରେ ଏକ ସରକାରୀ ବଙ୍ଗଳା ଆବଣ୍ଟନ କରାଯାଇଛି। ଦିଲ୍ଲୀ ହାଇକୋର୍ଟ ତାଙ୍କ ଅନୁରୋଧକୁ ମାନି ୯୫ ଲୋଧି ଇଷ୍ଟେଟ୍ରେ ଥିବା ଏକ ଟାଇପ୍-୭ ବଙ୍ଗଳା ପ୍ରଦାନ କରିଛି।
କେଜ୍ରିୱାଲ୍ ନିଜକୁ ଏକ ସ୍ୱୀକୃତ ରାଜନୈତିକ ଦଳର ରାଷ୍ଟ୍ରୀୟ ଅଧ୍ୟକ୍ଷ ବୋଲି ଦର୍ଶାଇ ଉପଯୁକ୍ତ ବାସଗୃହ ପାଇଁ ଆବେଦନ କରିଥିଲେ। ପ୍ରଥମେ ସେ ୩୫ ଲୋଧି ଇଷ୍ଟେଟ୍ରେ ଥିବା ମାୟାବତୀଙ୍କ ପୂର୍ବତନ ବଙ୍ଗଳା ପାଇଁ ଅନୁରୋଧ କରିଥିଲେ, କିନ୍ତୁ ସେହି ଘର ଜୁଲାଇ ମାସରେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀଙ୍କୁ ହସ୍ତାନ୍ତର ହୋଇଥିଲା।
ନୂତନ ବଙ୍ଗଳା ଆବଣ୍ଟନ ହେବା ପରେ କେଜ୍ରିୱାଲ୍ ନିଜେ ଯାଇ ସେଠାରେ ଯାଞ୍ଚ କରିଥିଲେ। ଟାଇପ୍-୭ ବଙ୍ଗଳାରେ ଚାରୋଟି ଶୟନକକ୍ଷ, ବଡ଼ ଲନ୍, ଗ୍ୟାରେଜ୍, ତିନିଟି ଗୃହସହାୟକ କ୍ୱାର୍ଟର ଓ ଏକ ଅଫିସ୍ ସ୍ଥାନ ରହିଛି। ପ୍ରାୟ ୫,୦୦୦ ବର୍ଗଫୁଟ ଆକାରର ଏହି ବାସଭବନ ଅତ୍ୟାଧୁନିକ ସୁବିଧା ସହିତ ସଜିତ।
କେଜ୍ରିୱାଲଙ୍କ ପଡ଼ୋଶୀ ହେବେ କଂଗ୍ରେସ ନେତା ଶଶୀ ଥରୁର୍, ଯିଏ ୯୭ ଲୋଧି ଇଷ୍ଟେଟ୍ରେ ରୁହୁଛନ୍ତି। ଏହା ସହିତ ୯୪ ଏବଂ ୯୬ ନମ୍ବର ବଙ୍ଗଳା ସେନା ଅଧିକାରୀମାନଙ୍କୁ ଆବଣ୍ଟିତ ହୋଇଛି। ଆରଜେଡି ନେତା ମିସା ଭାରତୀ ଏବଂ କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ମଧ୍ୟ ଏହି ଅଞ୍ଚଳରେ ରହୁଛନ୍ତି।
୧୭ ସେପ୍ଟେମ୍ବର ୨୦୨୪ରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ କେଜ୍ରିୱାଲଙ୍କ ପାଖରେ ସ୍ଥାୟୀ ସରକାରୀ ଘର ନଥିଲା। ୪ ନଭେମ୍ବରରେ ଫ୍ଲାଗଷ୍ଟାଫ୍ ରୋଡରେ ଥିବା ମୁଖ୍ୟମନ୍ତ୍ରୀ ବାସଭବନ ଛାଡି ସେ ଅଶୋକ ମିତ୍ତଲଙ୍କ ଫିରୋଜଶାହ ରୋଡରେ ଥିବା ଘରରେ ଅସ୍ଥାୟୀ ଭାବେ ରହୁଥିଲେ।