ମଣିପୁରରେ ଆଜି ସନ୍ଧ୍ୟାରେ ନୂଆ ସରକାରର ଶପଥ, ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ନେବେ ୟୁମନାମ ଖେମଚାନ୍ଦ ସିଂହ

ଇମ୍ଫାଲ: ଦୀର୍ଘ ସମୟ ଧରି ଚାଲିଥିବା ରାଷ୍ଟ୍ରପତି ଶାସନ ପ୍ରତ୍ୟାହାର ପରେ ମଣିପୁରରେ ନୂଆ ସରକାର ଗଠନ ପାଇଁ ପଥ ସୁଗମ ହୋଇଛି। ଆଜି ସନ୍ଧ୍ୟାରେ ଇମ୍ଫାଲରେ ନୂତନ ମନ୍ତ୍ରିମଣ୍ଡଳର ଶପଥ ଗ୍ରହଣ ସମାରୋହ ହେବ। ବିଜେପି ବିଧାୟକ ୟୁମନାମ ଖେମଚାନ୍ଦ ସିଂହ ସନ୍ଧ୍ୟା ୬ଟାରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ।

୨୦୨୩ ମଇ ୩ରେ ଆରମ୍ଭ ହୋଇଥିବା ସମ୍ପ୍ରଦାୟିକ ଘଟଣାପରମ୍ପରା ପରେ ରାଜ୍ୟରେ ଅସ୍ଥିର ପରିସ୍ଥିତି ଦେଖାଯାଇଥିଲା। ପରବର୍ତ୍ତୀ ସମୟରେ ତତ୍କାଳୀନ ମୁଖ୍ୟମନ୍ତ୍ରୀ ବୀରେନ ସିଂହ ପଦତ୍ୟାଗ କରିଥିଲେ ଏବଂ ଫେବୃଆରୀ ୧୨ରେ ରାଷ୍ଟ୍ରପତି ଶାସନ ଲାଗୁ ହୋଇଥିଲା। ପ୍ରାୟ ଗୋଟିଏ ବର୍ଷ ପରେ ଏହାକୁ ହଟାଯାଇ ନୂଆ ସରକାର ଗଠନ ପ୍ରକ୍ରିୟା ଆରମ୍ଭ ହୋଇଛି।

ନୂଆ ସରକାର ଗଠନ ପାଇଁ ୟୁମନାମ ଖେମଚାନ୍ଦ ସିଂହଙ୍କ ନେତୃତ୍ୱରେ ଏନଡିଏ ବିଧାୟକମାନେ ରାଜ୍ୟପାଳ ଅଜୟ କୁମାର ଭଲ୍ଲାଙ୍କ ସହିତ ଭେଟି ଦାବି ପ୍ରସ୍ତୁତ କରିଥିଲେ। ସେମାନେ ଇମ୍ଫାଲ ପହଞ୍ଚି ସିଧାସଳଖ ରାଜଭବନକୁ ଯାଇଥିଲେ। ଏହି ସମୟରେ କେନ୍ଦ୍ରୀୟ ନେତୃତ୍ୱର କିଛି ପର୍ଯ୍ୟବେକ୍ଷକ ଓ ରାଜ୍ୟ ଦଳୀୟ ପଦାଧିକାରୀମାନେ ମଧ୍ୟ ଉପସ୍ଥିତ ଥିଲେ।

ୟୁମନାମ ଖେମଚାନ୍ଦ ସିଂହଙ୍କ ପୃଷ୍ଠଭୂମି:

ଖେମଚାନ୍ଦ ସିଂହ ପୂର୍ବତନ ତାଇକୋଣ୍ଡୋ କ୍ରୀଡ଼ାଳୁ ହୋଇଥିବା ବେଳେ ସେ ୨୦୧୭ ଓ ୨୦୨୨ରେ ସିଂଜାମେଇ ଆସନରୁ ବିଜେପି ପ୍ରାର୍ଥୀ ଭାବେ ବିଧାନସଭାକୁ ନିର୍ବାଚିତ ହୋଇଥିଲେ। ୨୦୧୭–୨୦୨୨ ଅବଧିରେ ସେ ବିଧାନସଭାର ବାଚସ୍ପତି ଭାବେ କାମ କରିଥିଲେ। ପରେ ସେ ରାଜ୍ୟ କ୍ୟାବିନେଟରେ ମନ୍ତ୍ରୀ ଭାବରେ ମଧ୍ୟ ଦାୟିତ୍ୱ ନେଇଥିଲେ।