ବେଜିଂ: ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀ ସମୟରେ ଚାଇନାର ତିଆନଜିନ ସହରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ବିଶେଷ କାର ‘ହଙ୍ଗକି ଏଲ-୫’ (Hongqi L-5) ଯାତାୟାତ ପାଇଁ ଯୋଗାଇ ଦେଲା ଚାଇନା ସରକାର। ଏହି କାରକୁ ‘ଲାଲ ପତାକା’ (Red Flag) ବୋଲି ମଧ୍ୟ ଜଣାଯାଏ ଏବଂ ଏହାକୁ ଚାଇନାର ରାଷ୍ଟ୍ରପତି ସି ଜିନପିଙ୍ଗ ସାଧାରଣତଃ ବ୍ୟବହାର କରନ୍ତି।
‘ହଙ୍ଗକି’ କାରକୁ ୧୯୫୮ ମସିହାରୁ ଚାଇନାର ସରକାରୀ ଉଦ୍ୟମ FAW (First Automotive Works) ତିଆରି କରୁଛି। ପ୍ରଥମେ ଏହାକୁ କମ୍ୟୁନିଷ୍ଟ ପାର୍ଟିର ଶୀର୍ଷନେତାମାନଙ୍କ ପାଇଁ ବିଶେଷ ଭାବରେ ଡିଜାଇନ କରାଯାଇଥିଲା। ୨୦୧୯ ମସିହାରେ ମହାବଳୀପୁରମରେ ମୋଦି-ଜିନପିଙ୍ଗଙ୍କ ସାକ୍ଷାତକାର ସମୟରେ ମଧ୍ୟ ଏହି କାର ବ୍ୟବହୃତ ହୋଇଥିଲା।
ଦ୍ୱିପାକ୍ଷିକ ବୈଠକ ସମୟରେ ସି ଜିନପିଙ୍ଗ କହିଥିଲେ ଯେ “ଏବେ ସମୟ ଆସିଛି ଯେ ‘ଡ୍ରାଗନ’ ଏବଂ ‘ହାତୀ’ ବନ୍ଧୁତ୍ୱର ସୂତ୍ରରେ ଯୁକ୍ତ ହେଉ।” ପ୍ରଧାନମନ୍ତ୍ରୀ ମୋଦି ପ୍ରତିକ୍ରିୟା ଦେଇଥିଲେ ଯେ ଭାରତ ପାରସ୍ପରିକ ବିଶ୍ୱାସ, ସମ୍ମାନ ଓ ସମ୍ବେଦନଶୀଳତା ଆଧାରରେ ଚାଇନା ସହିତ ସମ୍ପର୍କକୁ ଆଗକୁ ବଢ଼ାଇବାକୁ ପ୍ରତିବଦ୍ଧ।
ଉଭୟ ନେତାଙ୍କ କଥାନୁସାରେ, ୨.୮ ବିଲିୟନ ଡଲାରର ସହଯୋଗ ଦୁଇ ଦେଶର ନାଗରିକଙ୍କ ଆର୍ଥିକ ସୁଦୃଢତାକୁ ବଢ଼ାଇବ। ମୋଦି କହିଥିଲେ ଯେ ସୀମାରେ ଏବେ ଶାନ୍ତିପୂର୍ଣ୍ଣ ପରିବେଶ ରହିଛି ଏବଂ ସୈନିକମାନେ ନିଜ-ନିଜ ଅଞ୍ଚଳକୁ ଫେରିଛନ୍ତି।
ଏହି ସମୟରେ, ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ତିଆନଜିନରେ ନିଜର ବିଶେଷ ରାଷ୍ଟ୍ରପତି କାର ‘ଅରସ’ (Aurus) ବ୍ୟବହାର କରିବେ। ରେଟ୍ରୋ-ଶୈଳୀରେ ତିଆରି ‘ଅରସ’କୁ ରୁଷିଆର Aurus Motors କମ୍ପାନୀ ଡିଜାଇନ କରିଥିବା ସହିତ ଏହାକୁ ସୁରକ୍ଷା, ପ୍ରଯୁକ୍ତି ଓ ଲଗଜରୀର ଏକ ବିଶିଷ୍ଟ ସମନ୍ୱୟ ବୋଲି ମନାଯାଏ।