ମଧ୍ୟପ୍ରାଚ୍ୟ ପ୍ରଭାବ: ପେଟ୍ରୋଲ-ଡିଜେଲ୍ ଦର ୨୦ ଟଙ୍କା ପର୍ଯ୍ୟନ୍ତ ବଢ଼ିପାରେ, ଅଶୋଧିତ ତେଲ ୧୨୦ ଡଲାର ଛୁଇଁବା ଆଶଙ୍କା
ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ବୃଦ୍ଧି ପାଉଥିବା ସାମରିକ ତଣାପୋଡ଼ା ବିଶ୍ୱ ତେଲ ବଜାରକୁ ଗୁରୁତର ପ୍ରଭାବିତ କରିପାରେ ବୋଲି ଆଶଙ୍କା ବ୍ୟକ୍ତ ହେଉଛି। ଆମେରିକା-ଇସ୍ରାଏଲ ଓ ଇରାନ ମଧ୍ୟରେ ସଂଘର୍ଷ ଦୀର୍ଘସ୍ଥାୟୀ ହେଲେ ବିଶ୍ୱବ୍ୟାପୀ ଅଶୋଧିତ ତେଲ ଯୋଗାଣ ବିଘ୍ନିତ ହେବା ସହ ଭାରତରେ ପେଟ୍ରୋଲ ଓ ଡିଜେଲ୍ ଦର ଉପରେ ସିଧାସଳଖ ପ୍ରଭାବ ପଡ଼ିପାରେ।
ବିଶେଷଜ୍ଞମାନଙ୍କ ଆକଳନ ଅନୁସାରେ, ଯଦି ହର୍ମୁଜ ପ୍ରଣାଳୀ ଦେଇ ତେଲ ପରିବହନ ବାଧାପ୍ରାପ୍ତ ହୁଏ, ତେବେ ଅନ୍ତର୍ଜାତୀୟ ବଜାରରେ ଅଶୋଧିତ ତେଲର ଦର ହଠାତ୍ ବୃଦ୍ଧି ପାଇ ବ୍ୟାରେଲ୍ ପିଛା ୧୦୦ରୁ ୧୨୦ ଡଲାର ପର୍ଯ୍ୟନ୍ତ ପହଞ୍ଚିପାରେ। ବର୍ତ୍ତମାନ ବ୍ରେଣ୍ଟ୍ କ୍ରୁଡ୍ର ମୂଲ୍ୟ ପ୍ରାୟ ୭୦ ଡଲାର ଆସପାସରେ ରହିଛି।
ଭାରତ ନିଜ ମୋଟ ତେଲ ଆବଶ୍ୟକତାର ପ୍ରାୟ ୮୫ ପ୍ରତିଶତ ବିଦେଶରୁ ଆମଦାନୀ କରେ। ଏଥିରୁ ପ୍ରାୟ ଅର୍ଦ୍ଧାଧିକ ତେଲ ହର୍ମୁଜ ପ୍ରଣାଳୀ ମାଧ୍ୟମରେ ଆସୁଥିବାରୁ ସେହି ପଥ ବନ୍ଦ ହେଲେ ଦେଶର ଇନ୍ଧନ ଖର୍ଚ୍ଚ ଦ୍ରୁତ ଭାବେ ବଢ଼ିବା ସମ୍ଭାବନା ରହିଛି। ଏପରି ପରିସ୍ଥିତି ଜାରି ରହିଲେ ପେଟ୍ରୋଲ ଓ ଡିଜେଲ୍ ଲିଟର ପିଛା ଦରରେ ପ୍ରାୟ ୨୦ ଟଙ୍କା ପର୍ଯ୍ୟନ୍ତ ବୃଦ୍ଧି ହେବାର ଆଶଙ୍କା କରାଯାଉଛି।
ଆକଳନ ଅନୁଯାୟୀ, ଦିଲ୍ଲୀରେ ପେଟ୍ରୋଲ ଦର ୯୫ ଟଙ୍କାରୁ ବଢ଼ି ୧୦୫ ଟଙ୍କା ଓ ଡିଜେଲ୍ ମୂଲ୍ୟ ୮୮ ଟଙ୍କାରୁ ପ୍ରାୟ ୯୬ ଟଙ୍କାକୁ ପହଞ୍ଚିପାରେ। ଏହାର ପ୍ରଭାବ ସୁନା-ରୁପା ଦର ସହ ଶେୟାର ବଜାର କାରବାର ଉପରେ ମଧ୍ୟ ପଡ଼ିବା ସମ୍ଭାବନା ରହିଛି।
ଇତିହାସ ଦେଖାଉଛି ଯେ, ମଧ୍ୟପ୍ରାଚ୍ୟର ଯୁଦ୍ଧ ପରିସ୍ଥିତି ସମୟରେ ଭାରତରେ ଇନ୍ଧନ ଦର ବୃଦ୍ଧି ଘଟିଥାଏ। ୧୯୭୩ର ଇସ୍ରାଏଲ-ଆରବ ସଂଘର୍ଷ, ୧୯୯୦ର ଇରାକ-କୁଏତ୍ ଯୁଦ୍ଧ, ୨୦୦୩ର ଇରାକ-ଆମେରିକା ଯୁଦ୍ଧ ଓ ୨୦୨୨ର ରୁଷ-ୟୁକ୍ରେନ ଯୁଦ୍ଧ ସମୟରେ ମଧ୍ୟ ପେଟ୍ରୋଲ-ଡିଜେଲ୍ ଦର ବୃଦ୍ଧି ଦେଖାଯାଇଥିଲା।
ଭାରତରେ ଇନ୍ଧନ ମୂଲ୍ୟ ନିର୍ଧାରଣର ଅଧିକାର ତେଲ କମ୍ପାନିମାନଙ୍କ ପାଖରେ ରହିଥିଲେ ମଧ୍ୟ, ସରକାରୀ ନୀତି ଓ ଅର୍ଥନୈତିକ ସ୍ଥିରତାକୁ ଦୃଷ୍ଟିରେ ରଖି ମୂଲ୍ୟ ବୃଦ୍ଧି ନିୟନ୍ତ୍ରଣ କରାଯାଇପାରେ। ଆବଶ୍ୟକ ପଡ଼ିଲେ କେନ୍ଦ୍ର ସରକାର ଟିକସ ହ୍ରାସ କରି ସାଧାରଣ ଗ୍ରାହକଙ୍କ ଉପରେ ପଡ଼ୁଥିବା ଅତିରିକ୍ତ ଭାର କମାଇବାକୁ ପଦକ୍ଷେପ ନେଇପାରନ୍ତି।