ନୂଆଦିଲ୍ଲୀ: ସଂସଦର ଶୀତ ଅଧିବେଶନ ଆସନ୍ତାକାଲି (୧ ଡିସେମ୍ବର)ଠାରୁ ଆରମ୍ଭ ହୋଇ ୧୯ ଡିସେମ୍ବର ପର୍ଯ୍ୟନ୍ତ ଚାଲିବ। ମୋଟ ୧୫ କାର୍ଯ୍ୟଦିବସର ଏହି ଅଧିବେଶନକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅନୁମୋଦନ ପରେ ଘୋଷଣା କରାଯାଇଛି। ଏହି ଅଧିବେଶନରେ ରାଜନୈତିକ ତାତି ସହ ୧୩ଟି ଗୁରୁତ୍ୱପୂର୍ଣ୍ଣ ବିଲ୍ ଉପରେ ଚର୍ଚ୍ଚା ହେବା ଆଶା କରାଯାଉଛି।
ସରକାର ପକ୍ଷରୁ ଯେଉଁ ବିଲ୍ଗୁଡ଼ିକୁ ସର୍ବାଧିକ ଗୁରୁତ୍ୱ ଦିଆଯାଇଛି, ସେମାନଙ୍କ ମଧ୍ୟରେ ପରମାଣୁ ଶକ୍ତି (ସଂଶୋଧନ) ବିଧେୟକ ୨୦୨୫ (ଘରୋଇ କ୍ଷେତ୍ରରେ ନ୍ୟୁକ୍ଲିୟର ନିବେଶ ପାଇଁ ଦ୍ୱାର ଖୋଲିବ), ଉଚ୍ଚଶିକ୍ଷା ଆୟୋଗ ବିଧେୟକ (ୟୁଜିସି ଅପସାରଣ କରି ନୂଆ ନିୟାମକ ଗଠନ) ଏବଂ ବୀମା ସଂଶୋଧନ ବିଧେୟକ (ବୀମା ବଜାର ଓ କମ୍ପାନି ଆଇନରେ ବିଭିନ୍ନ ସଂଶୋଧନ) ପ୍ରମୁଖ। ଏହାସହିତ *‘ବନ୍ଦେ ମାତରମ୍’*ର ୧୫୦ତମ ବର୍ଷପୂର୍ତ୍ତି ଉପଲକ୍ଷେ ବିଶେଷ ଆଲୋଚନା ହେବ।
ସର୍ବଦଳୀୟ ବୈଠକରେ ୩୬ ଦଳର ୫୦ ନେତା ଉପସ୍ଥିତ
ଆସନ୍ତାକାଲିଠାରୁ ଆରମ୍ଭ ହେବାକୁ ଥିବା ଅଧିବେଶନ ପୂର୍ବରୁ କେନ୍ଦ୍ର ସରକାର ସଂସଦ ଭବନରେ ସର୍ବଦଳୀୟ ବୈଠକ ଆହ୍ୱାନ କରିଥିଲେ। ରକ୍ଷାମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ହୋଇଥିବା ଏହି ବୈଠକରେ ୩୬ଟି ଦଳର ୫୦ ଜଣ ନେତା ଯୋଗ ଦେଇଥିଲେ।
ବୈଠକ ପରେ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଥିଲେ ଯେ, ଦୁଇ ସଦନର ସୁଚାଳନା ପାଇଁ ସରକାର ସମସ୍ତ ପକ୍ଷକୁ ସହଯୋଗ ଦେବାକୁ ଅନୁରୋଧ କରିଛି।
ବୈଠକରେ ଜେପି ନଡ୍ଡା, ଅର୍ଜୁନ ରାମ ମେଘୱାଲ, ଏଲ୍ ମୁରୁଗାନ, ଗୌରବ ଗୋଗୋଇ, ତିରୁଚି ଶିବା, ଡେରେକ ଓ’ବ୍ରାଏନ୍, ରାମଗୋପାଳ ଯାଦବ, ସଞ୍ଜୟ ଝା, ଶ୍ରୀକୃଷ୍ଣ ଦେବରାୟାଲୁ, ନରେଶ ମାହସ୍କେ ପ୍ରମୁଖ ଉପସ୍ଥିତ ଥିଲେ।
ବିରୋଧୀଙ୍କ ରଣନୀତି: ସରକାରକୁ ଘେରିବାରେ ଦୁଇଟି ପ୍ରମୁଖ ଅସ୍ତ୍ର
ବିରୋଧୀ ଦଳମାନେ ଏହି ଅଧିବେଶନକୁ ଲକ୍ଷ୍ୟ କରି ଦୁଇଟି ମୁଖ୍ୟ ପ୍ରସଙ୍ଗକୁ ନେଇ ସରକାରକୁ ଚାପରେ ରଖିବାକୁ ଯୋଜନା କରିଛନ୍ତି—
1. ନିର୍ବାଚନ କମିସନଙ୍କ SIR ସଂଶୋଧନକୁ ବିରୋଧ
ନୂତନ ସ୍ବତନ୍ତ୍ର ସଂଶୋଧନ ପ୍ରଣାଳୀ (SIR) ନେଇ ବିରୋଧୀ ଦଳମାନେ ଏକତାବଦ୍ଧ ହୋଇପାରନ୍ତି।
2. ଗାନ୍ଧୀ ପରିବାର ବିରୋଧରେ ନୂଆ ଏଫ୍ଆଇଆର୍
ନ୍ୟାସନାଲ ହେରାଲ୍ଡ ମାମଲାରେ ସୋନିଆ ଓ ରାହୁଲ ଗାନ୍ଧୀଙ୍କ ବିରୋଧରେ ଦିଲ୍ଲୀ ପୁଲିସ ରୁଜୁ କରାଇଥିବା ଏଫ୍ଆଇଆର୍କୁ କଂଗ୍ରେସ ରାଜନୈତିକ ପ୍ରତିଶୋଧ ବୋଲି ଅଭିଯୋଗ କରିଛି। ଏହାକୁ ନେଇ ସଂସଦ ଭିତରେ ଓ ବାହାରେ ଜୋରଦାର ପ୍ରତିବାଦ ହେବା ନିଶ୍ଚିତ।
ବିରୋଧୀ ମାନେ ଏହା ସହିତ ବାୟୁ ପ୍ରଦୂଷଣ, ବେକାରୀ, ଦରବୃଦ୍ଧି, କେନ୍ଦ୍ର-ରାଜ୍ୟ ସମ୍ପର୍କ ପରି ସାର୍ବଜନିକ ମୁଦ୍ଦାଗୁଡ଼ିକୁ ମଧ୍ୟ ଚର୍ଚ୍ଚା ପାଇଁ ଉଠାଇହେବାକୁ ପ୍ରସ୍ତୁତ।