ନୂଆଦିଲ୍ଲୀ: ଲେହରେ ହିଂସାତ୍ମକ ଘଟଣା ପରେ କେନ୍ଦ୍ର ସରକାର କଡା ମନୋଭାବ ଦେଖାଇଛନ୍ତି। ପରିଚିତ ଜଳବାୟୁ କର୍ମୀ ସୋନମ ୱାଙ୍ଗଚୁକଙ୍କ ଏନଜିଓ ଷ୍ଟୁଡେଣ୍ଟସ୍ ଏଡ୍ୟୁକେସନାଲ୍ ଆଣ୍ଡ କଲ୍ଚରାଲ୍ ମୁଭମେଣ୍ଟ ଅଫ୍ ଲଦାଖ (SECMOL) ର ଏଫସିଆରଏ ପଂଜୀକରଣ କେନ୍ଦ୍ର ସରକାର ପ୍ରତ୍ୟାହାର କରିଦେଇଛି। ବିଦେଶୀ ଅବଦାନ ନିୟନ୍ତ୍ରଣ ଆଇନ (FCRA)ର ଉଲ୍ଲଂଘନ ଅଭିଯୋଗରେ ଏହି ପଦକ୍ଷେପ ନିଆଯାଇଥିବା କୁହାଯାଇଛି।
ୱାଙ୍ଗଚୁକ ସମର୍ଥକମାନଙ୍କ ଦ୍ୱାରା ଲଦାଖକୁ ରାଜ୍ୟ ମାନ୍ୟତା ଦାବି କରି ହିଂସାତ୍ମକ ପ୍ରତିବାଦ ପରେ ୨୪ ଘଣ୍ଟା ମଧ୍ୟରେ ଏହି ନିଷ୍ପତ୍ତି ହୋଇଛି। ୧୯୮୮ରେ ସୋନମ ୱାଙ୍ଗଚୁକ୍ SECMOL ଗଠନ କରିଥିଲେ, ଯାହା ଶିକ୍ଷା ସଂସ୍କାର, ପରିବେଶ ସୁରକ୍ଷା ଏବଂ ସାଂସ୍କୃତିକ କାର୍ଯ୍ୟକଳାପରେ କାମ କରୁଥିଲା।
ପୂର୍ବରୁ, କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ସୋନମ ୱାଙ୍ଗଚୁକ ସହିତ ସମ୍ପର୍କିତ ସଂଗଠନମାନଙ୍କ ବିରୋଧରେ FCRA ଆଇନ ଉଲ୍ଲଂଘନ ଅଭିଯୋଗରେ ତଦନ୍ତ ଆରମ୍ଭ କରିଥିଲା। ଜଣେ ଅଧିକାରୀଙ୍କ କହିବା ଅନୁସାରେ, ପ୍ରାରମ୍ଭିକ ତଦନ୍ତ ଚାଲିଥିଲେ ମଧ୍ୟ ଏହି ମାମଲାରେ ଏପର୍ଯ୍ୟନ୍ତ କୌଣସି FIR ରଜିଷ୍ଟର ହୋଇନାହିଁ।