ନୂଆଦିଲ୍ଲୀ: ଶୁଣାଣି ଶେଷ ହେବା ପରେ ରାୟ ପ୍ରଦାନରେ ହେଉଥିବା ବିଳମ୍ବକୁ ନଜରରେ ରଖି Supreme Court of India ହାଇକୋର୍ଟମାନଙ୍କ ପାଇଁ ନୂଆ ମାର୍ଗଦର୍ଶିକା ଜାରି କରିବାକୁ ଯାଉଛି। ଏହି ସମ୍ପର୍କିତ ଡ୍ରାଫ୍ଟ ଗାଇଡଲାଇନ୍ ଉପରେ ଶୁଣାଣି କରି କୋର୍ଟ ରାୟ ସଂରକ୍ଷିତ ରଖିଛନ୍ତି।
ପ୍ରଧାନ ବିଚାରପତି Justice Surya Kant ଓ Justice Joymalya Bagchiଙ୍କ ଖଣ୍ଡପୀଠ ଏହି ମାମଲାରେ ଆମିକସ୍ କ୍ୟୁରି ଆଡଭୋକେଟ୍ Fauzia Shakilଙ୍କ ଦ୍ୱାରା ପ୍ରସ୍ତୁତ ଡ୍ରାଫ୍ଟକୁ ପ୍ରଶଂସା କରିଛନ୍ତି ଏବଂ ଏଥିପାଇଁ ସମସ୍ତ ହାଇକୋର୍ଟଙ୍କ ମତାମତ ମାଗିଛନ୍ତି।
କୋର୍ଟ କହିଛନ୍ତି ଯେ, ଏହି ପଦକ୍ଷେପ କାହାକୁ ଲକ୍ଷ୍ୟ କରି ନୁହେଁ, ବରଂ ବିଚାର ପ୍ରଣାଳୀରେ ଉତ୍ତରଦାୟିତ୍ୱ ବଢ଼ାଇବା ଓ ସଂସ୍ଥାଗତ ଶକ୍ତିକୁ ମଜବୁତ କରିବା ପାଇଁ। ପ୍ରତିକ୍ରିୟା ମିଳିବା ପରେ ଶୀଘ୍ର ଆଦେଶ ଜାରି ହେବ ବୋଲି କୋର୍ଟ ସୂଚନା ଦେଇଛନ୍ତି।
ଏହି ମାମଲା ଶୁଣାଣି ସମୟରେ Jharkhand High Courtରେ କେତେକ ଆପରାଧିକ ମାମଲାରେ ରାୟ ପ୍ରଦାନରେ ବିଳମ୍ବ ଘଟିଥିବା ପ୍ରସଙ୍ଗ ଉଠିଥିଲା। ଏହାକୁ ଆଧାର କରି ସୁପ୍ରିମ୍କୋର୍ଟ ସମଗ୍ର ଦେଶର ହାଇକୋର୍ଟଗୁଡ଼ିକରେ ବିଚାରାଧୀନ ରାୟ ସମ୍ପର୍କରେ ବିସ୍ତୃତ ତଥ୍ୟ ଆହରଣ କରିଥିଲା।
ଡ୍ରାଫ୍ଟ ଗାଇଡଲାଇନ୍ ଅନୁଯାୟୀ, ହାଇକୋର୍ଟମାନେ ରାୟ ସଂରକ୍ଷଣ ତାରିଖରୁ ଅଧିକତମ ତିନି ମାସ ମଧ୍ୟରେ ଯୁକ୍ତିସଙ୍ଗତ ରାୟ ପ୍ରଦାନ କରିବାକୁ ଚେଷ୍ଟା କରିବେ। ଏହା ସହ ରାୟ ସଂରକ୍ଷଣ ଓ ଘୋଷଣା ମଧ୍ୟରେ ବ୍ୟବଧାନ କମାଇବା ପାଇଁ ଏକ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡ୍ୟୁର (SOP) ଲାଗୁ କରିବାକୁ ସୁପାରିସ ହୋଇଛି।
ତଦୁପରି, ସଂରକ୍ଷିତ ରାୟ ସମ୍ପର୍କିତ ସୂଚନାକୁ ହାଇକୋର୍ଟଙ୍କ ୱେବସାଇଟ୍ରେ ପ୍ରକାଶ କରିବା ଓ ଦୀର୍ଘ ସମୟ ଧରି ମାମଲାକୁ ‘ଆଂଶିକ ଶୁଣାଣି’ ଭାବରେ ରଖିବାକୁ ବିମୁଖ ହେବା ପାଇଁ ମଧ୍ୟ ପରାମର୍ଶ ଦିଆଯାଇଛି। ବିଶେଷକରି ବ୍ୟକ୍ତିଗତ ସ୍ୱାଧୀନତା ସହ ସମ୍ପୃକ୍ତ ମାମଲାଗୁଡ଼ିକରେ ତ୍ୱରିତ ରାୟ ପ୍ରଦାନରେ ଗୁରୁତ୍ୱ ଦେବାକୁ କୋର୍ଟ ଉଲ୍ଲେଖ କରିଛନ୍ତି।