ରାୟପୁର: ଛତିଶଗଡ଼ର ଶିକ୍ଷା ବିଭାଗ ଜାରି କରିଥିବା ଏକ ବିବାଦସ୍ପଦ ନିର୍ଦ୍ଦେଶ ଏବେ ରାଜ୍ୟରେ ଜୋରଦାର ଚର୍ଚ୍ଚାର କାରଣ ହୋଇଛି। ସରକାରୀ ସ୍କୁଲର ଶିକ୍ଷକ ଏବଂ ପ୍ରଧାନଶିକ୍ଷକମାନଙ୍କୁ ବୁଲା କୁକୁରମାନଙ୍କ ଉପରେ ନଜର ରଖିବା ଏବଂ ସେମାନଙ୍କୁ ଧରିବାର ଦାୟିତ୍ୱ ଦିଆଯାଇଛି। ଏହାକୁ ନିଅଇ ଶିକ୍ଷକମାନେ ପ୍ରଶ୍ନ କରୁଛନ୍ତି— “ପିଲାମାନଙ୍କୁ ପଢ଼ାଇବା ଆମ ଦାୟିତ୍ୱ, ନା କି କୁକୁର ଧରିବା?”
ଛତିଶଗଡ଼ ଗଣଶିକ୍ଷା ନିର୍ଦ୍ଦେଶାଳୟ (DPI) ଦ୍ୱାରା ଜାରି ଏହି ନିର୍ଦ୍ଦେଶ ଅନୁଯାୟୀ, ରାଜ୍ୟର ସମସ୍ତ ସରକାରୀ ସ୍କୁଲରେ ବୁଲା କୁକୁର ନିୟନ୍ତ୍ରଣର ଜିମ୍ମେବାରୀ ପ୍ରଧାନଶିକ୍ଷକ ଏବଂ ଶିକ୍ଷକମାନଙ୍କୁ ଦିଆଯାଇଛି। ପ୍ରଧାନଶିକ୍ଷକମାନଙ୍କୁ ଏହା ପାଇଁ ‘ନୋଡାଲ ଅଧିକାରୀ’ ଭାବେ ନିଯୁକ୍ତ କରାଯାଇଛି।
ଶିକ୍ଷକମାନଙ୍କ ରୋଷ
ଏହି ନିର୍ଦ୍ଦେଶ ପରେ ବିଭିନ୍ନ ଶିକ୍ଷକ ସଂଗଠନ ଅସନ୍ତୋଷ ପ୍ରକାଶ କରିଛନ୍ତି। ଛତିଶଗଡ଼ ଶିକ୍ଷକ ସଂଘ (CHF) କହିଛି—
“ପ୍ରଥମେ SIR କାମ, ପରେ ନିର୍ବାଚନ ଦାୟିତ୍ୱ— ଏବେ କୁକୁର ଧରିବା! ତାହେଲେ ଶିକ୍ଷକମାନେ ପିଲାମାନଙ୍କୁ କେବେ ପଢ଼ାଇବେ?”
ରାଜନୈତିକ ବିବାଦ ମଧ୍ୟ ତୀବ୍ର
ଏହି ବିଷୟରେ ବିରୋଧୀ ଦଳ କଂଗ୍ରେସ ମଧ୍ୟ ଶିକ୍ଷକମାନଙ୍କ ସହିତ ଠିଆ ହୋଇଛି। ସେମାନଙ୍କର କହିବା—
“ଶିକ୍ଷକମାନଙ୍କୁ ପୂର୍ବରୁ ଅନେକ ଅଶିକ୍ଷଣୀୟ କାମ ଦିଆଯାଇଛି। ଏବେ କୁକୁର ଧରିବା କାମ ମଧ୍ୟ ଦିଆଯାଏ, ତେବେ ଶିକ୍ଷା ବ୍ୟବସ୍ଥାର ଅବସ୍ଥା କ’ଣ ହେବ?”
ସୁପ୍ରିମକୋର୍ଟ ଆଦେଶର ଉଲ୍ଲେଖ
DPI ନିର୍ଦ୍ଦେଶରେ ସୁପ୍ରିମ କୋର୍ଟର ସ୍ୱତଃପ୍ରବୃତ୍ତ ଶୁଣାଣି ଏବଂ ଆଦେଶର ଉଲ୍ଲେଖ କରାଯାଇଛି, ଯାହାକୁ ଆଧାର କରି ଏହି ପଦକ୍ଷେପ ନିଆଯାଇଥିବା ଦାବି କରାଯାଇଛି।
କିନ୍ତୁ ସ୍କୁଲ ପରିବେଶରେ ଶିକ୍ଷକଙ୍କ ଉପରେ ଏପରି ଅତିରିକ୍ତ ଭାର କାହିଁକି— ଏନେଇ ରାଜ୍ୟରେ ରାଜନୈତିକ ଓ ସାମାଜିକ ଅଲୋଚନା ଜାରି ରହିଛି।