ନୂଆଦିଲ୍ଲୀ, 30 ସେପ୍ଟେମ୍ବର : ଆମେରିକାରେ ପୁଣିଥରେ ସଟ୍ଡାଉନ୍ (Shutdown) ଲାଗୁ ହୋଇଛି। ସେନେଟରେ ପାଣ୍ଠି ବିଲ୍ ପାସ୍ ନହେବାରୁ ସରକାରୀ ଖର୍ଚ୍ଚ ପାଇଁ ଆବଶ୍ୟକୀୟ ଅନୁମୋଦନ ହୋଇପାରିନଥିଲା। ଏହାର ପରିଣାମରେ 7.5 ଲକ୍ଷ ସରକାରୀ କର୍ମଚାରୀଙ୍କୁ ବିନା ଦରମାରେ ଛୁଟିରେ ପଠାଯାଇବ ଏବଂ ଅନେକ ସରକାରୀ ଅଫିସ୍ ବନ୍ଦ ହେବ।
କାହିଁକି ହେଲା ସଟ୍ଡାଉନ୍
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦଳକୁ ସେନେଟରେ ଅସ୍ଥାୟୀ ପାଣ୍ଠି ବିଲ୍ ପାସ୍ ପାଇଁ 60 ଭୋଟ୍ ଆବଶ୍ୟକ ଥିଲା, କିନ୍ତୁ କେବଳ 55 ଭୋଟ୍ ମିଳିଥିଲା। ବିଲ୍ ଅସ୍ୱୀକୃତ ହେବାରୁ “ଅଣ-ଅତ୍ୟାବଶ୍ୟକ” ସରକାରୀ ବିଭାଗ ଏବଂ ସେବାଗୁଡ଼ିକ ବନ୍ଦ ହେବାକୁ ପଡ଼ିଛି।
କୋଣସି ସେବା ଚାଲୁ ରହିବ
ଜାତୀୟ ସୁରକ୍ଷା, ସାମରିକ ବାହିନୀ, ବିମାନ ଟ୍ରାଫିକ୍ ନିୟନ୍ତ୍ରଣ, ସୀମା ସୁରକ୍ଷା ଏବଂ ପେନସନ୍ ଭଳି ଅତ୍ୟାବଶ୍ୟକ ସେବା ଜାରି ରହିବ। କିନ୍ତୁ ଏହାରେ ନିୟୋଜିତ କର୍ମଚାରୀମାନେ ବିନା ଦରମାରେ କାମ କରିବାକୁ ବାଧ୍ୟ ହେବେ।
ହ୍ୱାଇଟ୍ ହାଉସ୍ର ପ୍ରତିକ୍ରିୟା
ହ୍ୱାଇଟ୍ ହାଉସ୍ ଡେମୋକ୍ରାଟମାନଙ୍କୁ ଦାୟୀ କରି “ପାଗଳ ନୀତି”ର ଆରୋପ ଲଗାଇଛି। ଟ୍ରମ୍ପ ଚେତାବନୀ ଦେଇଛନ୍ତି ଯେ, ଏହାର ପରିଣାମରେ ବ୍ୟାପକ ଛଟେଇ ଏବଂ ଗୁରୁତ୍ୱପୂର୍ଣ୍ଣ ପ୍ରକଳ୍ପ ବନ୍ଦ ହୋଇପାରେ।
ପୂର୍ବରୁ ମଧ୍ୟ ହୋଇଥିଲା ସଟ୍ଡାଉନ୍
2018ରେ ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳରେ 35 ଦିନ ଧରି ସଟ୍ଡାଉନ୍ ଚାଲିଥିଲା, ଯାହା ଆମେରିକା ଇତିହାସରେ ସବୁଠାରୁ ଲମ୍ବା। ସେତେବେଳେ ମେକ୍ସିକୋ ସୀମା ପ୍ରାଚୀର ପାଇଁ ପାଣ୍ଠି ନେଇ ବିବାଦ ସୃଷ୍ଟି ହୋଇଥିଲା।