ନୂଆଦିଲ୍ଲୀ: ଦଶମ ଓ ଦ୍ୱାଦଶ ଶ୍ରେଣୀର ବୋର୍ଡ ପରୀକ୍ଷା ପରେ ଛାତ୍ରଛାତ୍ରୀଙ୍କ ପାଇଁ ଏକ ଖୁସିଖବର। କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ଏଥର ପରୀକ୍ଷା ଫଳ ପ୍ରକାଶ ପୂର୍ବରୁ ମୂଲ୍ୟାୟନ ପ୍ରଣାଳୀରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛି।
ଏବେଠାରୁ ଛାତ୍ରଛାତ୍ରୀମାନେ ପ୍ରଥମେ ତାଙ୍କର ମୂଲ୍ୟାଙ୍କିତ ଉତ୍ତର ପତ୍ରର ଫଟୋକପି ଦେଖିପାରିବେ। ଏହାପରେ ସେମାନେ ଯଦି ମନେ କରନ୍ତି ଯେ ମାର୍କ ଯଥାଯଥି ମିଳିନାହିଁ, ତେବେ ସେମାନେ ପୁନଃମୂଲ୍ୟାୟନ ପାଇଁ ଆବେଦନ କରିପାରିବେ।
ଏହି ପରିବର୍ତ୍ତନର ପ୍ରଧାନ ଉଦ୍ଦେଶ୍ୟ ହେଉଛି ଛାତ୍ରଛାତ୍ରୀଙ୍କୁ ଅଧିକ ସ୍ବଚ୍ଛତା ଓ ଆତ୍ମନିର୍ଭରତା ପ୍ରଦାନ କରିବା। ସେମାନେ ଏବେ ସ୍ପଷ୍ଟ ଭାବେ ଦେଖିପାରିବେ କେଉଁ ପ୍ରଶ୍ନ ପାଇଁ କେତେ ମାର୍କ ମିଳିଛି ଓ କେଉଁଠି କମିଛି।
ପୂର୍ବରୁ ଯେଉଁଠି ପ୍ରଥମେ ମାର୍କ ଯାଞ୍ଚ ପାଇଁ ଆବେଦନ କରିବା ଲାଗିଥିଲା, ତା’ପରେ ଫଟୋକପି ମିଳୁଥିଲା, ଏବଂ ଶେଷରେ ହେଉଥିଲା ରିଭାଲ୍ୟୁଏସନ—ଏହି ପୁରା ପ୍ରକ୍ରିୟାକୁ ଏବେ ଉଲ୍ଟା କରାଯାଇଛି।
ଫଳାଫଳ ଘୋଷଣା ଖୁବ ଶୀଘ୍ର ହେବାକୁ ଯାଉଛି, ଏବଂ ଲକ୍ଷ-ଲକ୍ଷ ଛାତ୍ରଛାତ୍ରୀ ଏହି ପରିବର୍ତ୍ତିତ ପ୍ରଣାଳୀରୁ ଲାଭ ଉଠାଇପାରିବେ ବୋଲି CBSE ପକ୍ଷରୁ କୁହାଯାଇଛି।