🌪️ ବଙ୍ଗୋପସାଗରରୁ ମାଡ଼ି ଆସୁଛି ବାତ୍ୟା ‘ମନ୍ଥା’ — ଥାଇଲ୍ୟାଣ୍ଡ ଦେଇଛି ଏହି ନାମ, ଅର୍ଥ ‘ସୁନ୍ଦର ଫୁଲ’

ନୂଆଦିଲ୍ଲୀ: ବଙ୍ଗୋପସାଗରରେ ଆଉଥରେ ଘନୀଭୂତ ହେଉଛି ଏକ ସାମୁଦ୍ରିକ ନିମ୍ନଚାପ, ଯାହା ଆସନ୍ତା ୨୭ ତାରିଖ ସକାଳୁ ବାତ୍ୟାର ରୂପ ନେବ ବୋଲି ଭାରତୀୟ ପାଣିପାଗ ବିଭାଗ (IMD) ପୂର୍ବାନୁମାନ କରିଛି । ଏହି ସମ୍ଭାବ୍ୟ ବାତ୍ୟାର ନାମ ହେଉଛି ‘ମନ୍ଥା’, ଯାହା ଥାଇଲ୍ୟାଣ୍ଡ ଦେଶ ଦେଇଛି ।

ଥାଇ ଭାଷାରେ ‘ମନ୍ଥା’ର ଅର୍ଥ ହେଉଛି ସୁଗନ୍ଧିତ ବା ସୁନ୍ଦର ଫୁଲ । ପ୍ରତି ଥର ବାତ୍ୟା ଗଠିତ ହେଲେ ଏହାକୁ ଚିହ୍ନିତ କରିବା ଏବଂ ପାଣିପାଗ ବିଭାଗ ଏବଂ ସାଧାରଣ ଜନତାଙ୍କ ପାଇଁ ସୁବିଧାଜନକ କରିବା ପାଇଁ ନାମକରଣ କରାଯାଏ ।

ବିଶ୍ୱସ୍ତରରେ ବାତ୍ୟାର ନାମକରଣ ପ୍ରଥା ପ୍ରଥମେ ୧୯୫୩ ମସିହାରେ ଆଣ୍ଟଲାଣ୍ଟିକ ମହାସାଗରରେ ଆରମ୍ଭ ହୋଇଥିଲା । ପରେ ଭାରତ, ବାଂଲାଦେଶ, ଶ୍ରୀଲଙ୍କା ପରି ଦେଶ ଗୁଡିକ ଏହି ପ୍ରଣାଳୀକୁ ଅନୁସରଣ କରିଥିଲେ ।

ଭାରତ ମହାସାଗର ଅଞ୍ଚଳରେ ୨୦୦୪ ମସିହାରେ ୮ଟି ଦେଶ — ଭାରତ, ବାଂଲାଦେଶ, ମାଳଦ୍ୱୀପ, ଓମାନ, ପାକିସ୍ତାନ, ମିଆଁମାର, ଥାଇଲ୍ୟାଣ୍ଡ ଏବଂ ଶ୍ରୀଲଙ୍କା — ମିଶି ନାମକରଣ ପ୍ରଣାଳୀ ଆରମ୍ଭ କରିଥିଲେ । ପରେ ୨୦୧୮ରେ ଇରାନ, କତାର, ସାଉଦି ଆରବ, ୟମାନ ଓ ୟୁଏଇ ମଧ୍ୟ ଏଥିରେ ସାମିଲ ହୋଇଥିଲେ । ବର୍ତ୍ତମାନ ୧୩ଟି ଦେଶ ମିଶି ବାତ୍ୟା ନାମ ନିର୍ଦ୍ଧାରଣ କରନ୍ତି ।

ପ୍ରତି ଥର ବାତ୍ୟା ଗଠିତ ହେଲେ, ଅକ୍ଷରକ୍ରମ ଅନୁଯାୟୀ ଦେଶଗୁଡିକୁ ନାମ ପ୍ରସ୍ତାବ କରିବାର ଅବସର ମିଳେ । ଯେପରିକି ଗତ ଅକ୍ଟୋବରରେ ଶ୍ରୀଲଙ୍କା ଦେଇଥିଲା ବାତ୍ୟା ‘ଶକ୍ତି’ର ନାମ । ଏଥର ଥାଇଲ୍ୟାଣ୍ଡ ଦେଇଛି ‘ମନ୍ଥା’, ଯାହା ଶବ୍ଦରେ ଫୁଲ ର ସୌନ୍ଦର୍ଯ୍ୟ ଓ ଶାନ୍ତିର ସନ୍ଦେଶ ଥାଏ ।