ନୂଆପଡ଼ା, ୧୫ ଅକ୍ଟୋବର: ନୂଆପଡ଼ା ଉପନିର୍ବାଚନକୁ ନେଇ ବଡ଼ ଚମକ ଦେଇଛି ବିଜେଡି। ସମସ୍ତ ଅନୁମାନ ଓ ଚର୍ଚ୍ଚାର ଅନ୍ତ କରି ଦଳ ସ୍ନେହାଙ୍ଗିନୀ ଛୁରିଆଙ୍କୁ ନିଜ ପ୍ରାର୍ଥୀ ଭାବେ ଘୋଷଣା କରିଛି। ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏକ ଗୁରୁତ୍ୱପୂର୍ଣ୍ଣ ବୈଠକ ପରେ ଏହି ନିଷ୍ପତ୍ତି ନେଇଥିବା ସୂଚନା ମିଳିଛି।
ସ୍ନେହାଙ୍ଗିନୀ ଛୁରିଆ ପୂର୍ବରୁ ଅତାବିରାରୁ ଦୁଇଥର ବିଧାୟିକା ହୋଇଥିବା ସହିତ ଅଭିଜ୍ଞ ନେତୃତ୍ୱ ଭାବେ ଚିହ୍ନିତ। ଏହି ଘୋଷଣା ପରେ ଦଳ ମଧ୍ୟରେ ନୂତନ ଉତ୍ସାହ ଦେଖାଯାଇଛି।
ବିଜେଡିର ପ୍ରାର୍ଥୀ ଘୋଷଣା ପୂର୍ବରୁ ମନୋଜ ମିଶ୍ର, ଭାନୁ ପ୍ରତାପ ସିଂ ମାଝୀ, ତାରେଶ୍ୱରୀ ସାହୁ ଏବଂ ରମାକାନ୍ତ ଠାକୁରଙ୍କ ନାମ ଆଗରେ ଆସିଥିଲା। ତଥାପି ନବୀନ ପଟ୍ଟନାୟକ ସମସ୍ତଙ୍କୁ ଅପେକ୍ଷିତ ଭାବରେ ଅଶ୍ଚର୍ଯ୍ୟ କରି ସ୍ନେହାଙ୍ଗିନୀଙ୍କୁ ବାଛିଛନ୍ତି।
ନୂଆପଡ଼ା ନିର୍ବାଚନ ମଣ୍ଡଳୀରେ ମୋଟ ୨,୫୩,୬୨୪ ଭୋଟ ଅଛି, ଯେଉଁଥିରୁ ପ୍ରାୟ ୬୦ ପ୍ରତିଶତ ଭୋଟ ଆଦିବାସୀ ଶ୍ରେଣୀର। ଏହି ଅଞ୍ଚଳରେ ଆଦିବାସୀ ଭୋଟ ନିଷ୍ପତ୍ତିକାରୀ ଭୂମିକା ନେବ ବୋଲି ଅନୁମାନ କରାଯାଉଛି।
ଏପରି ସମୟରେ କଂଗ୍ରେସ ଘାସିରାମ ମାଝୀ ଏବଂ ଭାଜପା ଜୟ ଢୋଲକିଆଙ୍କୁ ପ୍ରାର୍ଥୀ କରିଛି। ବିଜେଡି ଏବେ ସ୍ନେହାଙ୍ଗିନୀ ଛୁରିଆଙ୍କୁ ମଞ୍ଚରେ ଆଣିଥିବାରୁ ତିନୋଟି ଦଳ ମଧ୍ୟରେ ହେବ ତିବ୍ର ରଣ। ଏବେ ସମସ୍ତଙ୍କ ଦୃଷ୍ଟି ରହିଛି — ନୂଆପଡ଼ାରେ ବିଜୟ ରାଜତିଳକ କିଏ ପାଇବେ।