ଭୁବନେଶ୍ୱର: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ୨୦୨୬–୨୭ ମସିହାର ବଜେଟ୍ ଘୋଷଣାରେ ଜଳମାର୍ଗ ବିକାଶକୁ ନେଇ ହୋଇଥିବା ପଦକ୍ଷେପ ଓଡ଼ିଶା ପାଇଁ ଗୁରୁତ୍ୱପୂର୍ଣ୍ଣ ଲାଭ ଆଣିବ ବୋଲି ମନ୍ତବ୍ୟ କରାଯାଉଛି। ଆସନ୍ତା ପାଞ୍ଚ ବର୍ଷ ମଧ୍ୟରେ ୨୦ଟି ନୂଆ ଜାତୀୟ ଜଳମାର୍ଗକୁ କାର୍ଯ୍ୟକାରୀ କରିବା ଯୋଜନାରେ ଓଡ଼ିଶାର ଜାତୀୟ ଜଳମାର୍ଗ–୫ କୁ ସମ୍ମିଳିତ କରାଯାଇଛି।
ଏହି ଜଳମାର୍ଗ ତାଳଚେର ଓ ଅନୁଗୁଳ ଭଳି ଖଣି ସମୃଦ୍ଧ ଅଞ୍ଚଳକୁ କଳିଙ୍ଗନଗର ଶିଳ୍ପକ୍ଷେତ୍ର ସହିତ ପାରାଦୀପ ଓ ଧାମରା ବନ୍ଦର ସହ ଯୋଡ଼ିବ। ଏଥିପରି ସଂଯୋଗ ଦ୍ୱାରା କୋଇଲା ଓ ଅନ୍ୟାନ୍ୟ କଚ୍ଚାମାଳକୁ ଜଳପଥ ମାଧ୍ୟମରେ ଶିଳ୍ପ କେନ୍ଦ୍ର ଏବଂ ବନ୍ଦରକୁ ପହଞ୍ଚାଇବା ସହଜ ହେବ। ଶିଳ୍ପ ସଂସ୍ଥାମାନେ ତାଙ୍କର ଚୂଡ଼ାନ୍ତ ଉତ୍ପାଦ ମଧ୍ୟ ପରିବେଶ-ବନ୍ଧୁ ପରିବହନ ବ୍ୟବସ୍ଥାରେ ପଠାଇ ପାରିବେ।
ଏହା ଦ୍ୱାରା ସଡ଼କ ଓ ରେଳପଥ ଉପରେ ଭାରି ଯାନ ଚାପ କମିବା ସହ ପ୍ରଦୂଷଣ ମଧ୍ୟ ହ୍ରାସ ପାଇବ ବୋଲି ଆଶା କରାଯାଉଛି। ଜାତୀୟ ରାଜପଥ ଓ ରାଜ୍ୟ ସଡ଼କରେ ଯାତାୟାତ ଭିଡ଼ କମିବାର ସମ୍ଭାବନା ରହିଛି।
ବଜେଟ୍ରେ ରେୟାର୍ ଆର୍ଥ ଖଣିଜକୁ ନେଇ ମଧ୍ୟ ବିଶେଷ ଘୋଷଣା ହୋଇଛି। ଓଡ଼ିଶା ସହ କେରଳ, ଆନ୍ଧ୍ରପ୍ରଦେଶ ଓ ତାମିଳନାଡୁରେ ଡେଡିକେଟେଡ୍ ରେୟାର୍ ଆର୍ଥ କରିଡର୍ ସ୍ଥାପନ ଯୋଜନା ରହିଛି। ଏହା ଖଣନ, ପ୍ରକ୍ରିୟାକରଣ, ଗବେଷଣା ଓ ଉତ୍ପାଦନକୁ ଗତି ଦେବ। ଇଲେକ୍ଟ୍ରିକ୍ ଯାନ, ସୌର ପ୍ରକଳ୍ପ ଓ ଇଲେକ୍ଟ୍ରୋନିକ୍ସ ଶିଳ୍ପରେ ଏହି ଖଣିଜର ବ୍ୟବହାର ବଢ଼ୁଥିବାରୁ ଓଡ଼ିଶା ପାଇଁ ନୂଆ ପୁଞ୍ଜିନିବେଶ ସୁଯୋଗ ଉଦ୍ଘାଟିତ ହେବ।
ପର୍ଯ୍ୟଟନ କ୍ଷେତ୍ରରେ ମଧ୍ୟ ରାଜ୍ୟକୁ ଲାଭ ମିଳିବ। ଓଡ଼ିଶା, କର୍ଣ୍ଣାଟକ ଓ କେରଳର ଉପକୂଳ ଅଞ୍ଚଳରେ କଇଁଛଙ୍କ ଅଣ୍ଡାଦାନ ସ୍ଥଳଗୁଡ଼ିକୁ ବିକାଶ କରିବା ଯୋଜନା ରହିଛି। ଉପକୂଳ କାର୍ଗୋ ପ୍ରୋତ୍ସାହନ ଯୋଜନା ମାଧ୍ୟମରେ ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ଜଳ ଯାତାୟାତ ବୃଦ୍ଧି ପାଇବ।
ଏହା ସହିତ ପୂର୍ବୋଦୟ ରାଜ୍ୟଗୁଡ଼ିକ ପାଇଁ ପର୍ଯ୍ୟଟନ ଓ ପରିବହନ ଢାଞ୍ଚା ବିକାଶ ଉଦ୍ୟମ ଘୋଷଣା ହୋଇଛି। ୫ଟି ପର୍ଯ୍ୟଟନ ସ୍ଥଳ ବିକାଶ ଓ ୪୦୦୦ ଇ-ବସ୍ ଚଳାଚଳ ଯୋଜନାରୁ ମଧ୍ୟ ଓଡ଼ିଶା ଉପକୃତ ହେବ। ନଡ଼ିଆ ଓ କାଜୁ ଚାଷ ପ୍ରୋତ୍ସାହନ ଯୋଜନା ସହ ଅର୍ଥାୟୋଗ ଅନୁଦାନରୁ ମଧ୍ୟ ରାଜ୍ୟକୁ ଅତିରିକ୍ତ ସହାୟତା ମିଳିବ।