ଓଡ଼ିଶା ସରକାରଙ୍କ ସହଯୋଗରେ ହେବ ‘ଭାରତ ଆନ୍ତର୍ଜାତୀୟ ଚାଉଳ ସମ୍ମିଳନୀ 2025’; ରପ୍ତାନି ଓ ସ୍ଥାୟୀ କୃଷିରେ ନୂଆ ଅଧ୍ୟାୟ

ନୂଆଦିଲ୍ଲୀ/ଭୁବନେଶ୍ୱର: ଓଡ଼ିଶା ସରକାର ଭାରତୀୟ ଚାଉଳ ରପ୍ତାନିକାରୀ ମହାସଂଘ (IREF) ସହିତ ଏକତାବଦ୍ଧ ହୋଇ ଭାରତ ଆନ୍ତର୍ଜାତୀୟ ଚାଉଳ ସମ୍ମିଳନୀ (BIRC) 2025 ପାଇଁ ସହଯୋଗ ଘୋଷଣା କରିଛନ୍ତି। ଏହି ଦୁଇଦିନିଆ ଆନ୍ତର୍ଜାତୀୟ ମେଗା ସମ୍ମିଳନୀ ଅକ୍ଟୋବର 30 ଓ 31 ତାରିଖରେ ନୂଆଦିଲ୍ଲୀର ଭାରତ ମଣ୍ଡପମରେ ଆୟୋଜିତ ହେବ।

ଆୟୋଜକମାନଙ୍କ ଅନୁସାରେ, ଏହି ସହଭାଗୀତା ଭାରତର ଚାଉଳ ଶିଳ୍ପକୁ ବିଶ୍ୱ ମାନଚିତ୍ରରେ ନୂତନ ଚିହ୍ନ ଦେବା ସହିତ, ଓଡ଼ିଶାର ଆନ୍ତର୍ଜାତୀୟ ଚାଉଳ ବାଣିଜ୍ୟରେ ଅବଦାନକୁ ବଢ଼ାଇବ। ଧାନ ଚାଷରେ ବିବିଧତା ଓ ସ୍ୱଦେଶୀ ପ୍ରଜାତିରେ ଅଗ୍ରଗାମୀ ଓଡ଼ିଶା, BIRC ପ୍ଲାଟଫର୍ମ ମାଧ୍ୟମରେ ନିଜର ପ୍ରଗତିଶୀଳ କୃଷି ନୀତି, କୃଷକ କଲ୍ୟାଣ ଯୋଜନା ଏବଂ ଜଳବାୟୁ-ପ୍ରତିରୋଧୀ ଧାନ ପ୍ରଜାତିଗୁଡ଼ିକୁ ଦେଶ-ବିଦେଶରେ ଉପସ୍ଥାପନ କରିବ।

ଓଡ଼ିଶା ସରକାର ଏହି ମେଗା ଇଭେଣ୍ଟରେ “ଭାରତୀୟ ଚାଉଳ” ଉପରେ ଏକ କଫି ଟେବୁଲ ବୁକ୍ ପ୍ରସ୍ତୁତିରେ ମଧ୍ୟ ଅବଦାନ ଦେବ। ସେଥିସହିତ, ବିକଶିତ ଭାରତ 2047 ଦୃଷ୍ଟିକୋଣକୁ ସାର୍ଥକ କରିବା ପାଇଁ ଚାଉଳ କ୍ଷେତ୍ରର ସ୍ଥାୟୀ ବିକାଶ ଉପରେ ଏକ ବ୍ଲୁପ୍ରିଣ୍ଟ ମଧ୍ୟ ତିଆରି କରାଯିବ।

ଶ୍ରୀ ଲାଲ ମହଲ ଗ୍ରୁପ ଏବଂ IREFର ଜାତୀୟ ସଭାପତି ପ୍ରେମ ଗର୍ଗ କହିଛନ୍ତି, “BIRC-2025 ପାଇଁ ଓଡ଼ିଶା ସରକାରଙ୍କ ସମର୍ଥନ ଭାରତୀୟ ଚାଉଳ କ୍ଷେତ୍ର ପାଇଁ ଏକ ଐତିହାସିକ ପଦକ୍ଷେପ। ଏହା ଆମ କୃଷି ଅର୍ଥନୀତିରେ ସମବାୟ ଏବଂ ତୃଣମୂଳ ସ୍ତରର ଅବଦାନକୁ ନୂଆ ଗତି ଦେବ।”

BIRC-2025ରେ 80ରୁ ଅଧିକ ଦେଶରୁ ଆସିବାକୁ ଥିବା 1,000ରୁ ଅଧିକ ଆନ୍ତର୍ଜାତୀୟ କ୍ରେତା, 2,500 ଭାରତୀୟ ରପ୍ତାନିକାରୀ, 5,000 ଚାଷୀ ଓ ଗବେଷକ, ଆର୍ଥିକ ପ୍ରତିଷ୍ଠାନ, ଲଜିଷ୍ଟିକ୍ସ ଏବଂ କୃଷି-ପ୍ରଯୁକ୍ତି ସଂସ୍ଥା ସମେତ 200ରୁ ଅଧିକ ପ୍ରତିଷ୍ଠାନ ଯୋଗଦେବେ ବୋଲି ଆଶା କରାଯାଉଛି।