ଆଉ କିଛି ସମୟ ମଧ୍ୟରେ ଚାଲୁ ହେବ ମକ୍ ଡ୍ରିଲ, ଓଡ଼ିଶାର ଏହି୧୨ଟି ସ୍ଥାନରେ ଅପରାହ୍ଣ ୪ଟାରେ ବାଜିବ ସାଇରନ୍

ଭୁବନେଶ୍ୱର, ୭ ମଇ – ପାକିସ୍ତାନ ସହ ଭାରତର ବର୍ତ୍ତମାନ ଉତ୍ତେଜନାପୂର୍ଣ୍ଣ ପରିସ୍ଥିତି ଓ ପହଲଗାମ ଆକ୍ରମଣ ପରେ ସମ୍ଭାବ୍ୟ ଯୁଦ୍ଧ ପ୍ରସ୍ତୁତିକୁ ଦୃଷ୍ଟିରେ ରଖି ଓଡ଼ିଶାର ୧୨ଟି ସ୍ଥାନରେ ନାଗରିକ ସୁରକ୍ଷା ମକ୍ ଡ୍ରିଲ୍ ଆୟୋଜିତ ହେବ। ଏହି ମକ୍ ଡ୍ରିଲ୍ ବୁଧବାର ଅପରାହ୍ଣ ୪ଟାରେ ଆରମ୍ଭ ହେବ ଓ ସାଇରନ୍ ବାଜିବା ସହ ସ୍ଥାନୀୟ ଲୋକଙ୍କୁ ସତର୍କ କରାଯିବ।

ଅଗ୍ନିଶମ ବିଭାଗର ମହାନିର୍ଦ୍ଦେଶକ (DG Fire Services) ଜଣାଇଛନ୍ତି ଯେ, ଏହି ଅଭ୍ୟାସର ଲକ୍ଷ୍ୟ ହେଉଛି ସାଧାରଣ ଲୋକଙ୍କୁ ଯୁଦ୍ଧ ସମ୍ଭାବନା ଦୃଷ୍ଟିରେ ସଚେତନ କରିବା ଓ ପ୍ରସ୍ତୁତ ରଖିବା। ସେ କହିଛନ୍ତି ଯେ ଆଗାମୀ ଦିନରେ ଗାଁ ଗାଁରେ ମଧ୍ୟ ଏଭଳି ମକ୍ ଡ୍ରିଲ୍ କରାଯିବ।

କେଉଁଠି କେଉଁ ଶ୍ରେଣୀର ମକ୍ ଡ୍ରିଲ୍?

ଅଧିକାରିକ ସୂଚନା ଅନୁଯାୟୀ, ଓଡ଼ିଶାର ୧୨ଟି ସ୍ଥାନକୁ ତିନିଟି ଶ୍ରେଣୀରେ ବାଣ୍ଟାଯାଇଛି:

• କାଟେଗୋରି-୧: ତାଳଚେର
• କାଟେଗୋରି-୨: ବାଲେଶ୍ୱର, କୋରାପୁଟ, ଭୁବନେଶ୍ୱର, ଗୋପାଳପୁର, ହୀରାକୁଦ, ପାରାଦୀପ, ରାଉରକେଲା
• କାଟେଗୋରି-୩: ଭଦ୍ରକ, ଢେଙ୍କାନାଳ, ଜଗତସିଂପୁର, କେନ୍ଦ୍ରାପଡ଼ା

ମକ୍ ଡ୍ରିଲ୍‌ରେ କେଉଁମାନେ ଅଂଶ ନେବେ?

ଏହି ସିଭିଲ ଡିଫେନ୍ସ ମକ୍ ଡ୍ରିଲ୍ ସପ୍ତାହପାଇଁ ଚାଲିବ ଓ ଏଥିରେ NCC, ସ୍ବେଚ୍ଛାସେବୀ ସଂଗଠନ ଓ ଆପଦାମିତ୍ରମାନେ ଅଂଶ ନେବେ। ପୂର୍ବରୁ ଭୁବନେଶ୍ୱର ଓ ଅନୁଗୁଳରେ ପ୍ରି-ମକ୍ ଡ୍ରିଲ୍ ବ୍ୟବସ୍ଥିତ ଭାବେ ଆୟୋଜିତ ହୋଇଛି।