ଭୁବନେଶ୍ୱର: ସହରବାସୀଙ୍କ ଦୈନନ୍ଦିନ ସମସ୍ୟାକୁ ଦ୍ରୁତ ସମାଧାନ ପାଇଁ ରାଜ୍ୟ ସରକାର ‘ସହର ସାଥୀ’ ନାମରେ ଏକ ନୂଆ ସୁବିଧା ଆରମ୍ଭ କରିଛି। ରାଜ୍ୟସ୍ତରୀୟ ସ୍ୱାୟତ୍ତ ଶାସନ ଦିବସ ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହାର ଲୋକାର୍ପଣ କରିଛନ୍ତି।
‘ସହର ସାଥୀ’ ମାଧ୍ୟମରେ ନାଗରିକମାନେ ୧୯୨୯ ଟୋଲ୍-ଫ୍ରି ନମ୍ବରକୁ ଡାକି ସିଧାସଳଖ ଅଭିଯୋଗ, ପ୍ରଶ୍ନ ଓ ପ୍ରସ୍ତାବ ଦାଖଲ କରିପାରିବେ। ଏହି ସେବା ୨୪ ଘଣ୍ଟା ଉପଲବ୍ଧ ରହିବା ସହିତ ପୌରପାଳିକା କାର୍ଯ୍ୟାଳୟକୁ ସରାସରି ଯିବାର ଆବଶ୍ୟକତା ରହିବ ନାହିଁ।
ଲୋକାର୍ପଣ ସମାରୋହରେ ମୁଖ୍ୟମନ୍ତ୍ରୀ କହିଛନ୍ତି, “ଆମର ପ୍ରାଥମିକ ଲକ୍ଷ୍ୟ ହେଉଛି ଲୋକଙ୍କୁ ମୌଳିକ ସୁବିଧା ସମୟରେ ପ୍ରଦାନ କରି ସେମାନଙ୍କ ଜୀବନକୁ ସ୍ବଚ୍ଛନ୍ଦ, ସାବଲିଳ ଏବଂ ସହଜ କରିବା।”
‘ସହର ସାଥୀ’ ସେବା ଆରମ୍ଭ ହେବା ସହିତ ଉତ୍ତମ ନଗର ପରିଚାଳନା ଓ ଦ୍ରୁତ ସମାଧାନମୂଳକ ସେବା ପ୍ରଦାନରେ ଏହାକୁ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ମନାଯାଉଛି।