ଏସ୍ଆଇ ନିଯୁକ୍ତି ଘୋଟାଲାରେ ନୂଆ ଖୁଲାସା: ବରିଷ୍ଠ ପୋଲିସ ଅଧିକାରୀଙ୍କ ନାଁ ଶାମିଲ୍, ପୂର୍ବତନ ଡିଆଇଜିଙ୍କ ପୁଅ ଗିରଫ
ଭୁବନେଶ୍ୱର, ୭ ଅକ୍ଟୋବର: ଓଡ଼ିଶା ପୋଲିସ ସବ୍-ଇନ୍ସପେକ୍ଟର (ଏସ୍ଆଇ) ନିଯୁକ୍ତି ପରୀକ୍ଷା ଘୋଟାଲା ଦିନକୁ ଦିନ ନୂଆ ରୂପ ନେଉଛି। କ୍ରାଇମ୍ ବ୍ରାଞ୍ଚ୍ ତଦନ୍ତରେ ଏବେ ପୂର୍ବତନ ଡିଆଇଜି କୁଳମଣି ବେହେରାଙ୍କ ପୁଅ ଅମୀୟ ବେହେରାଙ୍କୁ ଗିରଫ କରାଯାଇଛି। ତଦନ୍ତରେ ଜଣାପଡ଼ିଛି ଯେ, ଏହି ଘୋଟାଲାରେ ବରିଷ୍ଠ ପୋଲିସ ଅଧିକାରୀମାନଙ୍କ ମଧ୍ୟରୁ ଅନେକଙ୍କ ସିଧାସଳଖ ଜଡିତା ରହିଛି।
ସୂତ୍ର ଅନୁଯାୟୀ, ଏସ୍ଆଇ ପରୀକ୍ଷା ଆୟୋଜନରେ ସଂପୃକ୍ତ ସିଲିକନ୍ ଟେକ୍ ଲ୍ୟାବ୍ ଓ ପଞ୍ଚସଫ୍ଟ୍ ନାମକ ଘରୋଇ ସଂସ୍ଥାକୁ ବରିଷ୍ଠ ପୋଲିସ ଅଧିକାରୀମାନେ ବାରମ୍ବାର ଯାଇ ମାଲିକଙ୍କ ସହ ଦୀର୍ଘ ଆଲୋଚନା କରୁଥିଲେ। ତଦନ୍ତ ରିପୋର୍ଟ ଅନୁସାରେ, ଏହି ସଂସ୍ଥାଗୁଡ଼ିକ ଇନ୍ଫୋସିଟି ଅଞ୍ଚଳରେ ଥିବା ସାଇବର ସିଟି କ୍ଷେତ୍ରରେ କାର୍ଯ୍ୟାଳୟ ଚାଳାଉଥିଲେ।
ଏହି ଘୋଟାଲାର ମୁଖ୍ୟ ଅଭିଯୁକ୍ତ ଶଙ୍କର ପୃଷ୍ଟିଙ୍କ ଫଟୋ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସହ ଓ ଅନ୍ୟ ରାଜନେତାଙ୍କ ସହ ଭାଇରାଲ ହେବା ପରେ ତଦନ୍ତ ଆରୋ ଗଭୀର ହୋଇଛି।
ପୂର୍ବତନ ଡିଆଇଜି କୁଳମଣି ବେହେରା, ଯିଏ ୧୯୯୩ରେ ଆସିଷ୍ଟାଣ୍ଟ ଜେଲର ଭାବେ ଚାକିରି ଆରମ୍ଭ କରି ୨୦୨୧ରେ ଡିଆଇଜି ହୋଇଥିଲେ, ସେ ୨୦୨୫ ମାର୍ଚ୍ଚରେ ଅବସର ନେଇଥିଲେ। ତାଙ୍କ ସେବା କାଳରେ ଅନେକ ଅବୈଧ ସମ୍ପତ୍ତି ସଂଗ୍ରହ କରିଥିବା ଅଭିଯୋଗ ହୋଇଛି। ତାଙ୍କ ପୁଅ ଅମୀୟ ବେହେରାଙ୍କୁ ଏସ୍ଆଇ ପଦ ପାଇଁ ୨୫ ରୁ ୩୦ ଲକ୍ଷ ଟଙ୍କା ଦେଇଥିବା ଜଣାପଡ଼ିଛି।
ଗୋଇନ୍ଦା ବିଭାଗ ଦ୍ୱାରା ଏକ ରିପୋର୍ଟ ରାଜ୍ୟ ପୋଲିସ ଡିଜିଙ୍କୁ ଦାଖଲ କରାଯାଇଛି, ଯେଉଁଥିରେ ଅନେକ ବରିଷ୍ଠ ଅଧିକାରୀଙ୍କ ନାମ ତାଲିକାଭୁକ୍ତ ହୋଇଛି। ଏହି ମହାଘୋଟାଲାର ମୁଖ୍ୟ ଅଭିଯୁକ୍ତ ଶଙ୍କର ପୃଷ୍ଟି ଏବେ ପର୍ଯ୍ୟନ୍ତ ଫେରାର ଅବସ୍ଥାରେ ଥିବା ବେଳେ, କ୍ରାଇମ୍ ବ୍ରାଞ୍ଚ୍ର ତିନିଟି ଟିମ୍ ତାଙ୍କୁ ଧରିବା ପାଇଁ ରାଜ୍ୟ ବାହାରରେ ଅଭିଯାନ ଜାରି ରଖିଛି।
ଶଙ୍କର ତାଙ୍କ ପତ୍ନୀଙ୍କ ନାମରେ ‘କେଦାରନାଥ ଟେକ୍ନୋଲୋଜି’ ନାମକ ଏକ କୋଚିଂ ସେଣ୍ଟର ଚାଳାଉଥିବା ଓ ବରିଷ୍ଠ ଅଧିକାରୀଙ୍କ ସହଯୋଗରେ ଏହା ଚାଲିଥିବା ସୂଚନା ମିଳିଛି। ବର୍ତ୍ତମାନ ଏହି ମହାଦୁର୍ନୀତି ଘଟଣାର ସମ୍ପୂର୍ଣ୍ଣ ତଦନ୍ତ ଜାରି ରହିଛି।