ଭୁବନେଶ୍ୱର: ରାଜ୍ୟର ବିଜେପି ସରକାର ବିଶ୍ୱ ବ୍ୟାଙ୍କ ଟିମ୍ ସମ୍ମୁଖରେ ଓଡ଼ିଶାର ଅର୍ଥନୈତିକ ପରିସ୍ଥିତି ସମ୍ବନ୍ଧରେ ଭୁଲ ତଥ୍ୟ ଉପସ୍ଥାପନ କରି ଲୋକଙ୍କୁ ବିଭ୍ରାନ୍ତ କରୁଥିବା ଅଭିଯୋଗ କରିଛି ବିଜୁ ଜନତା ଦଳ (ବିଜେଡି)। ଗତ ୧୮ ମାସ ମଧ୍ୟରେ ବିଭିନ୍ନ କ୍ଷେତ୍ରରେ ରାଜ୍ୟର ପରିସ୍ଥିତି ଅବନତି ହୋଇଥିବା ବୋଲି ଦଳ ପକ୍ଷରୁ ଦାବି କରାଯାଇଛି।
ବିଶ୍ୱ ବ୍ୟାଙ୍କ ଗ୍ରୁପ୍ର ସଭାପତି ଅଜୟ ବଙ୍ଗା ଭୁବନେଶ୍ୱରର ଲୋକସେବା ଭବନରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସହ ରାଜ୍ୟର ଦୀର୍ଘକାଳୀନ ବିକାଶ, ଅର୍ଥନୈତିକ ସଂସ୍କାର ଓ ନିଯୁକ୍ତି ସୃଷ୍ଟି ନେଇ ଆଲୋଚନା କରିଥିଲେ। ଏହି ସନ୍ଦର୍ଭରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ପ୍ରେସ ବିଜ୍ଞପ୍ତି ଜାରି ହୋଇଥିଲା।
ଏହା ପରେ ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ବିଜେଡିର ବରିଷ୍ଠ ସାଧାରଣ ସମ୍ପାଦକ ଓ ପୂର୍ବତନ ମନ୍ତ୍ରୀ ପ୍ରୀତିରଞ୍ଜନ ଘଡ଼ାଇ କହିଥିଲେ ଯେ, ବର୍ତ୍ତମାନ ସରକାର ଓଡ଼ିଶାର ଅର୍ଥନୀତି ସମ୍ପର୍କରେ ଗୋଲାପୀ ଚିତ୍ର ପ୍ରଦର୍ଶନ କରି ବିଶ୍ୱ ବ୍ୟାଙ୍କ ଟିମ୍ ସହିତ ରାଜ୍ୟବାସୀଙ୍କୁ ଭ୍ରମିତ କରୁଛନ୍ତି। ସେ କହିଛନ୍ତି ଯେ, ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ସରକାର ସମୟରେ ଓଡ଼ିଶା ନୀତି ଆୟୋଗର ଆର୍ଥିକ ପରିଚାଳନା ସୂଚକାଙ୍କରେ ଦେଶରେ ପ୍ରଥମ ସ୍ଥାନ ଅଧିକାର କରିଥିଲା। ସେ ସମୟରେ ରାଜ୍ୟର ଋଣ ଭାର ସବୁଠୁ କମ୍ ଥିବା ସହ ୨୪ ବର୍ଷରେ ମୋଟ ଋଣ ପ୍ରାୟ ୭୮ ହଜାର କୋଟି ଟଙ୍କା ଥିଲା।
ବିଜେଡି ଅଭିଯୋଗ କରିଛି ଯେ, ବିଜେପି ସରକାର ଶାସନରେ ଆସିବା ପରେ ଅର୍ଥନୈତିକ ପରିଚାଳନାରେ ଅବନତି ଦେଖାଯାଇଛି। ଗତ ୧୮ ମାସରେ ପ୍ରାୟ ୯୧ ହଜାର କୋଟି ଟଙ୍କା ଋଣ ନିଆଯାଇଥିବା ବେଳେ, ତାହାର ୩୮ ପ୍ରତିଶତ ଖୋଲା ବଜାରରୁ ନିଆଯାଇଥିବା ଦାବି କରାଯାଇଛି। ଏହା ସହିତ ବିତ୍ତୀୟ ନିଅଣ୍ଟ ହାର ୧.୭ ପ୍ରତିଶତରୁ ବଢ଼ି ୩.୫ ପ୍ରତିଶତକୁ ପହଞ୍ଚିଥିବା ବେଳେ ପ୍ରାଥମିକ ନିଅଣ୍ଟ ମଧ୍ୟ ୧.୧ ପ୍ରତିଶତରୁ ବଢ଼ି ୨.୯ ପ୍ରତିଶତ ହୋଇଛି।
ଦଳ ପକ୍ଷରୁ ଆହୁରି କୁହାଯାଇଛି ଯେ, ରାଜ୍ୟର ଜିଏସ୍ଡିପି ବୃଦ୍ଧି ହାର ୯.୬ ପ୍ରତିଶତରୁ କମି ୭.୨ ପ୍ରତିଶତ ହୋଇଥିବା ବେଳେ କୃଷି, ଶିଳ୍ପ ଓ ସେବା କ୍ଷେତ୍ରରେ ମଧ୍ୟ ବୃଦ୍ଧି ହାର କମିଛି। ଏହା ସହ ନୀତି ଆୟୋଗର ରପ୍ତାନି ପ୍ରସ୍ତୁତି ସୂଚକାଙ୍କ ଓ ଜାତୀୟ ଷ୍ଟାର୍ଟଅପ୍ ରାଙ୍କିଙ୍ଗରେ ଓଡ଼ିଶାର ସ୍ଥାନ ଗତ କିଛି ବର୍ଷରେ ନିମ୍ନମୁଖୀ ହୋଇଥିବା ଉଲ୍ଲେଖ କରାଯାଇଛି।
ବିଜେଡି ଚେତାବନୀ ଦେଇ କହିଛି ଯେ, ଯଦି ଏହି ଅବନତି ଧାରା ଜାରି ରହେ, ତେବେ ୨୦୩୬ ସୁଦ୍ଧା ବିକଶିତ ଓଡ଼ିଶା ଗଠନର ଲକ୍ଷ୍ୟ ପୂରଣ କରିବା କଷ୍ଟକର ହେବ। ରାଜ୍ୟ ସରକାର ଲୋକଙ୍କ ସମ୍ମୁଖରେ ସଠିକ୍ ତଥ୍ୟ ଉପସ୍ଥାପନ କରିବାକୁ ଦଳ ଆହ୍ୱାନ କରିଛି।