ବିହାରରେ ନିର୍ବାଚନୀ ଚର୍ଚ୍ଚା: ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ତେଜସ୍ୱୀଙ୍କୁ ସମର୍ଥନ କଲେ କଂଗ୍ରେସ ସାଂସଦ

ପାଟନା, ୧୯ ସେପ୍ଟେମ୍ବର: ବିହାର ବିଧାନସଭା ନିର୍ବାଚନ ପାଇଁ ଅଧିକୃତ ଘୋଷଣା ହୋଇନଥିଲେ ମଧ୍ୟ, ରାଜନୈତିକ ଦଳମାନେ ପ୍ରଚାର ଏବଂ ରଣନୀତିରେ ବ୍ୟସ୍ତ ହୋଇପଡ଼ିଛନ୍ତି। କଂଗ୍ରେସ-ଆରଜେଡି ମହାଗଠବନ୍ଧନ କିପରି କ୍ଷମତାକୁ ଅଧିଗ୍ରହଣ କରିବ, ସେଥିରେ ଚେଷ୍ଟା ଜାରି ରହିଛି; ଏପରିସ୍ଥିତିରେ ଏନଡିଏ ମଧ୍ୟ ପ୍ରତିରୋଧୀ ରଣନୀତି ଗଠନ କରୁଛି।

ତଥାପି, ମହାଗଠବନ୍ଧନର ମୁଖ୍ୟମନ୍ତ୍ରୀ ଚେହେରା କିଏ ହେବ, ଏହାକୁ ନେଇ ଗତ କିଛି ସପ୍ତାହ ଧରି ରାଜନୀତିକ ମହଳରେ ଚର୍ଚ୍ଚା ଜୋରଧରିଥିଲା। କଂଗ୍ରେସ ହାଇକମାଣ୍ଡ ଏହିବିଷୟରେ ଏପର୍ଯ୍ୟନ୍ତ ସ୍ପଷ୍ଟ ମତ ଦେଇନଥିଲେ, ବରିଷ୍ଠ କଂଗ୍ରେସ ସାଂସଦ ଅଖିଳେଶ ପ୍ରସାଦ ସିଂହ ସାମ୍ନାକୁ ଆସି ତେଜସ୍ୱୀ ଯାଦବଙ୍କୁ ସମର୍ଥନ କରିଛନ୍ତି।

ସେ ସ୍ପଷ୍ଟ କରିଛନ୍ତି – “ଅନ୍ୟ କୌଣସି ବିକଳ୍ପ ନାହିଁ, ତେଜସ୍ୱୀ ଯାଦବଙ୍କୁ ମହାଗଠବନ୍ଧନର ମୁଖ୍ୟମନ୍ତ୍ରୀ ପ୍ରାର୍ଥୀ କରିବା ଉଚିତ।” ସେଥିସହ ତାଙ୍କୁ ବିହାରରେ ବିକାଶ ଓ ପରିବର୍ତ୍ତନର ପ୍ରତୀକ ବୋଲି ବର୍ଣ୍ଣନା କରିଛନ୍ତି।

ଅଖିଳେଶ ପ୍ରସାଦ ସିଂହଙ୍କ କଥାରେ, ମହାଗଠବନ୍ଧନର ସମସ୍ତ ସାଥୀଦଳ ଏକାଠି ହୋଇ ତେଜସ୍ୱୀଙ୍କୁ ମୁଖ୍ୟମନ୍ତ୍ରୀ ଚେହେରା କରିବା ଉଚିତ। ସେ ଏହାମଧ୍ୟ ସ୍ପଷ୍ଟ କରିଛନ୍ତି ଯେ, ଏହି ଗଠବନ୍ଧନରେ ତେଜସ୍ୱୀଙ୍କୁ ଛାଡ଼ି ଅନ୍ୟ କୌଣସି ନେତାଙ୍କୁ ସେହି ସ୍ଥାନ ପାଇଁ ବିଚାର କରାଯାଉନାହିଁ।