ଦିଲ୍ଲୀରେ ରାହୁଲ ଓ ଖଡ଼ଗେଙ୍କ ସହ ଡିକେ ଶିବକୁମାରଙ୍କ ସାକ୍ଷାତ: କର୍ଣ୍ଣାଟକ ମୁଖ୍ୟମନ୍ତ୍ରୀ ପଦକୁ ନେଇ ଚର୍ଚ୍ଚା ତେଜ

ନୂଆଦିଲ୍ଲୀ: କର୍ଣ୍ଣାଟକର ରାଜନୀତିରେ ମୁଖ୍ୟମନ୍ତ୍ରୀ ପଦକୁ ନେଇ ଚାଲିଥିବା ଆଲୋଚନା ମଧ୍ୟରେ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ଆଜି ନୂଆଦିଲ୍ଲୀରେ ବରିଷ୍ଠ କଂଗ୍ରେସ ନେତା ଓ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ସହ ଦଳର ଜାତୀୟ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କୁ ଭେଟିଛନ୍ତି। ଏହି ସାକ୍ଷାତକୁ କର୍ଣ୍ଣାଟକର ଚଳିତ ରାଜନୈତିକ ପରିସ୍ଥିତି ପରିପ୍ରେକ୍ଷିତରେ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଉଛି।

ଦଳ ପକ୍ଷରୁ ବୈଠକ ସମ୍ପର୍କରେ କୌଣସି ଆଧିକାରିକ ବିବୃତି ଜାରି ହୋଇନଥିଲେ ମଧ୍ୟ, କର୍ଣ୍ଣାଟକର ରାଜନୈତିକ ସମୀକରଣ, ସରକାର ମଧ୍ୟରେ ସମନ୍ୱୟ ଏବଂ ଆଗାମୀ ରଣନୀତି ଉପରେ ଆଲୋଚନା ହୋଇଥାଇପାରେ ବୋଲି ଦଳୀୟ ସୂତ୍ରମାନେ କହୁଛନ୍ତି।

ଏହାସହ ଆଗାମୀ କିଛି ରାଜ୍ୟରେ ନିର୍ବାଚନ ଥିବାରୁ ଡିକେ ଶିବକୁମାରଙ୍କୁ ଦଳ ପକ୍ଷରୁ କିଛି ଗୁରୁତ୍ୱପୂର୍ଣ୍ଣ ସାଂଗଠନିକ ଦାୟିତ୍ୱ ଦିଆଯାଇପାରେ ବୋଲି ମଧ୍ୟ ଆଲୋଚନା ଚାଲିଛି। ଏହି କାରଣରୁ ମଧ୍ୟ ସେ ଦଳର ହାଇକମାଣ୍ଡ ସହ ସାକ୍ଷାତ କରିଥାଇପାରନ୍ତି।

ଏହି ସମୟରେ କର୍ଣ୍ଣାଟକର ଶକ୍ତି ମନ୍ତ୍ରୀ କେ.ଜେ. ଜର୍ଜ ମଧ୍ୟ ଦିଲ୍ଲୀରେ ରାହୁଲ ଗାନ୍ଧୀଙ୍କୁ ଭେଟିଥିବା ଜଣାପଡ଼ିଛି। ସୂଚନା ଅନୁଯାୟୀ, ଜର୍ଜ୍‌ ରାଜ୍ୟର ବର୍ତ୍ତମାନର ରାଜନୈତିକ ପରିସ୍ଥିତି ଏବଂ ମନ୍ତ୍ରିମଣ୍ଡଳ ସମ୍ପ୍ରସାରଣର ଆବଶ୍ୟକତା ବିଷୟରେ ଗାନ୍ଧୀଙ୍କୁ ଅବଗତ କରିଥାଇପାରନ୍ତି।

ଉଲ୍ଲେଖଯୋଗ୍ୟ ଯେ, ନିକଟରେ ରାହୁଲ ଗାନ୍ଧୀ ମହୀଶୁର ଗସ୍ତ କରିଥିଲେ। ସେଠାରେ ତାଙ୍କୁ ମୁଖ୍ୟମନ୍ତ୍ରୀ ସିଦ୍ଦରମେୟା ଓ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ସ୍ୱାଗତ କରିଥିଲେ। ଏହି ଗସ୍ତ ସମୟରେ ରାହୁଲ ଓ ଶିବକୁମାରଙ୍କ ମଧ୍ୟରେ ହୋଇଥିବା ପୃଥକ୍ ଆଲୋଚନାକୁ ନେଇ ମଧ୍ୟ ସେତେବେଳେ ରାଜନୈତିକ ମହଳରେ ଚର୍ଚ୍ଚା ଜୋର ଧରିଥିଲା।