ନୂଆଦିଲ୍ଲୀ, ୩୧।୧: ଦ୍ୱିତୀୟ ଭାରତ-ଆରବ ବୈଦେଶିକ ମନ୍ତ୍ରୀ ସ୍ତରୀୟ ବୈଠକ ଅବସରରେ ଭାରତ ଆସିଥିବା ଆରବ ଦେଶମାନଙ୍କ ବୈଦେଶିକ ମନ୍ତ୍ରୀମାନେ, ଆରବ ଲିଗ୍ର ମହାସଚିବ ଏବଂ ଅନ୍ୟ ପ୍ରତିନିଧିମଣ୍ଡଳୀଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ୱାଗତ କରିଛନ୍ତି।
ଏହି ସାକ୍ଷାତକାର ସମୟରେ ପ୍ରଧାନମନ୍ତ୍ରୀ ଭାରତ ଓ ଆରବ ଦେଶମାନଙ୍କ ମଧ୍ୟରେ ଥିବା ପୁରାତନ ଓ ଗଭୀର ସମ୍ପର୍କ ଉପରେ ଆଲୋଚନା କରିଥିଲେ। ସେ କହିଥିଲେ, ଦୁଇପକ୍ଷୀୟ ସାଂସ୍କୃତିକ ଓ ଐତିହାସିକ ସମ୍ପର୍କ ଗତ କିଛି ବର୍ଷରେ ଆର୍ଥିକ ଓ କୌଶଳଗତ ଭାଗୀଦାରୀକୁ ଅଧିକ ସୁଦୃଢ଼ କରିଛି।
ପ୍ରଧାନମନ୍ତ୍ରୀ ଆଗାମୀ ଦିନରେ ଭାରତ-ଆରବ ସହଯୋଗକୁ ଆହୁରି ବିସ୍ତାର କରିବା ଉପରେ ଜୋର ଦେଇଥିଲେ। ବିଶେଷ କରି ବାଣିଜ୍ୟ ଓ ନିବେଶ, ଶକ୍ତି, ପ୍ରଯୁକ୍ତି, ସ୍ୱାସ୍ଥ୍ୟସେବା ଓ ଅନ୍ୟାନ୍ୟ ପ୍ରାଥମିକ କ୍ଷେତ୍ରରେ ସହଯୋଗକୁ ମଜବୁତ କରିବା ପାଇଁ ଭାରତର ପ୍ରତିବଦ୍ଧତାକୁ ସେ ପୁନରୁଚ୍ଚାରଣ କରିଥିଲେ।
ଏହା ସହିତ ପ୍ରଧାନମନ୍ତ୍ରୀ ପାଲେଷ୍ଟାଇନ ଜନତା ପ୍ରତି ଭାରତର ଅବିଚଳ ସମର୍ଥନକୁ ମଧ୍ୟ ପୁନର୍ବ୍ୟକ୍ତ କରିଥିଲେ। ଗାଜା ଅଞ୍ଚଳରେ ଚାଲୁଥିବା ଶାନ୍ତି ପ୍ରୟାସକୁ ସେ ସ୍ୱାଗତ କରିଥିବା ବେଳେ ଆଞ୍ଚଳିକ ଶାନ୍ତି ଓ ସ୍ଥିରତା ରକ୍ଷାରେ ଆରବ ଲିଗ୍ର ଭୂମିକାକୁ ମଧ୍ୟ ପ୍ରଶଂସା କରିଥିଲେ।