ନୂଆଦିଲ୍ଲୀ, ୩ ଅକ୍ଟୋବର – AIMIM ପ୍ରଧାନ ଏବଂ ହାଇଦ୍ରାବାଦ ସାଂସଦ ଅସଦୁଦ୍ଦିନ ଓୱେଇସି ପୁଣିଥରେ କେନ୍ଦ୍ର ସରକାର ଓ ଭାଜପାକୁ କଟାକ୍ଷ କରିଛନ୍ତି। ଗୁରୁବାର ହାଇଦ୍ରାବାଦରେ ଏକ ସାଧାରଣ ସଭାରେ ସେ କହିଲେ – “ଏହି ଦେଶରେ ‘ଆଇ ଲଭ ମୋଦି’ କହିବାକୁ ଅନୁମତି ଅଛି, କିନ୍ତୁ ‘ଆଇ ଲଭ ମହମ୍ମଦ’ କହିଲେ ବିବାଦ ସୃଷ୍ଟି ହେଉଛି।”
ସମ୍ପ୍ରତି, ଉତ୍ତର ପ୍ରଦେଶରେ ‘ଆଇ ଲଭ ମହମ୍ମଦ’ ପୋଷ୍ଟରକୁ ନେଇ ବିତର୍କ ସୃଷ୍ଟି ହୋଇଥିଲା ଏବଂ ସେଥିରୁ ପ୍ରସଙ୍ଗ ଅନ୍ୟାନ୍ୟ ରାଜ୍ୟକୁ ମଧ୍ୟ ପ୍ରସାରିତ ହୋଇଥିବା ଓୱେଇସି ଉଲ୍ଲେଖ କରିଥିଲେ। ସେ ଆହୁରି କହିଲେ – “ଏବେ ସେମାନେ ଆମର ମସଜିଦକୁ ମଧ୍ୟ ଲକ୍ଷ୍ୟ କରୁଛନ୍ତି। ଯଦି ‘ମୋଦି’ଙ୍କ ପୋଷ୍ଟର ଲଗାଯାଏ, ସମସ୍ୟା ନାହିଁ। କିନ୍ତୁ ‘ମହମ୍ମଦ’ଙ୍କ ପୋଷ୍ଟର ହେଲେ ସେଥିରେ ଅଟକାଟଣା ଆସୁଛି। ମୁଁ ଯଦି ଜଣେ ମୁସଲିମ୍, ତାହାଲେ ମୋର ପ୍ରେମ ମହମ୍ମଦ (ସ.ଆ.ବ.)ଙ୍କ ପ୍ରତି ସ୍ୱାଭାବିକ। ଏହାରେ କାହାର ସମସ୍ୟା?”
ଭାରତରେ ୧୭ କୋଟି ମୁସଲିମ୍ ବାସ କରୁଥିବାକୁ ସ୍ମରଣ କରାଇ ସେ ପ୍ରଶ୍ନ କରିଥିଲେ – “ଆପଣମାନେ ଏହି ଦେଶକୁ କେଉଁ ଦିଗକୁ ନେଇଯିବାକୁ ଚାହୁଁଛନ୍ତି?”
ସଭାରେ ସେ ପୋଲିସକୁ ନେଇ ମଧ୍ୟ ସମାଳୋଚନା କରିଥିଲେ। ସେ କହିଲେ – “ଆମେ ହିଂସାକୁ ନିନ୍ଦା କରୁଛୁ। କିନ୍ତୁ ଅନେକ ଭିଡିଓରେ ଦେଖାଗଲା, ପୋଲିସ ଲାଠିଚାର୍ଜ କରୁଥିବା ବେଳେ ଦୋକାନୀମାନେ ସେମାନଙ୍କୁ ଫୁଲ ବର୍ଷା କରୁଛନ୍ତି। ପୋଲିସ ସର୍ବଦା କ୍ଷମତାଧାରୀଙ୍କ ପକ୍ଷରେ ଥାଏ। କିନ୍ତୁ କ୍ଷମତା ପରିବର୍ତ୍ତନ ହେଲେ, ସେମାନେ ଆଗାମୀକାଲି ଆପଣଙ୍କୁ ମଧ୍ୟ ନିର୍ଦ୍ଦୟତା କରିପାରନ୍ତି।”