ନୂଆଦିଲ୍ଲୀ: କଂଗ୍ରେସ ସାଂସଦ ଏବଂ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଏକ ସୋସିଆଲ ମିଡିଆ ବୟାନ ନେଇ ଦେଶବ୍ୟାପୀ ଚର୍ଚ୍ଚା ଆରମ୍ଭ ହୋଇଛି। ‘ଏକ୍ସ’ ମାଧ୍ୟମରେ ସେ କହିଛନ୍ତି ଯେ ଦେଶର ଯୁବପିଢି ଏବଂ Gen-Z ସମ୍ବିଧାନକୁ ବଞ୍ଚାଇବେ, ଗଣତନ୍ତ୍ରକୁ ସୁରକ୍ଷା କରିବେ ଏବଂ ଭୋଟ ଚୋରିକୁ ରୋକିବେ। ସେ ସ୍ପଷ୍ଟ କରିଛନ୍ତି— “ମୁଁ ସର୍ବଦା ସେମାନଙ୍କ ସହିତ ଠିଆ ହେବି।”
ହେଲେ, ସେହି ପୋଷ୍ଟ ପରେ ସୋସିଆଲ ମିଡିଆରେ ପ୍ରଶ୍ନର ଝଡ଼ ଲାଗିଛି। ଲୋକମାନେ ପଚାରୁଛନ୍ତି— “ଯଦି ‘ଯୁବପିଢି’ ଲେଖାଗଲା, ତେବେ ପୁଣି ‘Gen-Z’ କାହିଁକି ଉଲ୍ଲେଖ ହେଲା?” କିଛି ଜଣେ ଆହୁରି ପ୍ରଶ୍ନ କରୁଛନ୍ତି ଯେ ରାହୁଲ ଭାରତରେ ନେପାଳ ବା ବାଂଲାଦେଶ ପରି ହିଂସ୍ର ପ୍ରତିବାଦର ଆଭାସ ଦେଉଛନ୍ତି କି?
ଏଥିରେ ନେପାଳର ନିକଟତମ Gen-Z ଆନ୍ଦୋଳନକୁ ମଧ୍ୟ ସୋସିଆଲ ମିଡିଆରେ ଟାଣି ଆଣାଯାଉଛି। ନେପାଳରେ ଦୁର୍ନୀତି ଓ ସୋସିଆଲ ମିଡିଆ ପ୍ରତିବନ୍ଧକ ବିରୋଧରେ Gen-Z ପ୍ରତିବାଦ ଆରମ୍ଭ ହୋଇଥିଲା, କିନ୍ତୁ ପରେ ସେହି ଆନ୍ଦୋଳନ ହିଂସାରେ ପରିଣତ ହୋଇ ୩୪ରୁ ଅଧିକ ମୃତ୍ୟୁ ଓ ହଜାରୋ ଆହତ ଘଟିଥିଲେ। ପରିଣାମରେ ନେପାଳରେ ମଧ୍ୟବର୍ତ୍ତୀକାଳୀନ ସରକାର ଗଠନ ହୋଇଥିଲା ଏବଂ ସୁଶୀଳା କାର୍କିଙ୍କୁ ପ୍ରଧାନମନ୍ତ୍ରୀ କରାଯାଇଥିଲା।
ରାହୁଲଙ୍କ Gen-Z ଉଲ୍ଲେଖକୁ ନେଇ ଏବେ ବିଭିନ୍ନ ମତାମତ, ସମାଲୋଚନା ଓ ସନ୍ଦେହ ସୋସିଆଲ ମିଡିଆରେ ବ୍ୟାପକ ଭାବରେ ଚର୍ଚ୍ଚା ହେଉଛି।