ଭୁବନେଶ୍ୱର, ୫ ଜୁଲାଇ – ଓଡ଼ିଶାରେ ରାଜନୈତିକ ଚର୍ଚ୍ଚା ପୁଣି ଗରମ ହେବାକୁ ଯାଉଛି। କଂଗ୍ରେସ ଦଳ ୧୧ ତାରିଖରେ ଭୁବନେଶ୍ୱର ବରମୁଣ୍ଡା ପଡ଼ିଆରେ ‘ସମ୍ବିଧାନ ବଞ୍ଚାଅ’ ସମାବେଶ ଆୟୋଜନ କରିବାକୁ ଯାଉଛି, ଯେଉଁଥିରେ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ଓ AICC ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଯୋଗ ଦେବେ। ବରିଷ୍ଠ ନେତା କେ.ସି. ଭେନୁଗୋପାଲ ମଧ୍ୟ ଉପସ୍ଥିତ ରହିବେ।
ପିସିସିର ପ୍ରସ୍ତୁତି ଜୋରଦାର
ରାଜ୍ୟ କଂଗ୍ରେସ ସଭାପତି ଭକ୍ତ ଚରଣ ଦାସ ଏହି ସମାବେଶକୁ ଏକ ମହତ୍ତ୍ୱପୂର୍ଣ୍ଣ ରାଜନୈତିକ ଅବସର ବୋଲି ଉଲ୍ଲେଖ କରିଛନ୍ତି। ସେ କହିଛନ୍ତି ଯେ, ଏହି ଗସ୍ତ ମାଧ୍ୟମରେ ରାଜ୍ୟରେ ତୃଣମୂଳ ସ୍ତରରେ ଦଳକୁ ମଜବୁତ କରିବା ଉଦ୍ଦେଶ୍ୟ ରହିଛି। କଂଗ୍ରେସ ଏବେ 30 ଲକ୍ଷ ସଦସ୍ୟ ଯୋଗ କରିବାକୁ ଲକ୍ଷ୍ୟ ନିର୍ଦ୍ଧାରଣ କରିଛି।
ବିପକ୍ଷ ଦଳର କଟାକ୍ଷ
ରାହୁଲଙ୍କ ଗସ୍ତକୁ ନେଇ ଏକପକ୍ଷରେ କଂଗ୍ରେସ ଉତ୍ସାହିତ ଥିବା ବେଳେ, ବିଜେପି ଏହାକୁ ଗୁରୁତ୍ୱ ଦେଉନାହିଁ। ବିଜେପି ପକ୍ଷରୁ କୁହାଯାଇଛି ଯେ, ରାହୁଲ ଗାନ୍ଧୀଙ୍କ ଆଗମନର କୌଣସି ପ୍ରଭାବ ଓଡ଼ିଶାରେ ପଡ଼ିବ ନାହିଁ। ବିଜେଡି ମଧ୍ୟ ଦାବି କରିଛି ଯେ, ସେମାନେ ଏବେ ବି ରାଜ୍ୟର ସବୁଠୁ ଶକ୍ତିଶାଳୀ ଓ ଲୋକପ୍ରିୟ ଦଳ ଭାବେ ରହିଛନ୍ତି।
ଭବିଷ୍ୟତ ନିର୍ବାଚନ ଆଗରୁ ସଂଗଠନ ଗଢ଼ାରେ ତୀବ୍ରତା
ପଞ୍ଚାୟତ ଉପନିର୍ବାଚନ ସ୍ଥଗିତ ଥିବା ଓ 2027 ରେ ପଞ୍ଚାୟତ ଓ ପରେ ପୌର ନିର୍ବାଚନ ହେବାର ଥିବାରୁ, ତିନିପ୍ରମୁଖ ରାଜନୈତିକ ଦଳ ଏବେଠାରୁ ସଂଗଠନ ଗଢ଼ା ଉପରେ ଗୁରୁତ୍ୱ ଦେଉଛନ୍ତି।