ଲାଲୁ ପରେ ଆର୍ଜେଡିର ଦାୟିତ୍ୱ ତେଜସ୍ବୀଙ୍କ ହାତକୁ? କାର୍ଯ୍ୟକାରୀ ରାଷ୍ଟ୍ରୀୟ ଅଧ୍ୟକ୍ଷ ହେବାକୁ ନେଇ ଚର୍ଚ୍ଚା ତୀବ୍ର
ପାଟନା: ରାଷ୍ଟ୍ରୀୟ ଜନତା ଦଳ (ଆର୍ଜେଡି)ର ଶୀର୍ଷ ନେତୃତ୍ୱ ଧୀରେଧୀରେ ତେଜସ୍ବୀ ଯାଦବଙ୍କ ହାତକୁ ସ୍ଥାନାନ୍ତରିତ ହେବାର ସଙ୍କେତ ମିଳୁଛି। ବିହାର ବିଧାନସଭାର ବିରୋଧୀ ଦଳ ନେତା ତେଜସ୍ବୀ ଯାଦବଙ୍କୁ ଆର୍ଜେଡିର କାର୍ଯ୍ୟକାରୀ ରାଷ୍ଟ୍ରୀୟ ଅଧ୍ୟକ୍ଷ ପଦବୀ ଦିଆଯାଇପାରେ ବୋଲି ଦଳୀୟ ଓ ରାଜନୈତିକ ମହଲରେ ଜୋରଦାର ଆଲୋଚନା ଚାଲିଛି।
ବର୍ତ୍ତମାନ ଲାଲୁ ପ୍ରସାଦ ଯାଦବ ଦଳର ରାଷ୍ଟ୍ରୀୟ ଅଧ୍ୟକ୍ଷ ରହିଛନ୍ତି। ତେବେ ଆସନ୍ତା ୨୫ ତାରିଖରେ ତେଜସ୍ବୀଙ୍କୁ କାର୍ଯ୍ୟକାରୀ ଅଧ୍ୟକ୍ଷ ଭାବେ ଔପଚାରିକ ଘୋଷଣା କରାଯାଇପାରେ ବୋଲି ସୂତ୍ରରୁ ସୂଚନା ମିଳୁଛି। ବିଦେଶ ଯାତ୍ରାରୁ ଫେରିବା ପରେ ତେଜସ୍ବୀ ଦଳୀୟ କାର୍ଯ୍ୟକଳାପରେ ସକ୍ରିୟ ହୋଇଉଠିଛନ୍ତି। ସେ ଦଳର ଭବିଷ୍ୟତ ରଣନୀତି ଓ ସମ୍ପ୍ରତି ହୋଇଥିବା ବିଧାନସଭା ନିର୍ବାଚନର ପରାଜୟ କାରଣ ଉପରେ ସମୀକ୍ଷା କରୁଛନ୍ତି।
ଏହି କ୍ରମରେ ପାଟନାରେ ନିଜ ସରକାରୀ ବାସଭବନରେ ତେଜସ୍ବୀ ଯାଦବ କୋର୍ କମିଟି ସଦସ୍ୟ ଓ ଦଳର ଲୋକସଭା–ରାଜ୍ୟସଭା ସାଂସଦମାନଙ୍କ ସହିତ ଏକାଧିକ ବୈଠକ କରିଛନ୍ତି। ଦଳ ଭିତରେ ଲାଲୁଙ୍କ ପରେ ତେଜସ୍ବୀଙ୍କୁ ଦ୍ବିତୀୟ ସବୁଠୁ ପ୍ରଭାବଶାଳୀ ନେତା ଭାବେ ଗଣାଯାଏ। ନୀତି ନିର୍ଦ୍ଧାରଣରୁ ଆରମ୍ଭ କରି ଟିକେଟ ବଣ୍ଟନ ପର୍ଯ୍ୟନ୍ତ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ ତେଜସ୍ବୀଙ୍କ ଭୂମିକା ପୂର୍ବରୁ ହିଁ ନିର୍ଣ୍ଣାୟକ ରହିଆସିଛି।
୨୦୨୪ ଲୋକସଭା ନିର୍ବାଚନ ପୂର୍ବରୁ ଲାଲୁ ପ୍ରସାଦ ଯାଦବ ଦଳର ବହୁ ଦାୟିତ୍ୱ ତେଜସ୍ବୀଙ୍କୁ ସମର୍ପଣ କରିଥିବା ମଧ୍ୟ ଆଲୋଚିତ ହୋଇଥିଲା। ଏବେ କାର୍ଯ୍ୟକାରୀ ଅଧ୍ୟକ୍ଷ ପଦ ମିଳିଲେ ଦଳ ଉପରେ ତେଜସ୍ବୀଙ୍କ ପ୍ରଭାବ ଆହୁରି ବଢ଼ିବ ବୋଲି ମନାଯାଉଛି। ଆସନ୍ତା ୨୫ ତାରିଖରେ ପାଟନାରେ ହେବାକୁ ଥିବା ଆର୍ଜେଡି କାର୍ଯ୍ୟସମିତି ବୈଠକ ଉପରେ ସମସ୍ତଙ୍କ ନଜର ରହିଛି।
ଲାଲୁ ପ୍ରସାଦ ଯାଦବଙ୍କ ସ୍ୱାସ୍ଥ୍ୟାବସ୍ଥା ଦୀର୍ଘଦିନ ଧରି ଠିକ୍ ନଥିବାରୁ ଦଳର ଦାୟିତ୍ୱ ନୂଆ ପିଢ଼ିଙ୍କ ହାତକୁ ଯିବା ଆବଶ୍ୟକତା ଅନୁଭୂତ ହେଉଛି। ତେବେ ଏହି ପଦକ୍ଷେପକୁ ନେଇ ବିଜେପି ପକ୍ଷରୁ “ବଂଶବାଦୀ ରାଜନୀତି” ଭାବେ ତୀବ୍ର ସମାଲୋଚନା କରାଯାଇଛି।