ନୂଆଦିଲ୍ଲୀ: ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ମହିଳା କ୍ରିକେଟ୍ ପାଇଁ ଏକ ଐତିହାସିକ ନିଷ୍ପତ୍ତି ନେଇଛି। ଘରୋଇ ମହିଳା କ୍ରିକେଟର ଓ ମ୍ୟାଚ୍ ଅଧିକାରୀଙ୍କ ମ୍ୟାଚ୍ ଫି’ରେ ବଡ଼ ପରିମାଣର ବୃଦ୍ଧିକୁ ବୋର୍ଡର ଆପେକ୍ସ ପରିଷଦ ଅନୁମୋଦନ କରିଛି। ପ୍ରଥମ ମହିଳା ଦିନିକିଆ ବିଶ୍ୱକପ୍ ବିଜୟ ପରେ ଆସିଥିବା ଏହି ନିଷ୍ପତ୍ତିକୁ ମହିଳା କ୍ରିକେଟ୍ ପାଇଁ ଏକ ବଡ଼ ପ୍ରୋତ୍ସାହନ ଭାବେ ଦେଖାଯାଉଛି।
ବିସିସିଆଇ ଅଧିକାରୀଙ୍କ କହିବା ଅନୁଯାୟୀ, ଏହି ପଦକ୍ଷେପର ମୂଖ୍ୟ ଲକ୍ଷ୍ୟ ହେଉଛି ଘରୋଇ କ୍ରିକେଟରେ ଏକ ସମାନ ଏବଂ ନ୍ୟାୟସଙ୍ଗତ ଦରମା ଢାଞ୍ଚା ସୃଷ୍ଟି କରିବା।
ସିନିୟର ମହିଳା କ୍ରିକେଟରଙ୍କ ଫି’ ଦୁଇଗୁଣରୁ ଅଧିକ
ନୂଆ ଦରମା ଢାଞ୍ଚା ଅନୁଯାୟୀ, ସିନିୟର ମହିଳା ଘରୋଇ କ୍ରିକେଟରମାନେ ଏବେ ପ୍ରତିଦିନ ୫୦,୦୦୦ ଟଙ୍କା ପାଇବେ, ଯାହା ପୂର୍ବରୁ ୨୦,୦୦୦ ଟଙ୍କା ଥିଲା।
ସେହିପରି, ରିଜର୍ଭ ଖେଳାଳିମାନଙ୍କ ଫି’ ୧୦,୦୦୦ ଟଙ୍କାରୁ ବୃଦ୍ଧି ପାଇ ୨୫,୦୦୦ ଟଙ୍କା କରାଯାଇଛି।
ସିନିୟର ମହିଳା ଏକଦିବସୀୟ ଓ ବହୁଦିବସୀୟ ଟୁର୍ଣ୍ଣାମେଣ୍ଟ
- ପ୍ଲେଇଂ ଇଲେଭେନ୍: ପ୍ରତିଦିନ ୫୦,୦୦୦ ଟଙ୍କା
- ରିଜର୍ଭ ଖେଳାଳି: ପ୍ରତିଦିନ ୨୫,୦୦୦ ଟଙ୍କା
ଜାତୀୟ ମହିଳା ଟି-୨୦ ଟୁର୍ଣ୍ଣାମେଣ୍ଟ
- ପ୍ଲେଇଂ ଇଲେଭେନ୍: ପ୍ରତି ମ୍ୟାଚ୍ ୨୫,୦୦୦ ଟଙ୍କା
- ରିଜର୍ଭ ଖେଳାଳି: ପ୍ରତି ମ୍ୟାଚ୍ ୧୨,୫୦୦ ଟଙ୍କା
ବିସିସିଆଇ ଅଧିକାରୀଙ୍କ ମତାନୁସାରେ, ଜଣେ ଶୀର୍ଷ ଘରୋଇ ମହିଳା କ୍ରିକେଟର ଯଦି ସମ୍ପୂର୍ଣ୍ଣ ସିଜନ୍ରେ ସମସ୍ତ ଫର୍ମାଟରେ ଖେଳନ୍ତି, ତେବେ ସେ ୧୨ରୁ ୧୪ ଲକ୍ଷ ଟଙ୍କା ପର୍ଯ୍ୟନ୍ତ ରୋଜଗାର କରିପାରିବେ।
ଜୁନିଅର ମହିଳା ଖେଳାଳିମାନେ ମଧ୍ୟ ଲାଭାନ୍ବିତ
୧୯ ବର୍ଷରୁ କମ୍ ଏବଂ ୨୩ ବର୍ଷରୁ କମ୍ ବର୍ଗର ମହିଳା ଖେଳାଳିଙ୍କ ଫି’ରେ ମଧ୍ୟ ଲକ୍ଷଣୀୟ ବୃଦ୍ଧି କରାଯାଇଛି।
- ଖେଳୁଥିବା ଖେଳାଳି: ପ୍ରତିଦିନ ୨୫,୦୦୦ ଟଙ୍କା
- ରିଜର୍ଭ ଖେଳାଳି: ପ୍ରତିଦିନ ୧୨,୫୦୦ ଟଙ୍କା
ମ୍ୟାଚ୍ ଅଧିକାରୀଙ୍କ ଫି’ରେ ବଡ଼ ବୃଦ୍ଧି
ଏହି ନିଷ୍ପତ୍ତିରେ ଅମ୍ପାୟାର ଓ ମ୍ୟାଚ୍ ରେଫରିଙ୍କ ପରି ମ୍ୟାଚ୍ ଅଧିକାରୀମାନେ ମଧ୍ୟ ଲାଭାନ୍ବିତ ହେବେ।
- ଘରୋଇ ଲିଗ୍ ମ୍ୟାଚ୍: ପ୍ରତିଦିନ ୪୦,୦୦୦ ଟଙ୍କା
- ନକଆଉଟ୍ ମ୍ୟାଚ୍: ପ୍ରତିଦିନ ୫୦,୦୦୦ରୁ ୬୦,୦୦୦ ଟଙ୍କା
ଏହାର ଫଳରେ, ରଣଜୀ ଟ୍ରଫି ଲିଗ୍ ମ୍ୟାଚ୍ରେ ଅମ୍ପାୟାରମାନେ ଏଣିକି ପ୍ରାୟ ୧.୬୦ ଲକ୍ଷ ଟଙ୍କା, ଏବଂ ନକଆଉଟ୍ ମ୍ୟାଚ୍ରେ ୨.୫ରୁ ୩ ଲକ୍ଷ ଟଙ୍କା ପର୍ଯ୍ୟନ୍ତ ରୋଜଗାର କରିପାରିବେ।
ବିସିସିଆଇର ଲକ୍ଷ୍ୟ
ବିସିସିଆଇର ମତାନୁସାରେ, ଏହି ସଂଶୋଧିତ ଦରମା ଢାଞ୍ଚା ମହିଳା କ୍ରିକେଟର ଓ ଘରୋଇ ମ୍ୟାଚ୍ ଅଧିକାରୀମାନଙ୍କୁ ଆର୍ଥିକ ସୁରକ୍ଷା ସହ ପ୍ରୋତ୍ସାହନ ଯୋଗାଇବ। ଏହା ଦ୍ୱାରା ଦେଶର ଘରୋଇ କ୍ରିକେଟ୍ ଢାଞ୍ଚା ଆହୁରି ସୁଦୃଢ଼ ହେବ ବୋଲି ବୋର୍ଡ ଆଶା ପ୍ରକାଶ କରିଛି।