ଅହମଦାବାଦ: ହାର୍ଦ୍ଦିକ ପାଣ୍ଡ୍ୟା ଓ ତିଲକ ବର୍ମାଙ୍କ ବିସ୍ଫୋରକ ବ୍ୟାଟିଂ ସହ ବରୁଣ ଚକ୍ରବର୍ତ୍ତୀ ଓ ଯଶପ୍ରୀତ ବୁମରାଙ୍କ ଘାତକ ବୋଲିଂ ବଳରେ ଭାରତ ଦକ୍ଷିଣ ଆଫ୍ରିକାକୁ ୩୦ ରନ୍ରେ ପରାସ୍ତ କରିଛି। ଅହମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଇଥିବା ୫ ମ୍ୟାଚ୍ ବିଶିଷ୍ଟ ଟି୨୦ ଅନ୍ତର୍ଜାତୀୟ ସିରିଜ୍ର ପଞ୍ଚମ ତଥା ଅନ୍ତିମ ମୁକାବିଲା ଜିତି ଭାରତ ୩–୧ରେ ସିରିଜ୍ ହାସଲ କରିଛି। ଚତୁର୍ଥ ମ୍ୟାଚ୍ କୁହୁଡ଼ି କାରଣରୁ ବାତିଲ ହୋଇଥିଲା।
ଟସ୍ ହାରି ପ୍ରଥମେ ବ୍ୟାଟିଂ କରି ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଭାରତ ୨୦ ଓଭରରେ ୫ ଉଇକେଟ୍ ହରାଇ ୨୩୧ ରନ୍ ସଂଗ୍ରହ କରିଥିଲା। ୨୩୨ ରନ୍ର ବଡ଼ ଲକ୍ଷ୍ୟ ପଛୁଆ କରି ଦକ୍ଷିଣ ଆଫ୍ରିକା ୨୦ ଓଭରରେ ୮ ଉଇକେଟ୍ ହରାଇ ୨୦୧ ରନ୍ରେ ସୀମିତ ରହିଥିଲା।
ହାର୍ଦ୍ଦିକ–ତିଲକଙ୍କ ବ୍ୟାଟିଂରେ ଭାରତର ବଡ଼ ସ୍କୋର
ଭାରତ ପାଇଁ ତିଲକ ବର୍ମା ୪୨ ବଲ୍ରେ ୧୦ ଚୌକା ଓ ୧ ଛକା ସହ ୮୬ ରନ୍ର ଚମତ୍କାର ଇନିଂସ ଖେଳିଥିଲେ। ହାର୍ଦ୍ଦିକ ପାଣ୍ଡ୍ୟା ୨୫ ବଲ୍ରେ ୫ ଚୌକା ଓ ୫ ଛକା ସହ ୬୩ ରନ୍ କରି ଦଳକୁ ବଡ଼ ସ୍କୋର ଦିଗରେ ଆଗେଇ ନେଇଥିଲେ।
ଆରମ୍ଭରେ ଅଭିଷେକ ଶର୍ମା ଓ ସଂଜୁ ସାମସନ୍ ପ୍ରଥମ ଉଇକେଟ୍ ପାଇଁ ୬୩ ରନ୍ ଯୋଗ କରି ଭଲ ଭିତ୍ତି ପକାଇଥିଲେ। ଅଭିଷେକ ୨୧ ବଲ୍ରେ ୩୪ ରନ୍ ଓ ସଂଜୁ ୨୨ ବଲ୍ରେ ୩୭ ରନ୍ କରିଥିଲେ। ତଥାପି ଅଧିନାୟକ ସୂର୍ଯ୍ୟକୁମାର ଯାଦବ ଏଥର ମାତ୍ର ୫ ରନ୍ କରି ପ୍ୟାଭିଲିଅନ ଫେରିଥିଲେ।
ବୋଲିଂରେ ବରୁଣ–ବୁମରାଙ୍କ ଚମକ
ଲକ୍ଷ୍ୟ ପଛୁଆ କରି ଦକ୍ଷିଣ ଆଫ୍ରିକା ପାଇଁ କ୍ୱିଣ୍ଟନ୍ ଡି’କକ୍ ୬୫ ରନ୍ କରି ସର୍ବାଧିକ ସଫଳ ଥିଲେ। ଡେୱାଲ୍ଡ ବ୍ରେଭିସ୍ ୩୧ ଓ ଡେଭିଡ୍ ମିଲର ୧୮ ରନ୍ କରିଥିଲେ, କିନ୍ତୁ ଅନ୍ୟ ବ୍ୟାଟରମାନେ ଭାରତୀୟ ବୋଲରଙ୍କ ସାମ୍ନାରେ ଟିକି ପାରିନଥିଲେ।
ଭାରତ ପାଇଁ ବରୁଣ ଚକ୍ରବର୍ତ୍ତୀ ୪ ଉଇକେଟ୍ ନେଇ ସର୍ବାଧିକ ସଫଳ ବୋଲର ଥିଲେ। ଯଶପ୍ରୀତ ବୁମରା ୨ ଉଇକେଟ୍ ନେଇଥିବା ବେଳେ ଅର୍ଶଦୀପ ସିଂହ ଓ ହାର୍ଦ୍ଦିକ ପାଣ୍ଡ୍ୟା ଗୋଟିଏ ଲେଖାଏଁ ଉଇକେଟ୍ ହାସଲ କରିଥିଲେ।
ଏହି ଜୟ ସହିତ ଭାରତ ଶକ୍ତିଶାଳୀ ଦକ୍ଷିଣ ଆଫ୍ରିକା ବିପକ୍ଷରେ ଟି୨୦ ସିରିଜ୍ରେ ଦୃଢ଼ ପ୍ରଭୁତ୍ୱ ସ୍ଥାପନ କରିଛି।