ଭୁବନେଶ୍ବର: ଚଳିତ ବିଜୟ ହଜାରେ ଟ୍ରଫିରେ ପ୍ରଥମ ମ୍ୟାଚ୍ର ପରାଜୟ ପରେ ଜବରଦସ୍ତ ଭାବେ ଫେରିଥିବା ଓଡ଼ିଶା ଦଳ ଲଗାତାର ତୃତୀୟ ବିଜୟ ହାସଲ କରିଛି। ବୁଧବାର ଅଲୁରର କେଏସ୍ସିଏ କ୍ରିକେଟ୍ ଗ୍ରାଉଣ୍ଡ-୩ରେ ଆୟୋଜିତ ମ୍ୟାଚ୍ରେ ଓଡ଼ିଶା ୭୯ ରନ୍ରେ ଦିଲ୍ଲୀକୁ ପରାସ୍ତ କରି ଏଲିଟ୍ ଗ୍ରୁପ୍-ଡି ଟେବୁଲ୍ର ଶୀର୍ଷ ସ୍ଥାନ ଦଖଲ କରିଛି।
ଏହି ବିଜୟ ସହ ଅଧିନାୟକ ବିପ୍ଳବ ସାମନ୍ତରାୟଙ୍କ ଦଳ ୪ଟି ମ୍ୟାଚ୍ରୁ ୩ଟିରେ ଜିତି ୧୨ ପଏଣ୍ଟ୍ ସଂଗ୍ରହ କରିଛି ଏବଂ ପୂର୍ବରୁ ଶୀର୍ଷରେ ଥିବା ଦିଲ୍ଲୀକୁ ପଛକୁ ଠେଲିଦେଇଛି।
ଟସ୍ ଜିତି ଦିଲ୍ଲୀ ଅଧିନାୟକ ଋଷଭ ପନ୍ତ ଓଡ଼ିଶାକୁ ପ୍ରଥମେ ବ୍ୟାଟିଂର ଆମନ୍ତ୍ରଣ ଦେଇଥିଲେ। ଓମ୍ ଟି. ମୁଣ୍ଡେ (୨୬) ଓ ସ୍ବସ୍ତିକ ସାମଲ (୨୮) ପ୍ରଥମ ୱିକେଟ୍ରେ ୫୮ ରନ୍ ଯୋଡ଼ି ଭଲ ଆରମ୍ଭ କରିଥିଲେ। ହେଲେ ଦୁଇ ଜଣ ଅଳ୍ପ ବ୍ୟବଧାନରେ ଆଉଟ୍ ହେବା ପରେ ଓଡ଼ିଶା ୯୧/୩ରେ ଚାପରେ ପଡ଼ିଥିଲା।
ଏହି ସମୟରେ ଅଧିନାୟକ ବିପ୍ଳବ ସାମନ୍ତରାୟ ଗୋବିନ୍ଦ ପୋଦ୍ଦାର (୩୫)ଙ୍କ ସହ ଚତୁର୍ଥ ୱିକେଟ୍ରେ ୫୭ ରନ୍ର ଗୁରୁତ୍ୱପୂର୍ଣ୍ଣ ଭାଗୀଦାରି କରିଥିଲେ। ବିପ୍ଳବ ଧୈର୍ଯ୍ୟର ସହିତ ବ୍ୟାଟିଂ କରି ୭୨ ରନ୍ (୭୪ ବଲ୍, ୩ ଚୌକା, ୪ ଛକା) କରି ଅର୍ଦ୍ଧଶତକ ଅର୍ଜନ କରିଥିଲେ।
ଶେଷ ଦିଗରେ ରାଜେଶ ମହାନ୍ତି (୧୭*) ଓ ଦେବବ୍ରତ ପ୍ରଧାନ (୨୧*) ତେଜ ରନ୍ ସଂଗ୍ରହ କରି ଓଡ଼ିଶାକୁ ୫୦ ଓଭରରେ ୨୭୨/୮ ସ୍କୋର୍ରେ ପହଞ୍ଚାଇଥିଲେ। ଦିଲ୍ଲୀ ପକ୍ଷରୁ ହ୍ରିତିକ ସୋକେନ ୪ଟି ୱିକେଟ୍ ନେଇଥିଲେ।
ଲକ୍ଷ୍ୟ ପଛେ ଦୌଡ଼ିବାକୁ ଯାଇ ଦିଲ୍ଲୀ ଆରମ୍ଭରୁ ହିଁ ଚାପରେ ପଡ଼ିଥିଲା। ୬ ରନ୍ ମଧ୍ୟରେ ୨ଟି ୱିକେଟ୍ ହରାଇଥିବା ଦିଲ୍ଲୀ ୧୮.୧ ଓଭରରେ ୭୫/୬ରେ ସଂଘର୍ଷ କରୁଥିଲା। ହର୍ଷ ତ୍ୟାଗୀ (୪୩) ଓ ହ୍ରିତିକ ସୋକେନ (୩୨) କିଛି ପ୍ରତିରୋଧ ଦେଖାଇଥିଲେ ମଧ୍ୟ ଦଳ ୧୯୩ ରନ୍ରେ ଅଲ୍ଆଉଟ୍ ହୋଇଯାଇଥିଲା।
ଓଡ଼ିଶା ପକ୍ଷରୁ ଦେବବ୍ରତ ପ୍ରଧାନ ଓ ସମ୍ବିତ ବରାଳ ୩ଟି ଲେଖାଏଁ ୱିକେଟ୍ ନେଇଥିବା ବେଳେ ରାଜେଶ ମହାନ୍ତି ୨ଟି ୱିକେଟ୍ ଅକ୍ତିଆର କରିଥିଲେ। ଉପଯୋଗୀ ଅର୍ଦ୍ଧଶତକ ପାଇଁ ଅଧିନାୟକ ବିପ୍ଳବ ସାମନ୍ତରାୟଙ୍କୁ ‘ମ୍ୟାଚ୍ର ଶ୍ରେଷ୍ଠ ଖେଳାଳି’ ପୁରସ୍କାର ପ୍ରଦାନ କରାଯାଇଥିଲା।