ରାଞ୍ଚି: ସର୍ବଶେଷରେ ପ୍ରଶଂସକମାନଙ୍କ ଅପେକ୍ଷା ପୂରଣ ହେଲା। କିଙ୍ଗ୍ କୋହଲି ତାଙ୍କ ଅଦ୍ଭୁତ ବ୍ୟାଟିଂରେ ଆଜି ଆଉଥରେ ମନ ଜିତିଛନ୍ତି। ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ଶୃଙ୍ଖଳାରେ ରାଞ୍ଚିର ଝାରଖଣ୍ଡ ସ୍ଟେଟ୍ କ୍ରିକେଟ୍ ଆସୋସିଏସନ୍ ଷ୍ଟାଡିୟମରେ ସେ ନିଜ କ୍ୟାରିୟରର ୫୨ତମ ODI ଏବଂ ୮୩ତମ ଅନ୍ତର୍ଜାତୀୟ ଶତକ ହାସଲ କରିଛନ୍ତି। ଷ୍ଟାଡିୟମଭରି “କୋହଲି… କୋହଲି… କୋହଲି” ଧ୍ୱନିରେ ଉତ୍ସବମୁଖର ପରିବେଶ ସୃଷ୍ଟି ହେଇଥିଲା।
ମାର୍କୋ ଜାନସେନଙ୍କ ୩୮ତମ ଓଭରରେ କୋହଲି ନିଜ ଶତକ ପୂରଣ କରିଥିଲେ। ସେ ୧୦୨ ବଲରେ ଏହି ସଫଳତା ଅର୍ଜନ କରିଥିଲେ, ଯେଉଁଥିରେ ୫ଟି ଛକା ଓ ୭ଟି ବାଉଣ୍ଡାରି ସାମିଲ ରହିଛି।
ରୋହିତ–କୋହଲିଙ୍କ ଶତକୀୟ ଭାଗିଦାରୀ
ରାଞ୍ଚିରେ ଚାଲୁଥିବା ଏହି ପ୍ରଥମ ଦିନିକିଆ ମୁକାବିଲାରେ ଭାରତୀୟ ଟିମ୍ର ଦୁଇ ଅଭିଜ୍ଞ ବ୍ୟାଟସ୍ମାନ—ରୋହିତ ଶର୍ମା ଓ ବିରାଟ କୋହଲି—ତୀବ୍ର ଭାବରେ ଦକ୍ଷିଣ ଆଫ୍ରିକା ଆକ୍ରମଣକୁ ପ୍ରତିହତ କରିଛନ୍ତି। ଉଭୟ ଖେଳାଳି ଦ୍ୱିତୀୟ ୱିକେଟ ପାଇଁ ଶତକୀୟ ଭାଗିଦାରୀ ସୃଷ୍ଟି କରିଛନ୍ତି। ଏହା ସହ, ODI କ୍ରିକେଟରେ ସେମାନଙ୍କର ୨୦ତମ ଶତକୀୟ ପାର୍ଟନର୍ଶିପ୍ ହେଲା।