ନୂଆଦିଲ୍ଲୀ: ପୂର୍ବତନ ସେନାମୁଖ୍ୟ ଜେନେରାଲ ଏମ୍.ଏମ୍. ନରବଣେଙ୍କ ଅପ୍ରକାଶିତ ପୁସ୍ତକ “Four Stars of Destiny” ଅନୁମତି ବିନା ପ୍ରସାର ହେବା ଘଟଣାକୁ ନେଇ ଦିଲ୍ଲୀ ପୁଲିସ ଏକ ଏତଲା ରୁଜୁ କରିଛି। ଉପଯୁକ୍ତ କର୍ତ୍ତୃପକ୍ଷଙ୍କ ସ୍ୱୀକୃତି ଛଡ଼ା ପୁସ୍ତକର ବିଷୟବସ୍ତୁ ଓ ପ୍ରି-ପ୍ରିଣ୍ଟ୍ ସଂସ୍କରଣ ଅନଲାଇନ୍ରେ ଘୁରୁଥିବା ସୂଚନା ମିଳିବା ପରେ ମାମଲାକୁ ଗମ୍ଭୀରତାର ସହ ନିଆଯାଇଛି।
ପୁଲିସ ସୂତ୍ର ଅନୁସାରେ, ଏହି ଏକେ ଟାଇଟଲ୍ର ‘ପ୍ରି-ପ୍ରିଣ୍ଟ୍’ ପିଡିଏଫ୍ କପି କିଛି ୱେବସାଇଟ୍ରେ ଉପଲବ୍ଧ ଥିବା ଚିହ୍ନଟ ହୋଇଛି। ପେଙ୍ଗୁଇନ ର୍ୟାଣ୍ଡମ ହାଉସ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ପକ୍ଷରୁ ପୁସ୍ତକ ପ୍ରସ୍ତୁତ ହୋଇଥିବା କୁହାଯାଉଥିବାବେଳେ, ଅନୁମୋଦନ ପୂର୍ବରୁ ଏହା କିପରି ସାର୍ବଜନୀନ ହେଲା ସେନେଇ ତଦନ୍ତ ଆରମ୍ଭ ହୋଇଛି।
ତଦନ୍ତକାରୀ ଦଳ ଆହୁରି ଜାଣିଛି ଯେ, କିଛି ଅନଲାଇନ୍ ମାର୍କେଟିଂ ଓ ରିଟେଲ୍ ପ୍ଲାଟଫର୍ମରେ ପୁସ୍ତକର କଭର୍କୁ ବିକ୍ରି ପାଇଁ ଉପଲବ୍ଧ ଥିବାଭଳି ଦେଖାଯାଇଛି। ଏହା ଫଳରେ କପିରାଇଟ୍ ଉଲ୍ଲଂଘନ ଓ ବେଆଇନ ବଣ୍ଟନ ହେବାର ସନ୍ଦେହ ବଢ଼ିଛି।
ଅଧିକାରୀମାନେ କହିଛନ୍ତି, ପ୍ରସଙ୍ଗଟି ସମ୍ବେଦନଶୀଳ ହେତୁ ଏହାକୁ ବିଶେଷ ଗୁରୁତ୍ୱ ଦିଆଯାଇଛି। ମାମଲାର ତଦନ୍ତ ଭାର ଦିଲ୍ଲୀ ପୁଲିସର ସ୍ପେସିଆଲ୍ ସେଲ୍କୁ ଦିଆଯାଇଛି ଏବଂ ତଦନ୍ତ ପରେ ଆଇନୁନ୍ମୁଖୀ ପଦକ୍ଷେପ ଗ୍ରହଣ କରାଯିବ ବୋଲି ସୂଚନା ମିଳିଛି।