ନୂଆଦିଲ୍ଲୀ: ବାଂଲାଦେଶରେ ଚାଲିଥିବା ରାଜନୈତିକ ସଙ୍କଟ ଓ ସଂଖ୍ୟାଲଘୁ, ବିଶେଷକରି ହିନ୍ଦୁ ସମୁଦାୟ ଉପରେ ହେଉଥିବା ହିଂସାକୁ ନେଇ ଭାରତ ସରକାର ଗଭୀର ଚିନ୍ତା ପ୍ରକାଶ କରିଛି। ଶୁକ୍ରବାର (ଡିସେମ୍ବର ୨୬, ୨୦୨୫) ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି ଯେ, ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ହେଉଥିବା ହିଂସା ଏକ ଗୁରୁତ୍ୱପୂର୍ଣ୍ଣ ଓ ଚିନ୍ତାଜନକ ବିଷୟ।
ସେ କହିଛନ୍ତି, “ଦୀପୁ ଦାସଙ୍କ ହତ୍ୟାକୁ ଆମେ ତୀବ୍ର ନିନ୍ଦା କରୁଛୁ। ଦୋଷୀମାନଙ୍କୁ ଶୀଘ୍ର ନ୍ୟାୟ ମିଳିବ ବୋଲି ଆମେ ଆଶା କରୁଛୁ।” ଭାରତ ସରକାର ସ୍ପଷ୍ଟ କରିଛି ଯେ, ଏପରି ଘଟଣାଗୁଡ଼ିକୁ କେବଳ ରାଜନୈତିକ ହିଂସା ବୋଲି ଖାରଜ କରାଯାଇପାରିବ ନାହିଁ।
ସବୁ ଘଟଣା ରାଜନୈତିକ ହିଂସା ନୁହେଁ
ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ବାଂଲାଦେଶର ବର୍ତ୍ତମାନର ମଧ୍ୟବର୍ତ୍ତୀକାଳୀନ ସରକାରଙ୍କ କାର୍ଯ୍ୟକାଳରେ ହତ୍ୟା, ପୋଡ଼ାଜଳା, ଜମି ହଡ଼ପ ସମେତ ପ୍ରାୟ ୨୯୦୦ଟି ହିଂସାତ୍ମକ ଘଟଣା ରିପୋର୍ଟ ହୋଇଛି। ଏହି ଘଟଣାଗୁଡ଼ିକୁ ସର୍ବଥା ରାଜନୈତିକ ହିଂସା ଭାବେ ଅଣଦେଖା କରିବା ଉଚିତ୍ ନୁହେଁ ବୋଲି ଭାରତ ମତ ପ୍ରକାଶ କରିଛି।
ନିର୍ବାଚନ ପୂର୍ବରୁ ରାଜନୀତି ତେଜ
ବାଂଲାଦେଶରେ ଆସନ୍ତା ଫେବୃଆରୀ ୨୦୨୫ରେ ସାଧାରଣ ନିର୍ବାଚନ ହେବାକୁ ଥିବା ବେଳେ, ରାଜନୀତି ଧୀରେଧୀରେ ତେଜ ହେଉଛି। ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP) ନିର୍ବାଚନ ପାଇଁ ସକ୍ରିୟ ହୋଇଉଠିଛି। ଏହି ପରିପ୍ରେକ୍ଷିତରେ, BNPର କାର୍ଯ୍ୟକାରୀ ଅଧ୍ୟକ୍ଷ ଓ ପୂର୍ବତନ ପ୍ରଧାନମନ୍ତ୍ରୀ ଖାଲେଦା ଜିଆଙ୍କ ପୁଅ ତାରିକ୍ ରହମାନ ୧୭ ବର୍ଷ ପରେ ଢାକାରେ ପହଞ୍ଚିଛନ୍ତି।
ବିମାନବନ୍ଦରରେ ପହଞ୍ଚିବା ପରେ ଖାଲି ପାଦରେ ବାଂଲାଦେଶୀ ମାଟିରେ ଠିଆ ହୋଇ ତାରିକ୍ ରହମାନ ପ୍ରତୀକାତ୍ମକ ଭାବେ ଦେଶର ରାଜନୀତିକୁ ଫେରିଥିବା ଦୃଶ୍ୟ ବେଶ ଚର୍ଚ୍ଚାରେ ରହିଛି।