ନୂଆଦିଲ୍ଲୀ, ୨୨ ଡିସେମ୍ବର: କୃତ୍ରିମ ବୁଦ୍ଧିମତା (AI) କ୍ଷେତ୍ରରେ ନିଜ ଆଧିପତ୍ୟ ଆହୁରି ସୁଦୃଢ଼ କରିବାକୁ ଗୁଗଲର ପ୍ୟାରେଣ୍ଟ କମ୍ପାନୀ ‘ଆଲଫାବେଟ୍’ ଏକ ବଡ଼ ବାଣିଜ୍ୟିକ ପଦକ୍ଷେପ ନେଇଛି। ଆଲଫାବେଟ୍ ଆମେରିକାର ସ୍ୱଚ୍ଛ ଶକ୍ତି ବିକାଶକାରୀ ସଂସ୍ଥା ‘ଇଣ୍ଟରସେକ୍ଟ ପାୱାର’କୁ ୪.୭୫ ବିଲିୟନ ଡଲାର (ପ୍ରାୟ ୩୯,୭୦୦ କୋଟି ଟଙ୍କା) ନଗଦ ଅର୍ଥରେ କିଣିବା ପାଇଁ ଚୁକ୍ତି କରିଛି।
ଏଆଇ ଟେକ୍ନୋଲୋଜିର ବ୍ୟାପକ ବ୍ୟବହାର ସହ ଡାଟା ସେଣ୍ଟରଗୁଡ଼ିକ ପାଇଁ ଅତ୍ୟଧିକ ପରିମାଣର ବିଦ୍ୟୁତ୍ ଆବଶ୍ୟକତା ବଢ଼ିଚାଲିଛି। ଆମେରିକାର ପୁରୁଣା ପାୱାର ଗ୍ରିଡ୍ ଏହି ଚାହିଦା ପୂରଣ କରିବାରେ ସମସ୍ୟା ସମ୍ମୁଖୀନ ହେଉଥିବାରୁ, ଆଲଫାବେଟ୍ ନିଜସ୍ୱ ଏବଂ ଦୀର୍ଘକାଳୀନ ଶକ୍ତି ଉତ୍ସ ତିଆରି କରିବାକୁ ଏହି ରଣନୀତି ଅପନାଇଛି।
‘ଇଣ୍ଟରସେକ୍ଟ ପାୱାର’ ପ୍ରମୁଖତଃ ସୌର ଶକ୍ତି ଏବଂ ବ୍ୟାଟେରୀ ଷ୍ଟୋରେଜ୍ ପ୍ରକଳ୍ପରେ କାମ କରେ। ଏହି କ୍ରୟ ମାଧ୍ୟମରେ ଗୁଗଲ ନିଜର ବିଶାଳ ଡାଟା ସେଣ୍ଟରଗୁଡ଼ିକୁ ପରିବେଶ-ମିତ୍ର ଏବଂ ପ୍ରଦୂଷଣମୁକ୍ତ ଶକ୍ତି ଉପରେ ଚଳାଇବାକୁ ଲକ୍ଷ୍ୟ ରଖିଛି।
ଆଲଫାବେଟ୍ର ସିଇଓ ସୁନ୍ଦର ପିଚାଇ କହିଛନ୍ତି, “ଇଣ୍ଟରସେକ୍ଟ ପାୱାର ସହ ଭାଗୀଦାରି ମାଧ୍ୟମରେ ଆମେ ଶକ୍ତି କ୍ଷେତ୍ରରେ ନୂଆ ଏବଂ ସ୍ଥାୟୀ ସମାଧାନ ଉନ୍ନତ କରିପାରିବୁ, ଯାହା ଏଆଇ କ୍ଷେତ୍ରରେ ଆମେରିକାର ନେତୃତ୍ୱକୁ ଆହୁରି ଶକ୍ତିଶାଳୀ କରିବ।”
କାହିଁକି ଜରୁରୀ ହେଲା ଏହି ଡିଲ୍?
ଗତ ପାଞ୍ଚ ବର୍ଷ ମଧ୍ୟରେ ଗୁଗଲର କାର୍ବନ ନିର୍ଗମନ ପ୍ରାୟ ୪୮ ପ୍ରତିଶତ ବୃଦ୍ଧି ପାଇଛି। ଏଆଇ ଭିତ୍ତିକ ସେବାର ବିସ୍ତାର କମ୍ପାନୀର ପରିବେଶ ଲକ୍ଷ୍ୟ ପାଇଁ ଏକ ବଡ଼ ଆହ୍ୱାନ ସୃଷ୍ଟି କରିଛି। ଇଣ୍ଟରସେକ୍ଟ ପାୱାର ପାଖରେ ପ୍ରାୟ ୧୫ ବିଲିୟନ ଡଲାର ମୂଲ୍ୟର ଶକ୍ତି ପ୍ରକଳ୍ପ କାର୍ଯ୍ୟରତ କିମ୍ବା ନିର୍ମାଣାଧୀନ ଅବସ୍ଥାରେ ଥିବାରୁ, ଏହା ଗୁଗଲ ପାଇଁ ଦୀର୍ଘକାଳୀନ ସମାଧାନ ଭାବେ ଦେଖାଯାଉଛି।
ଚୁକ୍ତି ସମ୍ପନ୍ନ ହେବା ପରେ ମଧ୍ୟ ‘ଇଣ୍ଟରସେକ୍ଟ ପାୱାର’ ଏକ ସ୍ୱତନ୍ତ୍ର ବ୍ରାଣ୍ଡ ଭାବେ କାର୍ଯ୍ୟ କରିବ ଏବଂ ଶେଲଡନ୍ କିମ୍ବର ଏହାର ନେତୃତ୍ୱ ଜାରି ରଖିବେ। ଏହି ମେଗା ଡିଲ୍ ଟେକ୍ ଶିଳ୍ପରେ ଏକ ନୂଆ ପ୍ରବଣତାର ସୂଚନା ଦେଉଛି, ଯେଉଁଠାରେ ବଡ଼ ଟେକ୍ କମ୍ପାନୀମାନେ ଏଆଇ ଆବଶ୍ୟକତା ପୂରଣ ପାଇଁ ନିଜସ୍ୱ ଶକ୍ତି ଉତ୍ସ ଉପରେ ଗୁରୁତ୍ୱ ଦେଉଛନ୍ତି।