ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆତଙ୍କବାଦ ବିରୋଧୀ ଲଢେଇରେ ଭାରତ ସହିତ ସହଯୋଗ କରିବାକୁ ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କୁ ଆହ୍ୱାନ କରିଛନ୍ତି। ତିଆନଜିନରେ ହୋଇଥିବା ଦ୍ୱିପାକ୍ଷିକ ବୈଠକରେ ଉଭୟ ନେତା ଆତଙ୍କବାଦକୁ ବିଶ୍ୱ ପାଇଁ ଏକ ବଡ଼ ବିପଦ ବୋଲି ସ୍ୱୀକାର କରିଥିଲେ।
ପ୍ରଧାନମନ୍ତ୍ରୀ ମୋଦୀ ଚୀନକୁ ୨୦୨୬ରେ ଭାରତରେ ଆୟୋଜିତ ବ୍ରିକ୍ସ ଶିଖର ସମ୍ମିଳନୀରେ ଅଂଶଗ୍ରହଣ ପାଇଁ ନିମନ୍ତ୍ରଣ କରିଥିଲେ। ସେଥିସହିତ, ଉଭୟ ଦେଶ ମଧ୍ୟରେ ପାରସ୍ପରିକ ବିଶ୍ୱାସ, ସମ୍ମାନ ଏବଂ ସହଯୋଗକୁ ସୁଦୃଢ କରିବାରେ ସମମତି ପ୍ରକାଶ କରାଯାଇଛି।
ସୀମା ବିବାଦ, ଶାନ୍ତି ବଜାୟ ରଖିବା, ବିମାନ ସେବା ପୁନର୍ବାର ଆରମ୍ଭ ଏବଂ କୈଳାସ-ମାନସରୋବର ଯାତ୍ରା ସମ୍ପର୍କରେ ମଧ୍ୟ ଦୁଇ ଦେଶରେ ସକାରାତ୍ମକ ଆଲୋଚନା ହୋଇଥିଲା।
ଚୀନ ରାଷ୍ଟ୍ରପତି ଜିନପିଙ୍ଗ କହିଥିଲେ ଯେ, ହାତୀ ଓ ଡ୍ରାଗନ୍ ଏକାଠି ହେଲେ ମାତ୍ର ଦୁଇ ଦେଶର ସମୃଦ୍ଧି ସୁନିଶ୍ଚିତ ହେବ।