ପାକିସ୍ତାନ ୧୬ ଖଣ୍ଡରେ ବିଭକ୍ତ ହେବା ଦାବି: ଛୋଟ ପ୍ରଦେଶ ପାଇଁ ଆନ୍ଦୋଳନ ଆରମ୍ଭ କଲେ କେନ୍ଦ୍ରମନ୍ତ୍ରୀ ଅବଦୁଲ ଅଲିମ ଖାନ
ଇସଲାମାବାଦ:
ପାକିସ୍ତାନରେ ଆର୍ଥିକ ସଙ୍କଟ ଓ ପ୍ରଶାସନିକ ବିଫଳତା ମଧ୍ୟରେ ଦେଶର ଗଠନକୁ ନେଇ ଏକ ବଡ଼ ରାଜନୈତିକ ବିତର୍କ ଆରମ୍ଭ ହୋଇଛି। ଇସ୍ତେଖକାମ ପାକିସ୍ତାନ ପାର୍ଟିର ସଭାପତି ତଥା କେନ୍ଦ୍ରୀୟ ମନ୍ତ୍ରୀ ଅବଦୁଲ ଅଲିମ ଖାନ ବର୍ତ୍ତମାନର ଚାରୋଟି ପ୍ରଦେଶ ପରିବର୍ତ୍ତେ ପାକିସ୍ତାନକୁ ୧୬ଟି ଛୋଟ ପ୍ରଦେଶରେ ବିଭକ୍ତ କରିବା ପାଇଁ ପ୍ରସ୍ତାବ ରଖିଛନ୍ତି।
ସେ କହିଛନ୍ତି, ବୃହତ୍ ପ୍ରଦେଶଗୁଡ଼ିକରେ ସାଧାରଣ ଲୋକଙ୍କ ପାଇଁ ମୌଳିକ ସେବା ସହଜରେ ଉପଲବ୍ଧ ହୋଇପାରୁନାହିଁ ଏବଂ ଶାସନ ବ୍ୟବସ୍ଥା ପ୍ରାୟ ଭାଙ୍ଗିପଡ଼ିଛି। ଏଭଳି ପରିସ୍ଥିତିରେ ଛୋଟ ପ୍ରଶାସନିକ ଏକକ ଗଠନ କରିଲେ ସେବାକୁ ଲୋକଙ୍କ ଦ୍ୱାରଦେଶରେ ପହଞ୍ଚାଇ ପାରିବ ବୋଲି ସେ ଯୁକ୍ତି ଦେଇଛନ୍ତି।
କାମୋକେରେ ଆୟୋଜିତ ଏକ ସମ୍ମିଳନୀରେ ଭାଷଣ ଦେଇ ଅବଦୁଲ ଅଲିମ ଖାନ କହିଛନ୍ତି ଯେ, ୧୬ଟି ପ୍ରଦେଶ ଗଠିତ ହେଲେ ଲୋକମାନଙ୍କୁ ନିଜ କାମ ପାଇଁ ଦୂରଦୂରାନ୍ତ ଯାତ୍ରା କରିବାକୁ ପଡ଼ିବ ନାହିଁ। ଏହା ସହିତ ଦୁର୍ନୀତି ହ୍ରାସ ପାଇବାର ସମ୍ଭାବନା ମଧ୍ୟ ବଢ଼ିବ ବୋଲି ସେ ମତ ପ୍ରକାଶ କରିଛନ୍ତି।
ମନ୍ତ୍ରୀ ପ୍ରସ୍ତାବ ରଖିଛନ୍ତି ଯେ, ଜନବହୁଳ ପ୍ରଦେଶ ପଞ୍ଜାବକୁ ଉତ୍ତର, ଦକ୍ଷିଣ, ପୂର୍ବ ଏବଂ ପଶ୍ଚିମ—ଏମିତି ଚାରିଟି ଭାଗରେ ବିଭକ୍ତ କରାଯିବା ଉଚିତ। ସେ ସ୍ପଷ୍ଟ କରିଛନ୍ତି ଯେ, ପ୍ରଦେଶଗୁଡ଼ିକର ମୂଳ ନାମ ପରିବର୍ତ୍ତନ ହେବ ନାହିଁ, କେବଳ ପ୍ରଶାସନିକ ସୁବିଧା ପାଇଁ ସୀମା ଛୋଟ କରାଯିବ।
ତାଙ୍କ ମତରେ, କେବଳ ପଞ୍ଜାବ ନୁହେଁ, ସିନ୍ଧ, ବେଲୁଚିସ୍ତାନ ଏବଂ ଖାଇବର ପଖତୁନଖ୍ୱାକୁ ମଧ୍ୟ ଚାରିଟି କରି ନୂତନ ପ୍ରଦେଶରେ ବିଭକ୍ତ କରାଯିବା ଉଚିତ। ବିଶେଷକରି ବେଲୁଚିସ୍ତାନ ଭଳି ବିଶାଳ ଏବଂ ଅଶାନ୍ତ ଅଞ୍ଚଳରେ ଛୋଟ ପ୍ରଦେଶ ଗଠନ କଲେ ବିଚ୍ଛିନ୍ନତାବାଦ ଓ ହିଂସା ନିୟନ୍ତ୍ରଣରେ ସହାୟକ ହୋଇପାରିବ ବୋଲି ସେ କହିଛନ୍ତି।
ଏହି ପ୍ରସ୍ତାବକୁ ଏମ୍କ୍ୟୁଏମ୍ ସହ କିଛି ଅନ୍ୟ ରାଜନୈତିକ ଦଳ ସମର୍ଥନ କରିଛନ୍ତି। ଏମ୍କ୍ୟୁଏମ୍ ଦୀର୍ଘ ଦିନ ଧରି କରାଚୀକୁ ଏକ ସ୍ୱତନ୍ତ୍ର ପ୍ରଦେଶ କରିବା ଦାବି କରିଆସୁଛି। ପୂର୍ବରୁ ସିନେଟ୍ ଉପାଧ୍ୟକ୍ଷ ମିର୍ଜା ମହମ୍ମଦ ଆଫ୍ରିଦି ମଧ୍ୟ ପାକିସ୍ତାନକୁ ନଅଟି ପ୍ରଦେଶରେ ବିଭକ୍ତ କରିବା ପରାମର୍ଶ ଦେଇଥିଲେ।
ଅବଦୁଲ ଅଲିମ ଖାନଙ୍କ ଦଳ ୧୬ଟି ପ୍ରଦେଶ ଗଠନ ଦାବିକୁ ନେଇ ଦେଶବ୍ୟାପୀ ଆନ୍ଦୋଳନ ଘୋଷଣା କରିଛି। ବଢ଼ୁଥିବା ଏହି ଦାବି ପାକିସ୍ତାନର ବର୍ତ୍ତମାନର ପ୍ରଶାସନିକ ଗଠନ ନେଇ ଗଭୀର ପ୍ରଶ୍ନ ଉଠାଇଛି।